ޒިޔަދަމްގެ މަރު: ސިފާމްގެ އުމުރު ދުވަހުގެ ޖަލު ހުކުމް ހައި ކޯޓުން ދަމަހައްޓައިފި

ލ. މުންޑޫގައި 2015 ވަނަ އަހަރު މަރާލި އަލީ ޒިޔަދަމްގެ މަރުގެ މައްސަލައިގައި އަލީ ސިފާމްގެ މައްޗަށް ކްރިމިނަލް ކޯޓުން އިއްވި އުމުރު ދުވަހުގެ ޖަލު ހުކުމް ދަމަހައްޓަން ހައި ކޯޓުން މިއަދު ހުކުމް ކޮށްފި އެވެ. 

ވީ ކިހިނެއް؟ - ޒިޔަދަމް މަރާލީ 20 މާޗު 2015 ވަނަ ދުވަހުގެ ރޭ 10:30 ހާއިރު، މުންޑޫ ވަގުތީހިޔާ ކައިރިން ހިނގި މާރާމާރީއަކަށް ފަހު، ވަޅިއަކުން ހަމަލާދީ އެވެ. 

މި މައްސަލާގައި ހިމެނޭ ދެ މީހުންގެ މައްޗަށް މިދިޔަ އަހަރުގެ 27 ފެބްރުއަރީގައި ވަނީ ކުށް ސާބިތުވެ ހުކުމް ކޮށްފަ އެވެ. އެގޮތުން، ކްރިމިނަލް ކޯޓުން ހުކުމް ކުރީ:

ސިފާމުގެ މައްޗަށް އިއްވި އުމުރު ދުވަހުގެ ޖަލު ހުކުމް އޭނާގެ ފަރާތުން އިސްތިއުނާފަށް ހުށަހަޅާފައިވަނީ މިދިޔަ އަހަރުގެ 29 މޭގަ އެވެ. އަދި ޝަނޫންގެ މައްޗަށް އިއްވި މަރުގެ ހުކުމް ވެސް މިދިޔަ އޮގަސްޓު ތެރޭ ވަނީ އިސްތިއުނާފް ކޮށްފަ އެވެ.

ތަފްސީލް - ދަށު ކޯޓުގެ ހުކުމް ބާތިލުކޮށްދިނުމަށް އެދި ސިފާމްގެ ފަރާތުން ހުށަހަޅާފައިވާ އިސްތިއުނާފް މައްސަލައިގައި މިއަދު ހައި ކޯޓުން ނިންމީ ސިފާމްގެ މައްޗަށް ދަށު ކޯޓުން ކުށް ސާބިތުކޮށްފައިވަނީ ރަނގަޅަށް ކަމަށެވެ. އެހެންކަމުން، އޭނާގެ މައްޗަށް އިއްވާފައިވާ އަދަބު ބާތިލުކުރަން ޖެހޭ ސަބަބެއް ނެތް ކަމަށް އެ ކޯޓުން ނިންމި އެވެ.

މިގޮތަށް ނިންމީ އެ ކޯޓުގައި މި މައްސަލަ ބެއްލެވި ތިން ފަނޑިޔާރުންގެ އިއްތިފާގުންނެވެ.

ސިފާމްގެ ފަރާތުން ހައި ކޯޓަށް ހުށަހެޅި މައްސަލާގައި އެދިފައި އޮތީ، ދަށު ކޯޓުގެ ހުކުމް ބާތިލުކުރުމާ އެކު، އެ ކުށުގެ އަދަބު ކަނޑައަޅަން ޖެހޭނީ ކުށުގެ އުންސުރުތައް ސާބިތުކޮށްފައިވާ ގާނޫނުލްއުގޫބާތުގެ 1002 ވަނަ މާއްދާގައިވާ އަދަބު ކަނޑައެޅުމުގެ ތާވަލާ އެއްގޮތަށް ކަމަށް ކަނޑައަަޅައިދިނުމަށެވެ.

ސިފާމްގެ ފަރާތުން އެގޮތަށް އެދުނީ ކުށުގެ އުންސުރުތައް ސާބިތުކޮށްދިނުމަށް ގާނޫނުލްއުގޫބާތުގެ 30 ވަނަ މާއްދާއަށް ރުޖޫއަވުމަށް ފަހު، ދަށު ކޯޓުން އަދަބު ކަނޑައަޅާފައިވަނީ ބިރު ދެއްކުމާއި ތޫނު ހަތިޔާރު ގެންގުޅުން މަނާ ކުރުމުގެ ގާނޫނުން ކަމަށް ބުނެ އެވެ. 

ހައި ކޯޓުން މިއަދު ނިންމި ނިންމުމުގައި ވަނީ:

މައްސަލައިގެ ހުލާސާ - މި މައްސަލާގައި ދައުލަތުން ދަށު ކޯޓުގައި ބުނެފައިވާ ގޮތުގައި، ޒިޔަދަމްއަށް ހަމަލާދިން ރޭ އެ ރަށު ވަގުތީހިޔާ ކައިރީގައި ޒިޔަދަމާއި އިތުރު މީހަކު މާރާމާރީ ހިންގަމުން ދަނިކޮށް ޝަނޫން އާއި ސިފާމް އެ ތަނަށް ގޮސް، ކަތިވަޅިއަކުން ޒިޔަދަމްގެ ކަރަށާއި ބުރަކަށްޓަށް އަދި ފަލަމަސްގަނޑަށް ހަމަލާ ދީފައިވެ އެވެ. ހަމަލާ ދޭން ފެށުމުން ސަލާމަތްވާން ޒިޔަދަމް ވަގުތީހިޔާ ތެރެއަށް ވަނުމުން ވެސް، އެ ދެ މީހުން އޭނާގެ ފަހަތުން ގޮސް ވަޅިން ހަމަލާދީފައިވެ އެވެ.

ޒިޔަދަމްގެ ހަށިގަނޑު ހިފައިގެން ހޮސްޕިޓަލަށް ބަޔަކު ދަނިކޮށް ދައުވާ ލިބޭ ޝަނޫން އޭގެ ތެރެއިން މީހަކަށް ހަމަލާ ދީ، ޒިޔަދަމްގެ ބިރު ދެއްކި ކަމުގެ ތުހުމަތު ވެސް ދައުލަތުން ކުރެ އެވެ.