ގެއަކަށް ވައްދައި ބަރަހަނާކޮށް، ފައިސާ ފޭރުނު މައްސަލައިގައި އަންހެނަކު ހައްޔަރުކޮށްފި

މާލޭގައި މީހަކު ގެއަކަށް ވައްދުމަށް ފަހު އޭނާ ބަރަހަނާކޮށް، ކޭޝް ކާޑު އަތުލައިގެން ފޭރުނު މައްސަލައިގައި އަންހެނަކު ހައްޔަރުކޮށްފި އެވެ.

ވީ ކިހިނެއް؟ - އެ މައްސަލައިގައި ދެ ފިރިހެނުން މީގެ ކުރިން ވަނީ ހަައްޔަރުކޮށްފަ އެވެ. އެ މައްސަލަ ފުލުހުންނަށް ރިޕޯޓުކޮށްފައިވަނީ މިދިޔަ ބުދަ ދުވަހު އެވެ.

ތަފްސީލް - ފުލުހުން މިއަދު މީޑީއާތަކަށް ފޮނުވި މެސެޖެއްގައި ބުނީ އެ މައްސަލައިގައި ހޯދަމުންދިޔަ އުމުރުން 43 އަހަރުގެ އަންހެނަކު ހައްޔަރުކޮށްފައިވާ ކަމަށެވެ.

އޭނާގެ ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރަން އަމުރުކޮށްފައިވާ ކަމަށް ވެސް ފުލުހުންގެ މެސެޖްގައިވެ އެވެ.

މި މައްސަލައިގައި ފޭރިގަތީ ކިހާ ފައިސާއެއް ކަމެއް އަދި ސާފެއް ނުވެ އެވެ.

އެނގުން މުހިންމު - މި ފަހުން މީހުން ތަންތަނަށް ވައްދައިގެން ފޭރުމާއި ބިރުދެއްކުމުގެ ކުށްތައް މާލެ ސަރަހައްދުގައި ވަނީ ގިނަވެފަ އެވެ. އެ އަމަލްތައް ހިންގަނީ ގްރޫޕް ހަދައިގެން ކަން ވެސް، ފުލުހުން މިހާތަނަށް ހާމަކުރި މައުލޫމާތުތަކުން އެނގެ އެވެ.