ގެޔަކަށް ވައްދައި މީހަކު ބަރަހަނާކޮށް، ކޭޝް ކާޑު އަތުލައިގެން ފައިސާ ފޭރިގެންފި

މާލޭގައި މީހަކު ގެއަކަށް ވައްދުމަށް ފަހު އޭނާ ބަރަހަނާކޮށް، ކޭޝް ކާޑު އަތުލައިގެން ފޭރުނު މައްސަލައެއްގައި ދެ މީހަކު ހައްޔަރުކޮށްފައިވާ ކަމަށް ފުލުހުން މިއަދު ބުނެފި އެވެ.

ވީ ކިހިނެއް؟ - މިދިޔަ ބުދަދުވަހު ފުލުހުންނަށް ހުށަހެޅި އެ މައްސަލަ ރިޕޯޓުކޮށްފައިވާ ގޮތުން އެނގެނީ އޭނާގެ ކާޑު އަތުލީ އެ ގެއަށް ވައްދައިގެން ބަރަހަނާކޮށް ބިރުދައްކައިގެން ކަމެވެ. 

ތަފްސީލު- ފުލުހުން މީޑިއާތަކަށް ފޮނުވި މެސެޖެއްގައި ބުނީ އެ މައްސަލައިގައި ކޯޓު އަމުރެއްގެ ދަށުން ދިވެހި ދެ ފިރިހެނަކު މިހާރު ހައްޔަރުކޮށްފައިވާ ކަމަށެވެ. އެއީ 26 އަހަރާއި 35 އަހަރުގެ މީހުންެ ކަމަށް ވެސް ބުންޏެވެ.

ދެ މީހުންގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން އެކެއްގެ ބަންދަށް 30 ދުވަސް އަދި އަނެކަކުގެ ބަންދަށް 60 ދުވަސް ދީފައިވާ ކަމަަށް ވެސް ފުލުހުން ބުންޏެވެ.

މި މައްސަލައިގައި ފޭރިގަތީ ކިހާ ފައިސާއެއް ކަމެއް އަދި ސާފެއް ނުވެ އެވެ.

އެނގުން މުހިންމު - މި ފަހުން މީހުން ތަންތަނަށް ވައްދައިގެން ފޭރުމާއި ބިރުދެއްކުމުގެ ކުށްތައް މާލެ ސަރަހައްދުގައި ވަނީ ގިނަވެފަ އެވެ. އެ އަމަލްތައް ހިންގަނީ ގްރޫޕް ހަދައިގެން ކަން ވެސް، ފުލުހުން މިހާތަނަށް ހާމަކުރި މައުލޫމާތުތަކުން އެނގެ އެވެ.