ބަޖެޓު ބޭނުންކުރާ ގޮތާ މެދު ސުވާލު އުފެދިފައިވާ އެންޑީއޭގެ އޮޑިޓެއް ހަދަން މަޖިލީހުން ފާސްކޮށްފި

ނޭޝަނަލް ޑްރަގް އެޖެންސީ (އެންޑީއޭ)ގެ ފާއިތުވި ފަސް އަހަރުގެ ފައިނޭންޝަލް އަދި ޕާފޯމަންސް އޮޑިޓެއް ހަދަން އޮޑިޓަ ޖެނެރަލްގެ އޮފީހުގައި އެދެން ރައްޔިތުންގެ މަޖިލީހުން މިއަދު ފާސްކޮށްފި އެވެ.

ވީ ކިހިނެއް؟ - އެންޑީއޭ ރީސްޓްރަކްޗާ ކުރުމަށް ގޮވާލައި ހޭންޑްސް ޓުގެދާ ޖަމްއިއްޔާ އިން ހުށަހެޅި ޕެޓިޝަނަކާ ގުޅިގެން މަޖިލީހުގެ ޕެޓިޝަން ކޮމިޓީން ވަނީ އެ މައްސަލަ ދިރާސާކޮށްފަ އެވެ. އަދި މި މަހުގެ 18 ވަނަ ދުވަހު ކޮމިޓީން ވަނީ ދިރާސާގެ ރިޕޯޓު ފާސްކޮށްފަ އެވެ. އެ ރިޕޯޓުގައި ޑްރަގް ފަރުވާގެ ނިޒާމުގައި ހުރި ގިނަ މައްސަލަތަކެއް ފާހަގަކޮށް، މައިގަނޑު 10 ހުށަހެޅުމެއް ހިމަނާފައިވެ އެވެ.

ތަފްސީލް - ކޮމިޓީގެ ރިޕޯޓުގައި ބުނީ، އެންޑީއޭއަށް އެކަށީގެންވާ ބަޖެޓު ދީފައި ހުރި ނަމަވެސް ކޮންމެ އަހަރަކު ވަކިވަކި ސެންޓަރުތަކަށް ކަނޑައަޅާ ޖުމްލަ ބަޖެޓުގެ ތަފްސީލް އެންޑީއޭގެ ފަރާތުން އެ ސެންޓަރުތަކަށް ނާންގާ ކަމަށެވެ. އެހެންވުމުގެ ސަބަބުން އެ ސެންޓަރުތަކުގެ މަސައްކަތްތަކާއި ފަރުވާގެ ޕްރޮގްރާމްތައް ކުރިއަށް ގެންދަން ހުރަސްތަކާ ކުރިމަތިވާ ކަމަށް ރިޕޯޓުގައި ބުންޏެވެ.

ރިޕޯޓުގައި އިތުރަށް ބުނީ އެންޑީއޭ އިން އެ ސެންޓަރުތައް ރަނގަޅަށް މޮނީޓަކޮށް ބަލަހައްޓަމުން ނުދާ ކަމަށެވެ. ފަރުވާދޭ ސެންޓަރުތަކުގެ ހިދުމަތް އެންމެ އެކަށީގެންވާ ގޮތެއްގައި ނުދެވެނީ ބަޖެޓުގެ ދަތިކަމުގެ ސަބަބުން ކަމަށް އެންޑީއޭން ބުނި ނަމަވެސް، ފާއިތުވި އަހަރުތަކުގައި އެ އެޖެންސީއަށް އެކަށީގެންވާ ބަޖެޓު ދީފައިވާ ކަމަށް ކޮމިޓީ ރިޕޯޓުގައި ބުންޏެވެ.

އެހެންކަމުން އެންޑީއޭގެ ފާއިތުވި ފަސް އަހަރުގެ ފައިނޭންޝަލް އަދި ޕާފޯމަންސް އޮޑިޓެއް ހަދަން އޮޑިޓާ ޖެނެރަލްގެ އޮފީހުގައި އެދެން ކޮމިޓީން ފާސްކުރި އެވެ. ކޮމިޓީން ފާސްކުރި ގޮތަށް، މަޖިލީހުގެ ތަޅުމުން މިއަދު ވަނީ ފާސްކޮށްފަ އެވެ. އެ ހުށަހެޅުންތައް ފާސްކުރީ ވޯޓުގައި ބައިވެރިވި 33 މެމްބަރުންގެ އަގުލަބިއްޔަތުންނެވެ.

އިތުރަށް ކިޔާލަން -