ކައިރި ކައިރީގައި ޒުވާން ދެ މަރު؛ އުނގޫފާރު ސިހުމެއްގައި

މި ފަހުން ރ. އުނގޫފާރަށް ލިބުނު އެންމެ ބޮޑު ހިތްދަތިކަމަކީ، މަސް ހިފަން ގޮސް އުޅެނިކޮށް އެ ރަށު ޒުވާނެއް ކަމަށްވާ އަލީ މިމްރާހް ގެނބިގެން މަރުވުމެވެ. މީގެ ދެ އަހަރު ކުރިން، 2022 ވަނަ އަހަރުގެ ފަހުކޮޅު މިމްރާހް މަރުވެފައި އޮއްވާ ފެނުނީ މޫދު އަޑިންނެވެ. އުމުރުން 25 އަހަރުގެ މޮޅު ފުޓުބޯޅަ ކުޅުންތެރިއާގެ މަރުން އެ ރަށް އަރައިނުގަނެވި އުޅެނިކޮށް އަނެއްކާ ވެސް އުނގޫފާރަށް ހަމަ އެ ހިތާމަ ކުރަން ވަނީ ޖެހިފަ އެވެ.

މިދިޔަ މަހު 23ގައި، އުނގޫފާރު މަގެއްގައި އޮތް ފެންގަނޑަކަށް ކަަރަންޓް އައުމުން ދެ ކުއްޖަކު ސަލާމަތް ކުރަން އުޅެނިކޮށް 18 އަހަރުގެ ހުސެން އަތީކު ކަަރަންޓުގައި ޖެހި ހާލު ސީރިއަސްވި އެވެ. ހޭނާރާ އޮވެ، 15 ދުވަސް ފަހުން މިއަދު އޭނާ ވަނީ މަރުވެފަ އެވެ. އޭގެ ކުރިން، ސިފައިންގެ މޫދު ތަމްރީނެއްގައި އުޅެނިކޮށް މި މަހުގެ ދެ ވަނަ ދުވަހު މަރުވީ ވެސް އުނގޫފާރުގެ 23 އަހަރުގެ ޒުވާނެކެވެ.

އެއް ހަފުތާ ތެރޭގައި އުނގޫފާރުގެ ދެ ޒުވާނަކު ވަކިވީ އެވެ.

"ވަރަށް ވަރަށް ހިތާމަވެރި ހާދިސާތަކެއް މިއީ. އުނގޫފާރު ވާނެ މި ފަދަ ހާދިސާތަކުގައި އެންމެ ގިނައިން މީހުން މަރުވާ ރަށަކަށް،" ކައުންސިލްގެ ރައީސް އަބްދުﷲ ރަޝީދު ވިދާޅުވި އެވެ.

"ވަކިވެގެން އެ ދިޔައީ ރަށަށް ބޭނުންތެރި ރަނގަޅު ޒުވާނުންތަކެއް."

މަސް ހިފަން ގޮސް އުޅެނިކޮށް މަރުވި މިމްރާހަކީ، އުނގޫފާރަށް ނިސްބަތްވެވަޑައިގަންނަވާ، އަވަހާރަކޮށްލާފައިވާ ދީނީ އިލްމުވެރިޔާ ޑރ. އަފްރާޝީމް އަލީއަށް ބޮޑުބޭބެ ކިޔާ ޒުވާނެކެވެ. މުބާރާތްތަކުން ވަނަ ގެނެސްދޭ، މޮޅު ފުޓުބޯޅަ ކުޅުންތެރިއާއާ މެދު މުޅި ރަށް ފަހުރުވެރިވި އެވެ. އޭނާގެ ޖަނާޒާގައި އުނގޫފާރުގެ އެންމެންހެން ބައިވެރިވި އެވެ.

އުނގޫފާރުގެ ތާރީހުގައި ދެން އެ ފަދަ އެންމެ ބޮޑު ޖަނާޒާއެއް ބޭއްވީ، މިއަރުގެ ހަމަލާގައި މަރުވި މުހައްމަދު ޒައިދާންގެ އެވެ. އެމްއެންއެޑީއެފުން ލ. މާވަށް ކައިރި މޫދުގައި ކުރިއަށް ގެންދިޔަ ތަމްރީނުގައި މިއަރު ހަމަލާދިނުމުން ޒައިދާން އެންމެ ފުރަތަމަ ގެންދިޔައީ ގަމު ރީޖަނަލް ހޮސްޕިޓަލަށެވެ. އޭނާ މަރުވީ އެ ހޮސްޕިޓަލުގައި ފަރުވާ ދެމުންދަނިކޮށެވެ.

އުނގޫފާރުގައި ޒައިދާންގެ ޖަނާޒާ ބޭއްވީ ރަސްމީ އިއްޒަތުގަ އެވެ. އަދި ސިފައިންގެ ހަތް ބަޑީގެ ސަލާމެއް އެރުވި އެވެ. ޖަނާޒާއަށް ފަހު، ސަންދޯކުގައި އަޅާފައިވާ އޮތް ރާއްޖޭގެ ގައުމީ ދިދަ، އެ ޒުވާނާގެ އާއިލާއާ ހަވާލުކުރި އިރު އެއްވެ ތިބި ބައެއް މީހުން ރޯތަން ފެނެ އެވެ.

"މިމްރާހާއި ޒައިދާންގެ ޖަނާޒާ ދުވަހަކު ވެސް ހަނދާނެއް ނުނެތޭނެ. ވަރަށް ޓެލެންޓެޑް، ވަރަށް ޔަންގު ދެ ކުދިން އެހާ ކުއްލިގޮތަކަށް ވަކިވެގެން އެ ދިޔައީ،" އުނގޫފާރު މީހަކު ބުންޏެވެ.

ހޮސްޕިޓަލުގައި ފަރުވާ ދެމުން ދަނިކޮށް، އަތީކު މިއަދު މަރުވީ ހޭނާރާ އޮވެ އެވެ. އެންމެ ފަހުން އޭނާ މަސައްކަތް ކުރީ ކަރަންޓުގައި ޖެހުނު ކުޑަ ދެ ކުއްޖަކު ސަލާމަތް ކުރާށެވެ. އަތީކާ މެދު އުނގޫފާރު ފަހުރުވެރިވެ އެވެ. އޭނާގެ ޖަނާޒާ މިއަދު މާލޭގައި ބޭއްވުމަށް ހަމަޖެހިފައިވާއިރު އުނގޫފާރުން ގިނަ ބަޔަކު އޭނާގެ މޫނު ދެކިލުމަށް މާލެ ދިޔުމަށް ވަނީ ނިންމާފަ އެވެ.

"އަދިވެސް ގަބޫލެއް ނުކުރެވޭ އެ ދެ ކުދިން މަރުވީ ކަމަކަށް. ސިހުމެއްގައި މި ތިބެވެނީ." ކުރިން ވާހަކަ ދެއްކި މީހާ ބުންޏެވެ.