އަހުމަދު ހާފިޒު: 62 އަހަރުގައި އޭނާ މިއަދު ވަނީ އަވަހާރަވެފައި
މަސްވެރިކަމުގެ ދާއިރާއިން ގިނަ ހިދުމަތްތަކެއް ކޮށްދެއްވި ހާފިޒް އަވަހާރަވެއްޖެ
މަސްވެރިކަމާއި ކުޅިވަރުގެ ދާއިރާއިން ގިނަ ހިދުމަތަތްތަކެއް ކޮށްދެއްވާފައިވާ ކަނޑުއަޑީގެ ދިރުންތަކާ ބެހޭ މާހިރު އަހުމަދު ހާފިޒް އަވަހާރަވެއްޖެ އެވެ.
ވީ ކިހިނެއް؟ - ހާފިޒްގެ އާއިލާއިން މިއަދު 'ދައުރު'އަށް ބުނީ އޭނާ އަވަހާރަވެފައި ވަނީ، ނުވަ އަހަރުވަންދެން ކެންސަރު ބަލީގައި އުޅުއްވުމަށް ފަހު މިއަދުގެ ވަގުތެއްގައި އައިޖީއެމްއެޗްގައި ކަމަށެވެ.
-
އަވަހާރަވީ އިރު އުމުރަކީ 62 އަހަރު
-
ދެ ފިރިހެން ބޭފުޅުން ދުނިޔޭގައި އެބަ ތިއްބެވި
ހާފިޒްއަކީ ކޮން ބޭފުޅެއް
ހާފިޒް އަކީ ރާއްޖޭގެ މެރިން ރިސާޗް ސެންޓަރު އުފެދުނީއްސުރެ އެތަނުގައި މަސައްކަތްކުރައްވާ، އެކި ކަހަލަ އިލްމީ ދިރާސާތައް ހައްދަވާފައިވާ ބޭފުޅެކެވެ. އެގޮތުން:
-
1999 ވަނަ އަހަރުން ފެށިގެން 2004 އަކާ ހަމައަށް އޭނާ އެ ސެންޓަރުގެ ޑިރެކްޓަރުކަން ވެސް ކުރެއްވި
-
ރާއްޖޭގެ ކަނޑުގެ ދިރުންތަކަށް ހާއްސަ ދިރާސާތައް ހެއްދެވުމާއި އިލްމީ ލިޔުންތަކާއި ފޮތްތައް ޝާއިއުކުރެއްވުމުގެ އިތުރުން ރާއްޖޭގެ މަހުގެ ޓެކްސޮނޮމިކް ކަލެކްޝަން ފުޅާކުރުމުގެ މުހިއްމު މަސައްކަތްތައް އޭނާ ކުރެއްވި
-
ޓްރިގްލިޑް އާއިލާގެ ފަރު މަހެއް ކަމަށްވާ ޓެރިގޮޓްރިގްލާ (އޯ)އަށް ހާފިޒީގެ ނަން ދީފައިވަނީ އޭނާއާ ގުޅުވައިގެން
ފާހަގަކޮށްލެވޭ - މަސްވެރިކަމުގެ ދާއިރާގެ އިތުރުން، ކުޅިވަރުގެ ދާއިރާ އިން ވެސް ހާފިޒް ވަނީ ގިނަ ހިދުމަތްތަކެއް ކޮށްދެއްވާފަ އެވެ. އެގޮތުން ބާސްކެޓްބޯޅަ އެސޯސިއޭޝަންގެ ރައީސްގެ މަގާމު ވެސް ފުރުއްވާފައިވެ އެވެ. އޭނާ އަކީ އެ އެސޯސިއޭޝަންގެ ރައީސްކަން އެންމެ ގިނަ ދުވަސް ވަންދެން ކުރެއްވި ބޭފުޅާ އެވެ.