އެންމެ އިންވެސްޓަރެއްގެ ވާހަކަ؛ ރާއްޖޭގައި އިންވެސްޓްކުރަން ކެތްމަދުވެފައި

ދުބާއީ - "މީގެ ކުރީން ވެސް އަޅުގަނޑުމެން [ކުރީގެ ސަރުކާރަށް ވެސް] ވަރަށް ގިނަ ޕްރޮޕޯސަލްތައް ހުށަހެޅިން. އެކަމަކު އަޅައެއް ނުލި... އެކަމަކު މި ސަރުކާރު ތަފާތު،" ޔޫއޭއީގެ ވިޔަފާރީގެ މައި ސަހަރު ދުބާއީގެ އުސް ބުރިޖު އަލް އަރަބްގައި އިއްޔެ ބޭއްވި އިންވެސްޓް މޯލްޑިވްސް ފޯރަމްގައި ބައިވެރިވެވަޑައިގަތް ޔުނައިޓެޑް ސްޓާސް ގްރޫޕް (ޔޫއެސްޖީ)ގެ ސީއީއޯ ނިޕުނަ ވަހަލަތަންތްރިގަ ވިދާޅުވި އެވެ.

އަބޫދާބީގައި 2019ގައި އުފެއްދި ޔޫއެސްޖީއަކީ، ޔޫއޭއީގެ ފުރަތަމަ ހާރިޖީ ވަޒީރު އަހުމަދު ބިން ހަލީފާ އައްސުވައިދީގެ އާއިލީއަށް ނިސްބަތްވާ ވިޔަފާރި ކުންފުންޏެވެ. އެ ކުންފުނީގެ މެނޭޖްމަންޓްގެ އެންމެ އިސްމީހަކަށް މިވަގުތު ހުންނެވި ނިޕުނައަށް އޮތް ޔަގީން ކަމަކީ، މި ސަރުކާރުން އިންވެސްޓަރުންނާ ގާތް ވުމެވެ.

އޭނާ ވިދާޅުވި ގޮތުގައި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރާއްޖެއަށް ހުށަހެޅި އެއް ޕްރޮޕޯސަލަކީ އިލެކްޓްރިކަލް އެއާކްރާފްޓް ރާއްޖެއަށް ތައާރަފްކުރުމުގެ ޕްރޮޕޯސަލްއެއް ކަމަށް އޭނާ ވިދާޅުވި އެވެ. ނަމަވެސް ވެރިކަން ނިމިގެންދިޔައިރު ވެސް އެ ސަރުކާރުގެ ޖަވާބެއް ނެތްކަން އޭނާ ހިތާމައާއެކު ފާހަގަ ކުރެއްވި އެވެ. ނަމަވެސް މި ސަރުކާރު އެހެން ނުވާނެކަން އަމަލުން ދައްކަވަމުން ގެންދަވާކަމަށް އޭނާ ވިދާޅުވި އެވެ. އެއީ، ރާއްޖެއަށް އިންވެސްޓް ކުރުމަށް އޮތް ޝައުގުވެރިކަން އިތުރަށް ބޮޑުވި ކަމެއްގެ ގޮތުގައި އޭނާ ސިފަ ކުރެއްވި އެވެ.

"އަހަރުމެން މިތިބީ އިންވެސްޓް ކުރުމަށް ތައްޔާރަށް. އަދި ރާއްޖޭގައި މިހާރު އިންވެސްޓް ކުރުމަކީ، [ދެ ފަރާތައް ވެސް] ވިން ވިން އިންވެސްޓްމަންޓެއްކަން އަހަރުމެންނަށް އެނގޭ،" ނިޕުނަ ވިދާޅުވި އެވެ.

އޭނާގެ ވާހަކައިގައި ރައީސް މުހައްމަދު މުއިއްޒާއި ޓޫއަރިޒަމް މިނިސްޓަރު އިބްރާހިމް ފައިސަލްގެ މަސައްކަތް ފާހަގަ ކުރި އެވެ. 

"މި ސަރުކާރު އައުމަށް ފަހު، ގިނަ ޕްރޮޕޯސަލްއަށް މިހާރު ވާނީ ހުށަހަޅާފައި. އަލަށް އައްޔަން ކޮށްފައިވާ ކެބިނެޓް މިނިސްޓަރުންނަށް ވަރަށް އިނިޝިއޭޓިވް އަދި މަސައްކަތަށް ވަރަށް ކަމޭހިތާ. ހާއްސަކޮށް ޓޫރިޒަމް މިނިސްޓަރު [ފައިސަލް]،" އަންނަ ސެޕްޓެމަބަރު މަހު 26ގައި ޓުރިޒަމް މިނިސްޓްރީއާ ގުޅިގެން ހުޅުމާލެ ފޭސް ދޭއްގައި ޑްރޯން ފެސްޓިވަލެއް ވެސް ބޭއްވުމަށް ތައްޔާރުވަމުންދާކަން ފާހަގަ ކުރައްވައި އޭނާ ވިދާޅުވި އެވެ.

އޭގެ އިތުރުން ވެސް ކުރިއަށް އޮތް ދުވަސްތަކުގައި ސައުތު އޭޝީއާ ސަރަހައްދަށް އަމާޒުކޮށްގެން ޓެކްނޮލޮޖީގެ ދާއިރާއާ ގުޅުން ހުރި ހަރަކާތްތަކެއް ރާއްޖޭގައި ބޭއްވުމަށް ރާވަމުންދާކަން ވެސް ނިޕުނަ ފާހަގަ ކުރެއްވި އެވެ.

ޔޫއެސްޖީ ކުންފުނީގެ ދަށުގައި އަށް ވަރަކަށް ސަބްސިޑަރީ ކުންފުނި އެބަ އޮތެވެ. އޭގެ ތެރޭގައި ހިމެނޭ ބައެއް ކުންފުނިތަކުން މިހާރު ވެސް ރާއްޖޭގައި ޝައުގުވެރިކަން ފާޅުކޮށް، ޕްރޮޕޯސަލް ހުށަހަޅަމުންދާކަމަށް ނިޕުން ވިދާޅުވި އެވެ.

"އޭގެ ތެރެއިން އެއް ސަބްސިޑަރީ ކުންފުނި ކަމަށްވާ، ވިކްސް ކެޕިޓަލްގެ ފަރާތުން މިހާރު ވެސް ރާއްޖޭގެ ރީޖަނަލް އެއާޕޯޓްސްއާ އެކު މަޝްވަރާތައް ވަނީ ފަށާފައި. އަޅުގަނޑުމެން މިތިބީ ރާއްޖޭގައި ހަ އެއާޕޯޓު އެޅުމަށް ތައްޔާރަށް،" އޭނާ ވިދާޅުވި އެވެ.

ބޭސް އެއްތަނުން އަނެއްތަކަށް ގެންދިޔުމަށާއި ރާއްޖޭގެ ކަނޑުގެ ސަރަހައްދު ބެލެހެއްޓުމަށްޓަކައި ޑްރޯން ތައާރަފްކުރުމާ ގުޅޭ މަޝްވަރާތަކެއް ވެސް ރީޖަނަލް އެއާޕޯޓްސް އާއި ޓުރިޒަމް މިނިސްޓްރީއާ އެކު ކުރިއަށްދާކަމަށް ނިޕުނަ ހާމަ ކުރެއްވި އެވެ. 

"އަޅުގަނޑުމެން ތައާރަފް މި ކުރަނީ، ޑޯރޯން ޓްރާސްޕޮޓޭޝަން ސިސްޓަމް އަދި ޑްރޯން އޮޕަރޭޓިން މެނޭޖްމަންޓް ސިސްޓަމް [ނުވަަތަ] ޔޫޓީއެމް. އެއީ ސްވިޑަންއިން އީޖާދު ކުރި ޓެކްނިލޮޖީއެއް. ސްވިޑަންގެ ކުންފުނިން ވެސް މި ފޯރަމްގައި ބައިވެރިވޭ. ރާއްޖޭގައި އިންވެސްޓް ކުރުމަށް އެމީހުންގެ ވަރަށް ބޮޑު ޝައުގެއް އެބަ އޮތް،" އޭނާ ވިދާޅުވި އެވެ.

ހަ އެއާޕޯޓުގެ އިތުރަށް ޔޫއެސްޖީގެ ކުންފުނިތަކުން ދެން އެންމެ ބޮޑު މަޝްރޫއަކަށް މިއޮތީ އައްޑުގައި ގާއިމްކުރުމަށް ބޭނުންވާ 100 މިލިއަން ޑޮލަރުގެ ސްމާޓް ހައުސިން އެވެ. އެ މަޝްރޫއު ހިންގުމަށްޓަކައި އެގޭ އިތުރުން، ހައުސިން ޑިވަލޮޕްމަންޓް ފައިނޭންޝަލް ކޯޕަރޭޝަން (އެޗްޑީސީ) މެދުވެރިކޮށް ފަންޑިން ފޯރުކޮށްދިނުމާ ގުޅޭ ގޮތުން ރައީސް އޮފީހާ ވާހަކަ ދައްކަމުން އަންނަ ކަމަށް ވެސް އޭނާ ވިދާޅުވި އެވެ.

އެ ފަންޑިން ހޯދަނީ، ދިވެހި ސަރުކާރަށް އޭގެ މާލީ މާ ބޮޑު ބުރައެއް ނެތި ކަމަށް އޭނާ ވިދާޅުވި އެވެ.

"އެކަން ކުރުމަށް ކޮލެޓްރަލްއެއް ބޭނުމެއް ނޫން،" އަނބުރާ ފައިސާ ދައްކަން ޖެހޭ މުއްދަތު ދިގު ދަންމާ ފައިނޭންސިން މޮޑެލްއަކަށް އެކަން ކުރަން ބޭނުންވާކަން ފާހަގަކުރައްވައި އޭނާ ވިދާޅުވި އެވެ.

"100 މިލިއަން ޑޮލަރުގެ ސްމާޓް ހައުސިން އައްޑޫގައި އެޅުމަށްޓަކައި މިހާރު މަޝްވަރާތައް ފެށިފައިވާއިރު، އެއީ، 504 ހައުސިން ޔުނިޓް،" ކުރިއަށް އޮތް ދެ އަހަރު މި މަޝްރޫއު ހަގީގަތަކަށް ވާނެ ކަމުގެ އުންމީދެއްގައި ހުންނެވި ނިޕުނަ ވިދާޅުވި އެވެ.