ރާއްޖޭގައި އޮތް އިންވެސްޓްކުރުމުގެ ފުރުސަތު ކިޔައިދޭން ބޭއްވި ފޯރަމް ކުރިއަށް ދަނީ (ދައުރު ފޮޓޯ/މުހައްމަދު މުޒައްޔިން ނާޒިމް)
ދުބާއީ ފޯރަމް: ރައީސްގެ ތަސައްވުރު ހަގީގަތަކަށް ހަދައިދޭނެ ގިނަ މަޝްރޫއުތަކެއް
ދުބާއީ - ޔޫއޭއީގެ ވިޔަފާރީގެ މައި މަރުކަޒު، ދުބާއީގެ އެންމެ ހައިބަތު ބޮޑު އަދި ދުނިޔޭގައި ވެސް އަރަބިންގެ ލަގްޒަރީ ރަމްޒު ކަމަށް ބެލެވޭ ބުރިޖު އަލް އަރަބްގައި އިއްޔެ ބޭއްވި ރާއްޖޭގެ އިންވެސްޓާސް ފޯރަމްއަށް ވިޔަފާރިވެރިން ވަދެ ތިބީ އެމީހުންނަށް ހުރި ފުުރުސަތުތައް ބަލައިލާށެވެ. ހަތް ތަރީގެ މި ހޮޓެލްގެ އަލް ފަލަކް ބޯލްރޫމަސް ހޯލަށް 300އެއްހާ ވިޔަފާރިވެރިން ވަނެވެ. އޭގެ ތެރޭގައި ދިވެހި ވިޔަފާރިވެރިން ވެސް ހިމެނެ އެވެ.
މި ފޯރަމްގެ ކުރިން ރާއްޖެއިން ވަނީ މާލީ އިދާރާތަކާ އެކު މަޝްވަރާތައް ބާއްވައިފަ އެވެ. އިގްތިސާދީ ގޮތުން ރާއްޖެ ކޮޅަށް ޖައްސަވަން ރާވާފައި ހުރި ރައީސް މުހައްމަދު މުއިއްޒުގެ އިގްތިސާދީ ފިޔަަވަޅުތަކަށް އައިއެމްއެފްއިން މަރުހަބާ ކިޔަ އެވެ. އިގްތިސާދީ ވަޒީރު މުހައްމަދު ސައީދު ގަބޫލުކުރައްވާ ގޮތުގައި މިއީ ރާއްޖެއަށް އިންވެސްޓްކުރަން އެންމެ ރަނގަޅު ވަގުތެވެ. އިންވެސްޓްމަންޓް ފޯރަމްއާ އެކު 'މި އެޅޭ ބިންގާ'އިން ރާއްޖެއަށް އިގްތިސާދީ ބޮޑު ފުރުސަތުތަކެއް ހުޅުވޭނެކަން އޭނާ ފާހަގަކުރެއްވި އެވެ.
މި ސަރުކާރުން ބާއްވާ މިފަދަ ދެވަނަ ފޯރަމްއަށް ރާއްޖޭގެ ފަރާތުން މައިގަނޑު 18 މަޝްރޫއަކަށް އޮތީ ހުޅުވާލައިފަ އެވެ. މި މަޝްރޫއުތަކަށް އިންވެސްޓަރުން ލިބިއްޖެ ނަމަ، ރައީސް މުއިއްޒުގެ އިގްތިސާދީ ތަސައްވުރު ހަގީގަތަކަށް ހެދުމަށް ސަރުކާރަށް ވަރަށް ބޮޑު އުންމީދެއް ލިބޭނެ އެވެ.
ރާއްޖެއިން ހުޅުވާލި ބައެއް މަޝްރޫއުތަކުގެ ތެރޭގައި ހިމެނެނީ:
-
މައި އެއާޕޯޓް، ވެލާނާ އިންޓަނޭޝަލް އެއާޕޯޓް ތަރައްގީކުރުމުގެ ތިން ވަނަ ފޭސް
-
ރަސް މާލެ ތަރައްގީ ކުރުމުގެ މަޝްރޫއު؛ އޭގެ ތެރޭގައި 65،000 ހައުސިންޔުނިޓް، މަގު ހެދުން ސްޕީޑް ބޯޓުގެ ނިޒާމުން ގުޅުވާލުން، ހޮސްޕިޓަލް ފަދަ ތަންތަން އެޅުން ހިމެނޭ
-
ސްޕެޝަލް އެކޮނޮމިކް ޒޯން (އެސްއީޒެޑް)ގެ ނުވަ ދައިރާއަކުން މަޝްރޫއުތައް ހިންގުން
-
ޑެމެސްޓިކް 15 އެއާޕޯޓު ތަރައްގީކުރުން؛ 2-3 އަހަރު ތެރޭ ނިންމާ ގޮތަށް
-
އިހަވަންދިއްޕޮޅުގައި ގާއިމްކުރާ އިންޓަގްރޭޓެޑް މެރިޓައިމް މަޝްރޫއު
-
މާލެ ސަރަހައްދުން އިތުރު ބިން ހިއްކުމަށް؛ އޭގެ ތެރޭގައި ހިމެނެނީ ގުޅިފަޅުގެ 85 ހެކްޓަރު އަދި ގިރާވަރުގެ 45 ހެކްޓަރު
-
ގިރާވަރު-ތިލަފުށި ލިންކް: ދެ ރަށް ބުރިޖަކުން ގުޅުވާލައި، މަގުތައް ހެދުން
-
ބޯހިޔަވާހިކަމަށް 70،000 ހައުސިން ޔުނިޓް ގާއިމްކުރުން؛ އެއީ، ރަސްމާލޭގައި 30،000 އާއި އުތުރާއި ދެކުނުގައި 40،000
-
ކްރޮސް ސަބްސިޑީ އުސޫލުން ޓޫރިޒަމްއަށް އިތުރު ރަށްތައް ތަރައްގީ ކުރުން
-
ތިލަފުށީގައި ގާއިމްކުރާ ވިޔަފާރި ބަދަރު
-
ތިނަދޫ-ކާޑެއްދޫ ބުރިޖަކުން ގުޅުވާލުން
-
ދަނޑުވެރިކަމާއި މަސްވެރިކަން
ކުރިއަށް އޮތް ދުވަސްތަކުގައި މި ފޯރަމްއިން ނެރުނު ނަތީޖާ ފެންނާނެ ކަމަށް ސަރުކާރުގެ ބައެއް ވެރިން ވިދާޅުވެ އެވެ. މި މަޝްރޫއުތައް ގުޅިފައި ވަނީ ދިވެހި ރައްޔިތުންގެ ކުރިމަގާ އެވެ.