3 ވަޒީރުންނަށް އަލުން ރުހުން ހޯދަން ފޮނުވާފައިވާ މައްސަލަ މަޖިލީހުން ފަސްކޮށްފި

ރައްޔިތުން މަޖިލީހުން ރުހުން ނުދިނުމުން، އަލުން ވަޒީރު ކަމަށް އައްޔަން ކުރެއްވި ތިން ބޭފުޅުންނަށް ރުހުން ހޯދުމަށް ރައީސް މުހައްމަދު މުއިއްޒު މަޖިލީހަށް ފޮނުވި މައްސަލަ އެކަމާ ގުޅޭގޮތުން ހުށަހަޅާފައިވާ ގަރާރުގެ މައްސަލަ ނިމެންދެން ފަސްކުރަން މިއަދު މަޖިލީހުން ނިންމައިފި އެވެ.

ވީ ކިހިނެއް؟ - ރައީސް މުއިއްޒުގެ ފުރަތަމަ ވަޒީރުންގެ މަޖިލީހަށް 22 ވަޒީރަކު އައްޔަންކޮށް، އެ ވަޒީރުންނަށް ރުހުން ހޯދަން މަޖިލީހަށް ފޮނުވުމުން، ރުހުން ލިބިފައިވަނީ 19 ވަޒީރަކަށެވެ.  

މަޖިލީހުން ރުހުން ނުދިން ތިން ވަޒީރުންނަކީ:

މި ވަޒީރުންނަށް މަޖިލީހުން ރުހުން ނުދިން ނަމަވެސް، ހަމަ އެދުވަހު ރައީސް މުއިއްޒު ވަނީ އެ ތިން ވަޒީރުން އަލުން އެ މަގާމުތަކަށް އައްޔަންކުރައްވައިފަ އެވެ. އަދި އެ ވަޒީރުންނަށް ރުހުން ހޯދަން މި މަހުގެ 6 ވަނަ ދުވަހު އަލުން މަޖިލީހަށް ފޮނުވާފަ އެވެ. 

އެއާއެކު، ގަލޮޅު އުތުރު ދާއިރާގެ މެމްބަރު، އަދި މަޖިލީހުގެ ކުރީގެ ނައިބު ރައީސް އީވާ އަބްދުﷲ ވަނީ، މަޖިލީހުގެ ރުހުން ނެތް ވަޒީރުންތަކެއް އަލުން މަގާމަށް އައްޔަންކޮށްފައިވަނީ ގާނޫނާ ހިލާފަށް ކަމަށް ވިދާޅުވެ މިދިޔަ މަހުގެ 31ގައި މަޖިލީހަށް ގަރާރެއް ވެސް ހުށަހަޅުއްވައިފަ އެވެ.

ތަފްސީލް - މިއަދުގެ މަޖިލިސް ފައްޓަވަމުން ރިޔާސަތުން އަންގާ އެންގުމެއްގެ ގޮތުގައި މަޖިލީހުގެ ރައީސް މުހައްމަދު އަސްލަމް ވިދާޅުވީ، ރުހުން ނުދިން ތިން ވަޒީރުނަށް ރުހުން ހޯދަމަށް އަލުން މަޖިލީހަށް ހުށަހަޅާފައިވީ ނަމަވެސް، އެކަމާ ގުޅޭގޮތުން މަޖިލީހަށް ގަރާރެއް ހުށަހެޅިފައިވާތީ، ރުހުން ހޯދަން ހުށަހަޅާފައިވާ މައްސަލާގައި ކަންކުރާނެ ގޮތެއް ނިންމާނީ އެ ގަރާރުގެ މައްސަލަ ނިމުމުން ކަމަށެވެ.

"މި މައްސަލައާމެދު [ވަޒީރުންނަށް ރުހުން ހޯދަން އަލުން ފޮނުވި]، މަޖިލީހުން އަމަލުކުރަން ފެންނަ ގޮތެއް އެ ގަރާރު ފާސްވުމުން އެނގިގެންދާނެ ކަމަށް އަޅުގަނޑު ގަބޫލުކުރަން. އެހެންކަމުން އަޅުގަނޑު ގަސްތުކުރަނީ މިދެންނެވި ގަރާރުގެ މަސައްކަތްނިމި މަޖިލީހުން ވަކި ގޮތެއް ކަނޑައަޅުއްވަންދެން މަޖިލީހުގެ ރުހުން ލިބިފައިނުވާ ތިން ވަޒީރުންނަށް އަލުން ރުހުން ހޯއްދެވުމަށް ރައީސް ފޮނުވާފައިވާ މައްސަލަ ތާވަލުކުރުން ފަސްކުރުމަށް،" އަސްލަމް ވިދާޅުވި އެވެ.

އަސްލަމް ވިދާޅުވި ގޮތުން، ރުހުން ނުދޭ ވަޒީރުންނަށް އަލުން ރުހުން ހޯދުމަށް ފޮނުވާ އެފަދަ މައްސަލަތަކުގައި މީގެ ކުރިން މަޖިލީހުން އަމަލުކޮށްފައިވާ ގޮތަށް ބަލާއިރު، މަޖިލީހުގެ ރުހުން ނެތި ދެވަނަ ފަހަރަށް އެ މަގާމަށް އައްޔަންކޮށް، ރުހުން ހޯދަން ފޮނުވި ނަމަވެސް، މަޖިލީހުން ރުހުން ދީފައެއް ނުވެ އެވެ.

އަސްލަމް އެ އިޝާރާތްކުރެއްވީ، ރައީސް މުހައްމަދު ނަޝީދުގެ ވެރިކަމުގައި، 12 އޮގަސްޓް 2010ގައި، އެ މަނިކުފާނުގެ ކެބިނެޓަށް ބަންޑާރަ ނައިބުގެ ގޮތުގައި ފުރަތަމަ އައްޔަން ކުރެއްވި ޑރ. އަހްމަދު އަލީ ސައީދު، ހ.ސީސައިޑް، އަށް މަޖިލީހުން ރުހުން ނުދިން މައްސަލަ އެވެ. އޭނާއަށް ވެސް މަޖިލީހުން ރުހުން ނުލިބުމުން ދެވަނަ ފަހަރަށް ހަމަ އެ މަގާމަށް އައްޔަންކުރައްވައި، ނަޝީދު ވަނީ ރުހުން ހޯދަން މަޖިލީހަށް ފޮނުއްވައިފަ އެވެ. ނަމަވެސް، މަޖިލީހުން އޭނާއަށް ދެފަހަރުގެ މަތިން ވެސް ރުހުން ދީފައެއް ނުވެ އެވެ. އަދި، ފަހުން ނަޝީދު ވަނީ އެ މަގާމަށް އެހެން ބޭފުޅަކު އައްޔަންކޮށް ރުހުން ހޯއްދަވައިފަ އެވެ. 

އެނގުން މުހިންމު - ގާނޫނުއަސާސީ ބުނާ ގޮތުން ކެބިނެޓްގައި ހިމެނޭ ވަޒީރުންނަށް ރައްޔިތުންގެ މަޖިލިހުގެ ރުހުން އޮންނަން ޖެހޭނެ އެވެ. އެ ރުހުން ނެތި ދާއިމީ ގޮތެއްގައި ކެބިނެޓްގައި އެއްވެސް ވަޒީރަކަށް ނުތިއްބެވޭނެ ކަމަށް، ސުޕްރީމް ކޯޓުން 2010ގައި ކުރި ހުކުމެއްގައި ކަނޑައަޅާފައިވެ އެވެ.

ފާހަގަކޮށްލެވޭ ކަމެއް - މަޖިލީހުގައި މިވަގުތު ކުރިއަށް ދަނީ، މަޖިލީހުގެ ރުހުން ނެތް ވަޒީރުން އަލުން މަގާމުތަކަށް އައްޔަންކުރެއްވުމާ ގުޅިގެން އީވާ ހުށަހެޅުއްވި ގަރާރުގެ އިބްތިދާއީ ބަހުސް އެވެ. އީވާގެ ގަރާރުގައި ވަނީ، މަގާމުތަކަށް އަލުން ތިން ވަޒީރުން އައްޔަން ކުރެއްވި ކުރެއްވުމާ މެދު ވިސްނާވަޑައިގަތުމަށާއި ގާނޫނު އަސާސީއަށް އިހުތިރާމުކުރައްވައި، ގާނޫނު އަސާސީއާ އެއްގޮތަށް އަމަލުކުރެއްވުމަށް ރައީސް މުއިއްޒަށް ގޮވާލައްވައިފަ އެވެ.

އަދި، މަޖިލީހުން ރުހުން ނުދޭ އެއްވެސް ވަޒީރަކަށް މަގާމުގައި ނުހުރެވޭނެ ކަމަށް ބަޔާންކުރާ ސުޕްރީމް ކޯޓުގެ ހުކުމެއް އޮއްވައި ރައީސް ނިންމެވި ނިންމެވުމަކީ މަޖިލީހުގެ ގާނޫނީ ބާރުވެރިކަމަށް ކަނޑައެޅިގެން ގޮންޖައްސަވައި ގާނޫނު އަސާސީ އާއި ގާނޫނާ ހިލާފަށް ނިންމެވި ނިންމެވުމެއް ކަމަށް އެ ގަރާރުގައިވެ އެވެ.