ކާށިދޫ ދާއިރާގެ އެމްޑީޕީ ޓިކެޓު އަބްދުﷲ ނަސީރަށް

އެމްޑީޕީގެ ކާށިދޫ ދާއިރާގެ މަޖިލިސް ޓިކެޓު އަބްދުﷲ ނަސީރަށް ދީފި އެވެ.

ވީ ކިހިނެއް؟ - އެ ޕާޓީގެ ޓިކެޓުގައި ވާދަކުރައްވަން އެންމެ ފުރަތަމަ ޓިކެޓު ކަށަވަރު ކުރެއްވީ މިހާރު ވެސް އެ ދާއިރާގެ މެންބަރު އަބްދުﷲ ޖާބިރެވެ.

ނަމަވެސް ޖާބިރުގެ އަހުލާގީ މައްސަލަތަކެއްގައި އޭނާ ވަނީ ޕާޓީން ވަކިކޮށްފަ އެވެ.

ތަފްސީލް - ކާށިދޫ ދާއިރާގެ ޓިކެޓު ނަސީރަށް ދީފައިވާކަން އެމްޑީޕީގެ ޑެޕިޔުޓީ ޗެއާޕާސަން އިބްރާހިމް ވަހީދު 'ދައުރު' އަށް ކަށަވަރުކޮށްދެއްވި އެވެ.

ގާނޫނީ ވަކީލުކަން ވެސް ކުރައްވާ ނަސީރު މިހާރު ހުންނެވީ ހައްޖު ކޯޕަރޭޝަންގެ ބޯޑުގެ ޗެއާމަންގެ މަގާމުގަ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އޭނާ ވަނީ ރައީސް އޮފީހުގެ ލީގަލް ޑިޕާޓުމެންޓުގައި ވެސް މަސައްކަތް ކުރައްވައިފަ އެވެ.

ޖާބިރަށް އެމްޑީޕީގެ ފިޔަވަޅު އަޅާ ކޮމެޓީން އެޅި ފިޔަވަޅު އޭނާ ވަނީ އިސްތިއުނާފުކުރައްވައިފަ އެވެ. ނަމަވެސް އެއީ އެ ނިންމުން ބާތިލްވާނެ ކަމެއް ނޫން ކަމަށް އިބްރާހިމް ވަހީދު ވިދާޅުވި އެވެ.

އޭނާ ވިދާޅުވީ ކާށިދޫ ދާއިރާގެ ޓިކެޓާ މެދު ގޮތެއް ނިންމުން ފަސްކުރަން އިސްތިއުނާފު ކޮމެޓީން އަންގާފައި ނުވާ ކަމަށެވެ.