ތިން ދުވަސްވިއިރު ވެސް ދޯނިތަކަށް ސިފައިން އެރި މައްސަލާގައި އިންޑިއާއިން ޖަވާބެއް ނުދޭ

އިންޑިއާގެ ކޯސްޓްގާޑް އުޅަނދުތަކުން ރާއްޖޭގެ އިގްތިސާދީ ސަރަހައްދަށް ވެދެ، ދިވެހި މަސްދޯނިތަކަށް އެރި މައްސަލައިގެ ތަފްސީލު ހޯދުމަށް ދިވެހި ސަރުކާރުން އެދުނުތާ ތިން ދުވަސްވީއިރު ވެސް އިންޑިއާ ސަރުކާރުން އެކަމަށް ޖަވާބުދާރީވެފައި ނުވާކަން އެނގިއްޖެ އެވެ.

ވީ ކިހިނެއް؟ - މިދިޔަ ބުދަ ދުވަހު އިންޑިއާގެ ކޯސްޓްގާޑުގެ ދެ އުޅަނދަކުން ރާއްޖޭގެ ކަނޑުގެ ސަރަހައްދުގެ އެންމެ އުތުރުގައި މަސްވެރިކަން ކުރަމުދިޔަ ތިން މަސް ދޯންޏަކަށް ވަނީ ހަތިޔާރާ އެކު އެ އުޅަނދުތަށް އަރައި، ބަލައި ފާސްކޮށްފަ އެވެ. އެއާ އެކު ޖެހިގެން އައި ދުވަހު ދިވެހި ސަރުކާރުން ވަނީ، އެ އަމަލު ހިންގަން ޖެހުނު ސަބަބު ބުނެދިނުމަށް އެދި އެ ގައުމުގެ ސަރުކާރުގައި އެދިފަ އެެވެ.

ތަފްސީލު - ޑިފެންސް މިނިސްޓްރީން މިކަމާ ގުޅިގެން ހުކުރު ދުވަހު ނެރުނު ބަޔާނުގައި ދިވެހި ތިން މަސްދޯނި ރާއްޖޭގެ އިގްތިސާދީ ސަރަހައްދުގައި ހަރަކާތްތެރިވަމުންދަނިކޮށް، މި ސަރަހައްދަށް އިންޑިއާގެ ދެ ކޯސްޓްގާޑް އުޅަނދަކުން ވަދެ، އެ ދޯނިތަކަށް އަރާފައި ވަނީ  ސަރުކާރަށް އެންގުމެއްނެތި، ބައިނަލްއަގުވާމީ ގާނޫނާ ހިލާފަށް ކަމަށެވެ. އަދި އެކަން ކުރި ސަބަބު ހޯދުމަށް ރާއްޖޭގެ ފޮރިން މިނިސްޓްރީ މެދުވެރިކޮށް، އިންޑިއާ ސަރުކާރުގައި ރަސްމީކޮށް އެދިފައިވާ ކަމަށެވެ.

ނަމަވެސް ސަރުކާރުގެ އޮފިޝަލަކު މިއަދު 'ދައުރު'އަށް ކަށަވަރުކޮށްދިން ގޮތުގައި މިއަދާ ހަމައަށް ވެސް އެކަމުގައި އިންޑިއާއިން ޖަވާބުދާރީވެފައި ނުވެ އެވެ.

ފާހަގަކޮށްލެވޭ ކަމެއް - ބުދަ ދުވަހު ތިން ދޯންޏަށް އެރި ފަހުން، ބުރާސްފަތި ދުވަހުގެރޭ ވެސް ދިވެހި މަސްދޯންޏަކަށް އިންޑިއާގެ ގޯސްޓަގާޑުން އެރި މައްސަލައެއް އިއްޔެވެސް ވަނީ ފެންމަތިވެފަ އެވެ. މި ހަތަރު ފަހަރު ވެސް އިންޑިއާ ކޯސްޓްގާޑުން އެ ދޯނިތަކަށް އަރާފައި ވަނީ ހަތިޔާރާއެކު އެވެ. މިކަމާ ގުޅިގެން އާންމުން ވެސް ދަނީ ކަންބޮޑުވުން ފާޅު ކުރަމުންެވެ.