ވީޑިއޯ: އިންޑިއާ ސިފައިން ހަތިޔާރާ އެކު ދިވެހި މަސްދޯންޏަކަށް އަރާ

މިދިޔަ ބުދަދުވަހު އިންޑިއާ ސިފައިން ދިވެހި މަސްދޯންޏަށް އަރާ ތިބި ވީޑިއޯ، ބޮޑު ކަންނެލި މަސްވެރިންގެ ޔޫނިއަންއިން މިއަދު އާންމުކޮށްފި އެވެ.

ވީ ކިހިނެއް؟ - ރާއްޖޭގެ އިގްތިސާދީ ސަރަހައްދުގައި މަސްވެރިކަން ކުރަމުން އައި ތިން ދޯންޏަކަށް އިންޑިއާ ސިފައިން އެރި މައްސަލައެއް ފެންމަތިވީ މިދިޔަ ބުދަ ދުވަހު ހަވީރުގެ ވަގުތެއްގަ އެވެ. އެއާއެކު ދިވެހި ކޯސްޓް ގާޑުން ވެސް އެ ސަރަހައްދަށް ދިޔަ އެވެ.

ތަފްސީލު - މިއަދު އާންމު ކުރި ވީޑިއޯތަކަކުން ފެންނަ ގޮތުގައި އިންޑިއާ ސިފައިން އަރާ ތިބި ދޯނި ކައިރީގައި އިތުރު ދެ ދިވެހި މަސް ދޯނި ވެސް އޮތެވެ. އަދި ހަމަ އެ ސަރަހައްދުގައި އިންޑިއާ ސިފައިންގެ ކޯސްޓް ގާޑުގެ ދެ އުޅަނދު ވެސް ހަރަކާތްތެރިވަމުން ދިޔަތަން ފެނެ އެވެ.

ދޯނީގެ މަތީގައި ހަދާފައި ހުންނަ ގެގަނޑުމަތީގައި ޔުނީފޯމްގައި ތިބި ދެ ސިފައިންގެ މީހަކު އެއް ވީޑިއޯއިން ފެންނަ އިރު، އޭގެ ތެރެއިން އެކަކު ހުރީ ކޮނޑުގައި ބަޑި އަޅުވައިގެންނެވެ. އަނެކަކު އަތުގައި އޮތީ ވޯކީޓޯކީއެކެވެ.

ވީޑިއޯ ކުރަމުންދިޔަ ދިވެހި މަސްވެރިޔާ ވާހަކަ ދައްކާ އަޑު ވެސް އިނގެ އެވެ.

"މިތިބީ އެމީހުން [އިންޑިއާ ސިފައިން] ހުރިހާ އެންމެން [މަސްވެރިން] އެތިބީ ދޯނީގެ އެންމެ ފަހަތަަށް ގެންގޮސްފައި،" 16 ސިކުންތު އެ ވީޑިއޯގައި އޭނާ ބުނާ އަޑުއިވެ އެވެ.

އެއް ވީޑިއޯއިން ފެންނަ ގޮތުގައި:

ފާހަގަކޮށްލެވޭ - އިންޑިއާ ސިފައިން ރާއްޖޭގެ އިގްތިސާދީ ސަރަހައްދަށް ވަދެ، ދިވެހި މަސް ދޯނިތަކަށް މިގޮތަށް އެރުމުން މަސްވެރިންނާއި އާންމުން ވެސް ވަނީ ކަންބޮޑުވުން ފާޅުކޮށްފަ އެވެ. އެކަމަކު ދިވެހި މަސްދޯނިތަކަށް އަރާފައި ވަނީ ސީދާ އިންޑިއާ ސިފައިން ކަމަކަށް އެމްއެންޑީއެފްއިން ބުނެފައެއް ނުވެ އެވެ. ސަލާމަތީ ބާރުން ބުނީ ބޭރުގެ އަސްކަރީ ބަޔަކު ދިވެހި މަސްދޯންޏަކަށް އެރިކަމުގެ ރިޕޯޓް ލިބިގެން ހަރަކާތްތެރިވާ ކަމަށެވެ.