އަސުރުމާ 3 މަސްދޯނި (ފޮޓޯ/މަސްވެރިން)
ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަނިކޮށް ދިވެހި މަސްދޯންޏަކަށް އިންޑިއާ ސިފައިން އަރައިފި
ރާއްޖޭގެ ހާއްސަ އިގްތިސޯދީ ސަރަހައްދުގައި މަސްވެރިކަން ކުރަން އުޅުނު ދިވެހި މަސްދޯންޏަކަށް ބޭރުގެ އަސްކަރީ އުޅަނދެއްގެ ބޯޑިން ޓީމަކުން މިއަދު އަރާފައިވާކަމުގެ މައުލޫމާތު ލިބިގެން އެމްއެންޑީއެފް އިން އެކަން ބަލަން ފަށައިފި އެވެ.
އެކަމަކު 'ދައުރު'އަށް އެނގިފައިވާ ގޮތުގައި އެ ދޯނިން މިހާރު ވަނީ އިންޑިއާ ސިފައިން ފައިބައިފަ އެވެ.
ވީ ކިހިނެއް؟ - ރާއްޖޭގެ އީއީޒެޑްގައި މަސްވެރިކަން ކުރަން އުޅުނު އދ. މަހިބަދުއަށް ނިސްބަތްވާ އަސުރުމާ-3 ދޯންޏަށް އިންޑިއާގެ މަނަވަރެއް ކައިރިކޮށް އެ ދޯންޏަށް ސިފައިން އެރި ކަމަށް އެންމެ ފުރަތަމަ ބުނީ ބޮޑުކަންނެލި މަސްވެރިންގެ ޔޫނިއަންއިންނެވެ.
ރާއްޖޭގެ ކަނޑުގެ ސަރަހަްދުގައި މަސްވެރިކަން ކުރަމުންދިޔަ އ.ދ މަހިބަދޫ އަސުރުމާ3 ދޯންޏަށް މިވަގުތު އިންޑިއާގެ މަނަވަރެއް ކައިރިކޮށް ދޯންޏަށް ސިފައިން އަރައިފިކަމަށް މައުލޫމާތު ލިބިއްޖެ.މިކަން އެއްމެ ހަރުކަށި އިބާރާތުން ކުށްވެރިކުރަން!މިކަން ބަލައިދެއްވާ! @MFORmv @MNDF_mv pic.twitter.com/bStJ9EtEwC
— Bodu Kanneli Masveringe union- BKMU (@FishermensUnion) January 31, 2024
ތަފްސީލް - އެކަމާ ގުޅޭ ގޮތުން އެމްއެންޑީއެފް އިން މީޑިއާތަކަށް ފޮނުވި މެސެޖެއްގައި ބުނީ އެ ސަރަހައްދަށް އެމްއެންޑީއެފްގެ ކޯސްޓް ގާޑު އުޅަނދެއް ދަތުރު ކުރަމުން އަންނަ ކަމަށެވެ. ދޯންޏަށް އެރީ އިންޑިއާ ސިފައިން ކަން ސީދާ ނުބުނެ، އެމްއެންޑީއެފްއިން ބުނީ "ބޭރުގެ އަސްކަރިއްޔާއަކަށް ނިސްބަތްވާ އުޅަނދެއްގެ ބޯޑިން ޓީމަކުން މަސްދޯންޏަށް އަރާފައިވާކަމުގެ ރިޕޯޓެއް ލިބިފައިވާ" ކަމަށެވެ.
ދިވެހިރާއްޖޭގެ ޚާއްޞަ އިޤްތިޞާދީ ސަރަހައްދުގައި ވަނިކޮށް ދިވެހި މަަސްދޯންޏަަކަށް ބޭރުގެ ޢަސްކަރިއްޔާއަކަށް ނިސްބަތްވާ އުޅަނދެއްގެ ބޯޑިން ޓީމަކުން މަސްދޯންޏަށް އަރާފައިވާކަމުގެ ރިޕޯޓެއް ލިބިފައިވާތީ އެކަން އެމްއެންޑީއެފްއިން ބަލަމުންގެންދާކަމުގައި ދަންނަވަން.
— Maldives National Defence Force (@MNDF_Official) January 31, 2024
ބޮޑުކަންނެލި މަސްވެރިންގެ ޔޫނިއަންގެ ރައީސް ހުސެން ނަޝީދު 'ދައުރު' އަށް ވިދާޅުވީ އަސުރުމާ-3 ދޯންޏާ ސެޓްލައިޓު މެދުވެރިކޮށް ގުޅި ކަމަށާއި އެ ދޯނި އޮތް ޕޮޒިޝަން ނަންބަރަކީ ރާއްޖޭގެ އީއީޒެޑްގައި ހިމެނޭ ސަރަހައްދެއް ކަމަށެވެ.
ދޯނީގެ ކެޔޮޅާ ހަވަލާދީ އޭނާ އިތުރަށް ވިދާޅުވީ އިންޑިއާ ސިފައިންގެ މަނަވަރު އެންމެ ފުރަތަމަ ދޯނި މަތިން ހެލިކޮޕްޓަރު އުދުއްސީ ކަމަށާއި އޭގެ ފަހުން މަނަވަރު ދޯންޏާ ކައިރިކޮށް ހަތިޔާރާ އެކު ސިފައިން އެރީ ކަމަށެވެ.
"އަދިިވެސް އެމީހުން [އިންޑިއާ ސިފައިން] ތިބީ ދޯނީގައި،" ނަޝީދު ވިދާޅުވި އެވެ.
މަސްދޯނީގައި ތިބި މީހުންނާ އިންޑިއާ ސިފައިން ކުރަނީ ކޮން ސުވާލެއްކަމެއް އަދި ދައްކަނީ ކޮން ވާހަކައެއްކަމެއް ސާފު ނުވާ ކަމަށް ވެސް އޭނާ ވިދާޅުވި އެވެ.
"ކަންބޮޑުވުމަކީ ދިވެހި މަސްވެރިން ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަނިކޮށް ބޭރުގެ ހަތިޔާރު އެޅި ސިފައިންގެ ބަޔަކު ދިވެހި މަސްދޯންޏަކަށް އެރުން. މިއީ ބިރުވެރި ކަމެއް. ބޭރު ކަނޑަށް ނުކުމެ، މަސްވެރިކަން ކުރަން މަސްވެރިން ޖެހިލުންވާނެ ކަމެއް،" ނަޝީދު ވިދާޅުވި އެވެ.
ކޮމެންޓް (4)
ރާގިބުއީސާ
މޫރޭ
މުހައްމާ
ޢާރިފް