ވެރިކަމުގެ ހުވާކުރުމުގެ ރަސްމިޔާތުގައި ރައީސް މުއިއްޒުއާ، މެމްބަރު އީވާ ސަލާން ކުރައްވަނީ(ފޮޓޯ/ރައީސް އޮފީސް)
މަޖިލީހުގެ ރުހުންނެތި 3 ވަޒީރުން އަލުން މަގާމަށް އައްޔަނުކުރި މައްސަލާގައި މަޖިލީހަށް ގަރާރެއް
ރައްޔިތުންގެ މަޖިލީހުން ރުހުން ނުދިން ތިން ވަޒީރުން އަލުން އެ މަގާމުތަކަށް އައްޔަނުކުރިކުރުމާ މެދު އަލުން ވިސްނާވަޑައިގަތުމަށް ރައީސް މުހައްމަދު މުއިއްޒަށް ގޮވާލައްވާ، މަޖިލީހުގެ ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ކުރީގެ ނާއިބު ރައީސް އީވާ އަބްދުﷲ މަޖިލީހަށް ގަރާރެއް ހުށަހަޅުއްވައިފި އެވެ.
ވީ ކިހިނެއް؟ - ރައީސް މުއިއްޒުގެ ފުރަތަމަ ކެބިނެޓަށް 22 ވަޒީރަކު އައްޔަނުކުރައްވާ އެ ވަޒީރުންނަށް ރުހުން ހޯދުމަށް މަޖިލީހަށް ފޮނުވުމުން ތިން ވަޒީރަކަށް ފިޔަވައި ހުރިހާ ވަޒީރުންނަށް ވަނީ ރުހުންދީފަ އެވެ.
މަޖިލީހުން ރުހުން ނުދިން ވަޒީރުންނަކީ:
-
ބަންޑާރަ ނައިބު އަހުމަދު އުޝާމް
-
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު
-
ހައުސިން މިނިސްޓަރު ޑރ. އަލީ ހައިދަރު
ގާނޫނުއަސާސީ ބުނާ ގޮތުން ކެބިނެޓްގައި ހިމެނޭ ވަޒީރުންނަށް ރައްޔިތުންގެ މަޖިލިހުގެ ރުހުން އޮންނަން ޖެހޭނެ އެވެ. އެ ރުހުން ނެތި ދާއިމީ ގޮތެއްގައި ކެބިނެޓްގައި އެއްވެސް ވަޒީރަކަށް ނުތިއްބެވޭނެ ކަމަށް، ސުޕްރީމް ކޯޓުން 2010ގައި ކުރި ހުކުމެއްގައި ކަނޑައަޅާފައިވެ އެވެ.
ނަމަވެސް، ހަމަ އެރޭ ރައީސް އޮފީހުގައި އޮތް ރަސްމިއްޔާތެއްގައި ވަނީ، މަޖިލީހުން ރުހުން ނުދިން ތިން ވަޒީރުން މަގާމުތަކަށް އަލުން އައްޔަންކުރައްވައި، ފަތްކޮޅު އަރުވައިފަ އެވެ.
އެކަމާމެދު އަލުން ވިސްނާވަޑައިގަތުމަށް ރައީސް އަށް ގޮވާލައްވާ އީވާ މިއަދު ހުށަހަޅުއްވާފައިވާ ގަރާރުގައި ވަނީ، ގާނޫނު އަސާސީއަށް އިހުތިރާމުކުރައްވައި، ގާނޫނު އަސާސީއާ އެއްގޮތަށް އަމަލުކުރެއްވުމަށް ވެސް ރައީސް އަށް ގޮވާލާފަ އެވެ.
ބުނީ ކީކޭ؟ - މަޖިލީހުގެ ނައިބު ރައީސްކަން ވެސް ކުރައްވާފައިވާ އީވާ ހުށަހަޅާފައިވާ އެ ގަރާރުގައި ބުނެފައިވަނީ އެކަމަކީ، ސަރުކާރަށް ރައްޔިތުން ކުރާ އިތުބާރުނެތިގެންދާނެ ފަދަ އުނދަގޫ ހާލަތަކަށް ހިިނގައިދާނެ ކަމެއް ކަމަށެވެ.
ބަޔާނުގައި އިތުރަށް ބުނެފައިވަނީ:
-
ރައީސްގެ އެ ނިންމެވުމަކީ ގާނޫނު އަސާސީގެ70ވަނަ މާއްދާގެ (ބ) އިން މީހަކު މަގާމަށް އިސްކުރުމަށްޓަކައި ނުވަތަ ވަކިކުރުމަށްޓަކައި އެކަން ފާސްކުރުމަށް މަޖިލީހަށް ހުށަހަޅައިފިނަމަ، އެ ހުށަހެޅުމެއް ފާސްކުރުމާ ނުކުރުމަށް މަޖިލީހަށް ލިބިދީފައިވާ ބާރު ކާނޑުވާލާ ކަމެއް
-
އަދި އެއީ ގާނޫނު އަސާސީން މަޖިލީހުގެ މައްޗަށް މަތިކޮށްފައިވާ ވެރިކަން ހިންގުމުގެ ބާރުގެ ފަރާތުން ކުރާ ކަންތައް ހިނގާ ނުހިނގާ ގޮތް ބެލުމާ ޖަވާބުދާރީ ކުރުވުމަށް މަޖިލީހަށް ދީފައިވާ ބާރު ކަނޑުވާލުން
-
ރައީސްގެ އެ ނިންމެވުމަކީ މަޖިލީހަށް މަތިކޮށްފައިވާ ޒިންމާއާއި ޑިމޮކްރެޓިކް ހަމަތަކާއި ބައިނަލްއަގުވާމީ އުސޫލުތަކާ ހިލާފު ނިންމުމެއް
-
މަޖިލީހުން ރުހުން ނުދޭ އެއްވެސް ވަޒީރަކަށް މަގާމުގައި ނުހުރެވޭނެ ކަމަށް ބަޔާންކުރާ ސްޕްރީމް ކޯޓުގެ ހުކުމެއް އޮއްވައި ރައީސް ނިންމެވި ނިންމެވުމަކީ މަޖިލީހުގެ ގާނޫނީ ބާރުވެރިކަމަށް ކަނޑައެޅިގެން ގޮންޖައްސަވައި ގާނޫނު އަސާސީއާ ގާނޫނާ ހިލާފު ނިންމުމެއް
އެނގުން މުހިންމު - މަޖިލީހުން ރުހުން ނުދޭން ނިންމި ވަޒީރުންނަށް ވޯޓު ލިބިފައިވާ ގޮތް:
-
އުޝާމް - ރުހުން ދޭން ނުފެންނަ ކަމަށް 44 މެންބަރުން ވޯޓު ދެއްވި؛ ފެންނަ ކަމަށް ވޯޓު ދެއްވީ 24 މެންބަރުން
-
ޝަހީމް - ރުހުން ދޭން ނުފެންނަ ކަމަށް 31 މެންބަރުން ވޯޓު ދެއްވި އިރު، ފެންނަ ކަމަށް ވޯޓު ދެއްވީ 30 މެންބަރުން؛ 8 މެމްބަރަކު ވަކި ކޮޅަކަށް ވޯޓު ނުދެއްވާ
-
ހައިދަރު - ރުހުން ދޭން ނުފެންނަ ކަމަށް 46 މެންބަރުން ވޯޓު ދެއްވި؛ ފެންނަ ކަމަށް ވޯޓު ދެއްވީ 24 މެންބަރުން
ގުޅުންހުރި ކަމެއް - ރައީސް މުއިއްޒު މަގާމުން ވަކިކުރުމުގެ މައްސަލައެއް މަޖިލީހަށް ހުށަހެޅުމަށް ވެސް އިދިކޮޅުން ވަނީ މަސައްކަތް ފަށާފަ އެވެ. އެކަމަށް ބޭނުންވާ ސޮއި ހަމަކޮށް އެ ގަރާރު ހުށަހަޅަން ތައްޔާރުވެފައިވާ ކަމަށް އެމްޑީޕީން ވަނީ މީގެ ކުރިން ބުނެފަ އެވެ.
