މާލޭ މަގުމަތިން ހޮވި ކަންޒު ކަހަނބު: މީތި މިހާރު ވަނީ ކާށިދޫ ޗަސްބިމަށް ދޫކޮށްލާފައި
މާލޭ މަގުމަތިން ފެނުނު ކަންޒު ކަހަނބެއްގެ އަސްލު މަންޒިލަކަށްވީ ކާށިދޫ ޗަސްބިން
މާލޭގެ މަގުމަތިން ހޮވި ކަންޒު ކަހަނބެއް، އެންވަރަމެންޓް ޕްރޮޓެކްޝަން އެޖެންސީ (އީޕީއޭ) އިން ކ. ކާށިދޫ ޗަސްބިމަށް ދޫކޮށްލައިފި އެވެ.
ވީ ކިހިނެއް؟ - ދިރޭ ތަކެތި ހިމާޔަތް ކުރުމުގެ ގާނޫނުގެ ދަށުން ރައްކާތެރިކަން ލިބިފައިވާ މި ފަދަ ކަންޒު ކަހަނބަކީ ރާއްޖޭން ވަރަށް މަދުން ނޫނީ ނުފެންނަ ބާވަތެކެވެ.
އީޕީއޭ އިން މިއަދު އެކްސްގައި ކުރި ޕޯސްޓެއްގައި ބުނީ، ކާށިދުއަށް ފޮނުވާލީ މި ހަފުތާ ކުރީކޮޅު މާލޭ މަގުމަތިން ފެނިގެން މީހަކު ރިޕޯޓު ކުރި ކަންޒު ކަހަނބެއް ކަމަށެވެ. ފޮނުވާލުމުގެ ކުރިން އާއިލާއަކުން ދުވަސްކޮޅެއް ވާންދެން އެ ބެލެހެއްޓި އެވެ.
ތަފްސީލު - ކަޅުކުލައިގެ މި ފަދަ ކަންޒު ކަހަނބުގެ އެންމެ ބޮޑު އާބާދީއެއް އޮންނަނީ ވެސް ކާށިދޫ ޗަސްބިމުގަ އެވެ. އެގޮތުން:
-
އެ ތަނަކީ 2021 ވަނަ އަހަރުން ފެށިގެން ހިމާޔަތްކޮށްފައި އޮންނަ ސަރަހައްދެއް
-
އެ ތަނުގައި ކަނޑޫފަލާއި ކުށްޅަވައްފަލުގެ އިތުރުން ކަށިކޭލާއި ރުކުގެ މުއްސަނދިކަން ލިބިފައިވޭ. އަދި ގިނަ އަދަދަކަށް ކަނބިލި ވެސް އުޅޭ
-
ކަންޒު ކަހަނބުގެ މައިގަނޑު ކާނާ ކަމަށްވާ ކަށިކޭލާއި ބޯކޭލާއި ކުއްޅަވައް އަދި މާރުނަ ވިނަ ވެސް މި ސަރަހައްދުގައި ގިނައިން ހުރޭ
އީޕީއޭ އިން ވަނީ، ކަންޒު ކަހަނބު އޮޅުކޮށްގެން އުޅޭ ފަރާތްތަކުން، އެތަކެތި އެ އެޖެންސީއާ ހަވާލުކުރުމަށް އިލްތިމާސްކޮށްފަ އެވެ. އަދި އެ ފަދަ ޖަނަވާރެއް މަގުމަތިން ފެނިއްޖެ ނަމަ، 7980379 ނަމްބަރަށް ރިޕޯޓު ކުރުމަށް ވެސ އެ ތަނުން އެދެ އެވެ.
ކޮމެންޓް (1)
ޓނ އަދުރޭ