ހުޅުމާލެ ފޭސް އެކެއް އަދި ފޭސް ދޭއް މަތިން ފެންނަ ފޮޓޯއެއް. (ދައުރު ފޮޓޯ/ މުޒައްޔިން ނާޒިމް)
އާބަންކޯއިން 5 ކަމެއް ކުރުން އޭސީސީއިން މަނާކޮށްފި
މި ހިނގާ އިންތިގާލީ މަރުހަލާގައި ބިން ވިއްކުމާއި ކުއްޔަށް ދިނުން ހިމެނޭ ގޮތަށް އާބަންކޯއިން ފަސް ކަމެއް ނުކުރުމަށް އެންޓި ކޮރަޕްޝަން ކޮމިޝަން (އޭސީސީ)އިން އިއްޔެ އެ ކުންފުންޏަށް އަންގައިފި އެވެ.
ވީ ކިހިނެއް؟ - އެކަމާ ގުޅޭގޮތުން އޭސީސީއިން އާބަންކޯއަށް އިއްޔެ ފޮނުވި ސިޓީއެއްގެ ކޮޕީއެއް މިއަދު ސޯޝަލް މީޑިއާގައި ވަނީ އާންމުވެފަ އެވެ.
ތަފްސީލު - އޭސީސީގެ މެމްބަރު ޝަޒުނާ ހާޝިމް ސޮއިކުރައްވައި އާބަންކޯގެ މެނޭޖިން ޑިރެކްޓަރު އަހްމަދު އާތިފަށް އެޑްރެސްކޮށް ފޮނުއްވެވި އެ ސިޓީގައި އަންގާފައިވަނީ، އާބަންކޯއާ ގުޅޭގޮތުން އެ ކޮމިޝަނުން ބަލަމުންދާ މައްސަލައަކާ ގުޅިގެން، ވަގުތީ ގޮތުން ފަސް ކަމެއް ކުރުން މަޑުޖައްސާލުމަށެވެ.
އޭގެ ތެރޭގައި ހިމެނެނީ:
-
1-
ބޭރުގެ ފަރާތްތަކަށް ހުޅުމާލެއިން ބިން ދިނުމާ ގުޅޭ ކަންކަން
-
2-
އީއޯއައި ހުށަހަޅައިގެން ކުރިއަށް ގެންދިއުމަށް ރާވާފައިވާ ކަންކަން
-
3-
ދިގު މުއްދަތަކަށް ބިން ކުއްޔަށް ދިނުމާއި ބިން ވިއްކުމާ ގުޅޭ މުއާމަލާތްތައް
-
4-
ޖޮއިންޓް ވެންޗާ އުސޫލުން ކުރިއަށްގެންދާ ކަންކަން
-
5-
މަޝްރޫއުތަކާ ގުޅޭ އެއްބަސްވުންތަކުގައި ސޮއިކުރުން
އެ ސިޓީގެ ސައްހަކަން ކަށަވަރުކޮށް ނުދެއްވި ނަމަވެސް، އެ ފަސް ކަން ނުކުރުމަށް އާބަންކޯއަށް އެންގިކަން އޭސީސީގެ މީޑިއާ އޮފިޝަލަކު ވަނީ 'ދައުރު'އަށް ކަށަވަރު ކޮށްދެއްވާފަ އެވެ.
ގުޅުންހުރި ކަމެއް - އިންތިހާބީ ރައީސް ޑރ. މުހައްމަދު މުއިއްޒު އަންނަ މަހުގެ 17ގައި ރައީސް ކަމުގެ ހުވާކުރެއްވުމާ ހަމައަށް މި ހިނގާ އިންތިގާލީ މަރުހަލާގައި އާބަންކޯ އިން ހުޅުމާލޭގެ ބިންތަކަކާ ގުޅޭ ވިޔަފާރީގެ މުއާމަލާތްތަކެއް ނިންމުމުގެ މަސައްކަތްކުރަމުންދާ ކަމަށް ބުނެ، އެ މަނިކުފާނުގެ އޮފީހުން ވަނީ މިދިޔަ އާދީއްތަ ދުވަހު ކަންބޮޑުވުން ފާޅުކޮށްފަ އެވެ.
ހަމަ އެ ދުވަހު އޭސީސީއިން ވަނީ ހުޅުމާލޭގެ ބައެއް ގޮތުގައި އޮންނަ އެކި ހަރަކާތްތައް ބާއްވާ ފަރުކޮޅުފޮށި އާބަންކޯއިން ދިގު މުއްދަތަކަށް ކުއްޔަށް ދިނުން ހުއްޓުވާފަ އެވެ.
އެކަމާ ގުޅޭގޮތުން އިއްޔެ އާބަންކޯއާ ސުވާލުކުރުމުން ބަޔާނެއް ނެރޭނެ ކަމަށް ބުނި ނަމަވެސް، އަދި މިހާތަނަށް އެއްވެސް ބަޔާނެއް ނެރެފައެއް ނުވެ އެވެ.
ކޮމެންޓް (1)
އީސަދަރި