ފަރުކޮޅުފުށި: އެތަން ކުއްޔަށް ދިނުމާ ގުޅޭ މުއަމަލާތެއް އޭސީސީން ވަނީ ހުއްޓުވާފައި
ފަރުކޮޅުފުށި ކުއްޔަށް ދިނުން އޭސީސީން ހުއްޓުވައިފި
ހުޅުމާލޭގެ ބައެއް ގޮތުގައި އޮންނަ އެކި ހަރަކާތްތައް ބާއްވާ ފަރުކޮޅުފޮށި އާބަންކޯއިން ދިގު މުއްދަތަކަށް ކުއްޔަށް ދިނުން އެންޓި-ކޮރަޕްޝަން ކޮމިޝަން (އޭސީސީ)އިން ހުއްޓުވައިފި އެވެ.
ވީ ކިހިނެއް؟ - އިއްޔެ ވަގުތެއްގައި އާބަންކޯއަށް އޭސީސީގެ ފަރާތުން މިގޮތަށް އެންގިކަން އެ ކޮމިޝަނުން 'ދައުރު'އަށް ކަށަވަރުކޮށްދެ އެވެ.
ތަފްސީލު - އޭސީސީގެ އިސް އޮފިޝަލަކު 'ދައުރު'އަށް ވިދާޅުވީ، ފަރުކޮޅުފުށި ކުއްޔަށް ދިނުމާ ގުޅޭ މައްސަލައެއް އެ ކޮމިޝަނަށް ހުށަހަޅުމާ ގުޅިގެން، އެ މައްސަލަ ބަލަމުންދާތީ އެ ބިން ކުއްޔަށް ނުދިނުމަށް އަންގާފައިވާ ކަމަށެވެ. އޭގެ އިތުރުން މިއީ، އިންތިގާލީ މަރުހަލާއަށް ވުމަކީ ވެސް އެތަން ކުއްޔަށް ދިނުން ހުއްޓުވި ސަބަބެއް ކަމަށް އޭނާ ވިދާޅުވި އެވެ.
މިކަމާ ގުޅޭ ގޮތުން އާބަންކޯއާ 'ދައުރު'ން ސުވާލުކުރުމުން ބުނީ، އެކަމާ ގުޅޭ ބަޔާނެއް ވަރަށް އަވަހަށް ނެރޭނެ ކަމަށެވެ.
ފާހަގަކޮށްލެވޭ ކަމެއް - އިންތިހާބީ ރައީސް ޑރ. މުހައްމަދު މުއިއްޒު އަންނަ މަހުގެ 17ގައި ރައީސް ކަމުގެ ހުވާކުރެއްވުމާ ހަމައަށް މި ހިނގާ އިންތިގާލީ މަރުހަލާގައި އާބަންކޯ އިން ހުޅުމާލޭގެ ބިންތަކަކާ ގުޅޭ ވިޔަފާރީގެ މުއާމަލާތްތަކެއް ނިންމުމުގެ މަސައްކަތްކުރަމުންދާ ކަމަށް ބުނެ، އެ މަނިކުފާނުގެ އޮފީހުން ރޭ ވަނީ ކަންބޮޑުވުން ފާޅުކޮށް އެކަން އެގޮތަށް ނުކުރުމަށް އެދިފަ އެވެ.