މިރޭ ޕީޕީއެމް-ޕީއެންސީގެ ރިޔާސީ ކެމްޕެއިން ހަރަކާތުގައި ބައިވެރިވެވަޑައިގެންނެވި ކުރީގެ ރައީސް އަބްދުﷲ ޔާމީންގެ އަނބިކަނބަލުން ފާތުމަތު އާއި ކުރީގެ ރައީސް މުހައްމަދު ނަޝިދު ސަލާމް ކުރައްވަނީ (ދައުރު ފޯޓޯ)
ފާތުމަތުއާ ސަލާމްކުރައްވައި ނަޝީދު ގޮވާލެއްވީ ޔާމީން ދޫކޮށްލުމަށް
އިދިކޮޅު ޕީޕީއެމް-ޕީއެންސީގެ ރިޔާސީ ކެމްޕެއިންގެ ހަރަކާތެއްގައި އަލަށް ބައިވެރިވެވަޑައިގެންނެވި، ކުރީގެ ރައީސް އަބްދުﷲ ޔާމީންގެ އަނބިކަނބަލުން ފާތުމަތު އިބްރާހިމްއާ އެ ހަރަކާތުގެ ތެރެއިން ސަލާމް ކުރައްވައި ޖަލުގައި ހުންނެވި އެ ދެ ޕާޓީގެ ލީޑަރު ޔާމީން ދޫކޮށްލުމަށް އިދިކޮޅު ސަޕޯޓަރުންނާއި ފާތިމަތު އިބްރާހިމްއާ އެކު ހުންނަވައިގެން ރައީސް މުހައްމަދު ނަޝީދު ވެސް މިރޭ އެ އަޑު އުފުއްލަވައިފި އެވެ.
ވީ ކިހިނެއް؟ - އެމްއެމްޕީއާރުސީގެ ހިޔާނާތާ ގުޅިގެން އިއްވާފައިވާ 11 އަހަރުގެ ޖަލު ހުކުމުގެ ސަބަބުން ރިޔާސީ އިންތިހާބުގައި ވާދަ ކުުރުމުގެ ދޮރު ބަންދުވި ޔާމީންގެ ތާއީދު، ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ނެތް ކަމަށް ވާދަވެރިން ވާހަކަ ދައްކަމުންދާ މި ދަނޑިވަޅުގައި، އެމަނިކުފާނުގެ އަނބިކަބަލުން ބައިވެރިވެވަޑައިގެންނެވީ، މިރޭ ކާނިވާ ސަރަހައްދުގައި ހުންނަ ޕީޕީއެމް-ޕީއެންސީގެ ރިޔާސީ ކެމްޕެއިންގެ ރަސްމީ ޖަގަހަގައި އޮތް ހަރަކާތެއްގަ އެވެ.
ތަފްސީލު - ޖަގަހައިގައި ބޭއްވި ކުޑަ ބައްދަލުވުމަށް ފަހު ސަޕޯޓަރުން، ފާތުމަތުއާ ސަލާމް ކުރުމަށް ބޮޑު ކިއުއެއް ހެދި އެވެ. ދޮންމަނިކު ރެސްޓޯރެންޓުން ފެށިގެން ޕީޕިއެމްގެ މައި އޮފީހާ ހަމައަށް އެ ކިއު ދަމާލާފައި އޮތެވެ. އެވަގުތު، އެ ސަރަހައްދުގައި ހުންނަ، ނަޝީދު ނިސްބަވެވަޑައިގަންނަވާ ޑިމޮކްރެޓްސްގެ ހަރުގޭގައި ވެސް ހަރަކާތެއް ކުރިއަށް ދިޔަ އެވެ. އަދި އޭރު އެ ހަރުގޭގައި ނަޝީދު ވެސް ހުންނެވި އެވެ.
ފާތުމަތު ސަޕޯޓަރުންނާ ސަލާމް ކުރައްވަމުން ދަނިކޮށް، ޑިމޮކްރެޓްސް ހަރުގެއިން ނުކުމެވަޑައިގެން ނަޝީދު ވެސް ސަލާމްކުރެއްވުމަށް އެލައިނާ ދިމާލަށް ހިނގަވައިވަޑައިގަތެވެ. އޭރު ފާތުމަތު، ސަޕޯޓަރުންނާ ސަލަމް ކުރެއްވުމަށް ކިންގް ސަލްމާން މިސްކިތާ އަރާ ހަމަވީ އެވެ.
ދެ ބޭފުޅުން ސަލާމްކުރެއްވުމަށް ފަހު، ނަޝީދު ފާތުމަތުގެ ކަންފަތްޕުޅު ކައިރީ ކޮންމެވެސް އެއްޗެއް ވިދާޅުވި އެވެ. އަދި އެއަށް ފަހު، ދެ ބޭފުޅުން ފޮޓޯއަކަށް ވެސް ހުއްޓުނެވެ.
އެއާކު ސަޕޯޓަރުން 'ރައީސް ޔާމީން ދޫކޮށްލާ' ކިޔައި އަޑުއުފުލަން ފެށި އެވެ. އަދި ނަޝީދު ވެސް އެމީހުންނާ އެއްވަރަށް، އަތް މައްޗަށް ހިއްލަވައި 'ދޫކޮށްލާ' އޭ ވިދާޅުވި އެވެ.
އޭގެ ފަހުން، އަނެއްކާ ވެސް އެނބުރި ނަޝީދު ވަޑައިގެންނެވީ، ޑިމޮކްރެޓްސްގެ ހަރުގެއަށެވެ. އަދި އޭގެ ފަހުން ވެސް، ސަޕޯޓަރުން ފާތުުމައާ ސަލާމް ކުރައްވަމުން ގެންދެވި އިރު، އެ މަންޒަރު ބައްލަންވަން ހަރުގެ ދޮރު މަތީގައި ނަޝީދު ހުންނެވި އެވެ.
ފާހަގަކޮށްލެވޭ ކަމެއް - މީގެ ކުރިން ވެސް ޔާމިން ދޫކޮށްލުމަށް ނަޝީދު ގޮވާލާފައިވެ އެވެ. އެމްއެމްޕީއާރުސީގެ ވައްކަމުގެ މައްސަލައިގައި ޔަމީން އެކަނި ޖަލުގައި އޮތުމަކީ، އިންސާފެއް ނޫން ކަމަށް ނަޝީދު ވަނީ ތަކުރާރުކޮށް ވިދާޅުވެފަ އެވެ.
ކޮމެންޓް (1)
ތެފައާސާ.