ވެއްޓެމުންދާ ގެ ސަލާމަތް ކުރަން ހިމަންދޫ މީހުން ނުކުމެއްޖެ

ރާއްޖެއަށް މިހާރު ކުރަމުން ދާ ވިއްސާރައިގައި، އއ. ހިމަންދޫ ހުޅަނގު ފަރާތުގައި ހުންނަ 'ބްލޫހާޓް'ގެ ގިރާލާތީ، އެ ގެ ހިމާޔަތް ކުރަން އެ ރަށުގެ މީހުން ނުކުމެއްޖެ އެވެ.

މައްސަލައިގެ ފެށުން - ވަރަށް ބޮޑަށް ގިރަމުން ދާ ހިމަންދޫގެ އެންމެ ހުޅަނގު ފަރާތުގައި ދެ އިމާރާތެއް ހުރެ އެވެ. އެއީ އެ ރަށު އިގްބާލު ބިލާލުގެ އަމިއްލަ ގެ، 'ބްލޫހާޓް' އާއި ހިމަންދޫގެ ވިޔަފާރިވެރިޔާ އާދަމް ޝާކިރުގެ ތިން ބުރީގެ ގެސްޓްހައުސް އެވެ.

މީގެ 10 އަހަރެއްހާ ދުވަސް ކުރިން އެއީ އެ ރަށުގެ އެންމެ ހިތްގައިމު ސަރަހައްދެވެ. އެކަމަކު ބާރު ސްޕީޑެއްގައި އެ ސަރަހައްދު ގިރަމުން އައިސް، އެ ދެ އިމާރާތަށް މިހާރު ވަނީ ނުރައްކަލާ ކުރިމަތިވެފަ އެވެ.

ވީ ކިހިނެއް؟ - ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި ހިމަންދޫގެ ހުޅަނގު ފަރާތް އަނެއްކާ ވެސް ވަނީ ވަރަށް ބޮޑަށް ގިރާލާފަ އެވެ. މިދިޔަ ދެ ދުވަހު ކުރި ވިއްސާރައިގައި، ބްލޫހާޓް ގެއަށް ރާޅު ނުވަދެ ހުރީ 2 ފޫޓެއްހާ ދުރުމިނެވެ.

"ރެއާ ހަމައަށް އަޅުގަނޑު ނިދީ ގޭގައި. އެކަމަކު ރޭ ގޭތެރެއަށް ރާޅު ބިންދާލަފާނެ ކަމުގެ ބިރަށް ނުކުރެވުން ނިދާކަށް،" ގޭގެ ވެރިފަރާތް، އިގްބާލު ބުންޏެވެ.

ރިސޯޓުގައި ޑައިވަރެއްގެ ގޮތުގައި މަސައްކަތް ކުރަމުން އައި އިގްބާލު، އޭނާގެ ގެ ހިމާޔަތް ކުރުމަށް، ވަޒީފާ ދޫކޮށްލާފައި އައިސް ރަށުގައި ގާއިމްވެ ހުންނަތާ ދުވަސްތަކެއް ވެއްޖެ އެވެ.

ގެ ގިރާލާފާނެ ކަމުގެ ބިރަށް އިގްބާލު މިއަދު ފަތިހު ތެދުވެ، އާއްމުންގެ އެހީތެރިކަމަށް ވަނީ އެދިފަ އެވެ. އަދި އެކަމަށް އިޖާބަދީ، އޭރުން ފެށިގެން 30ހަކަށް މީހުން އަންނަނީ އިގްބާލުގެ ގެ ހިމާޔަތް ކުރުމަށް މަސައްކަތް ކުރަމުންނެވެ.

އެ މީހުން މިހާރު ވަނީ ގޭގެ އަރިމަތިން، ރާޅު ޖަހާ ހިސާބުގައި ގާ ޖައްސައި ސިމެންތި އަޅައި 30 ފޫޓު ދިގަށް ފާރެއް ރާނާފަ އެވެ.

އެ މަސައްކަތުގައި އުޅުނު އަސީތު ތައުފީގު ބުނި ގޮތުގައި، ގޭގެ އިންފާރާއި ރާޅު ޖަހާ ހިސާބާ ދެމެދު މިހާރު ތިން ފޫޓު ވެސް ނެތެވެ. އެހެންވެ، ރާޅުން ސަލާމަތް ކުރުމަށް މި ވަގުތު އެ މީހުންނަށް ފެނުނު ހައްލަކީ އެ ދެމެދުގައި، އާނުގަނޑެއްގެ ގޮތަށް އުސްކޮށް ހުރަހެއް ރޭނުން އޭނާ ބުންޏެވެ.

"އަޅުގަނޑުމެން އެކި ތަންތަނުން ބޮޑެތި ގާ ގެނެސް، އޭގެ މައްޗަށް ހިލަވެއްޔާއި ސިމެންތި އެޅީ. އަދި އޭގެ މައްޗަށް ކަށި ސިމެންތި އަޅައި،ރާޅު ނުޖެހޭނެ ގޮތެއް ފާރެއް ރާނާފައި މިހާރު ވާނީ." އަސީތު ބުންޏެވެ.

"ހަމައެކަނި މިކަމަށް ވެސް 25،000-30،000ރ. ވަރު ދާނެ."

އޭނާ ބުނި ގޮތުގައި، މިހާރު ވިއްސާރަ ހަދާފައި އޮތުމުން، އެ ތަނުގައި ވަނީ ޑިއުޓީ ބަހައިގެން މީހުން ތިބޭ ގޮތަށް ހަމަޖައްސާފަ އެވެ. އެއީ ވާރޭ ވެހެން ފެށުމުން، ފާރު ހިމާޔަތް ކުރުމަށް އޭގެ މަތީގައި ސަތަރި އެޅުމަށެވެ.

އަސީތު ބުނި ގޮތުގައި، މިއީ ވަގުތީ ހައްލެކެވެ. ވިއްސާރަ ދިގުލައިގެން ދާ ނަމަ، ފާރު ވައްޓާލައި ގެ ގިރާލުމުގެ ބިރު އޮތް ކަމަށް އޭނާ ބުންޏެވެ.

ހިމަންދޫގެ ހުޅަނގު ފަރާތް އާދަޔާ ހިލާފަށް ގިރަން ފެށީ، މީގެ އަހަރެއް ކުރިން އެ ރަށުގެ ބަނދަރު ހެދުމާ ގުޅިގެންނެވެ. އެ މަޝްރޫއާ ގުޅިގެން، ކުރިން ރަށުގެ ވަށައިގެން ވޮޑެމުން ދިޔަ ފަސްގަނޑު، ބަނދަރާ ހަމައިން ބްލޮކްވެ، ބޭރަށް ދަމައިގަތެވެ. ނަތީޖާއެއްގެ ގޮތުން، ހައިރާންވާހާ ބާރުމިނުގައި ހުޅަނގު ފަރާތް ގިރަން ފެށި އެވެ.

ރުއްތަކާއި ގަސްތައް ވެއްޓި، ފަސްގަނޑު ދޫވެ، އިގްބާލުގެ ގޯތީގެ ބަޔަކާ އެކު ގިރައިގެން ދިޔައީ އަހަރަކަށް ވުރެ ކުޑަ ދުވަސްކޮޅެއްގެ ތެރޭގަ އެވެ.