ރުއް އާލާކުރުމުގެ ޕްރޮގްރާމްގެ ދަށުން، ރ. ފައިނުގައި ރުއް އިންދަނީ
ސަރުކާރުން ދޭ ރުއް 11 ރަށަކަށް؛ އުއްމީދުކުރަނީ ރުކުގެ އާޖީލަކަށް
ދުވަސްވުމުގެ ސަބަބުންނާއި ބަލި ޖެހުމުގެ ސަބަބުން ރާއްޖޭގެ ގިނަ ރުއްތަކެއް ނެތެމުންދާތީ، 'ރުކުގެ އާ ޖީލެއް' އުފައްދަން ފަށާފައިވާ މަޝްރޫއުގެ ދަށުން 11 ރަށެއްގައި ރުއް އިންދާނެ ކަމަށް ސަރުކާރުން ބުނެފި އެވެ.
ވީ ކިހިނެއް؟- ރުކަށް ޖެހޭ ބައްޔެއް ކަމަށްވާ، ހުދު ކޫޑި އާއި ކަޅު ކޫޑި އަދި މަޑީގެ ސަބަބުން، ގިނަ އަދަދެއްގެ ރުއްތައް ދަނީ މަދުވަމުންނެވެ. އެގޮތުން އެންމެ ރުއް ގިނަ ކ. ކާށިދު އާއި ހދ. ކުމުންދޫ ފަދަ ރަށްރަށުގައި ރުއްތައް މަރުވެ، މިދިޔަ ދުވަސްތަކުގައި ކާށީގެ ދަތިކަން ވަރަށް ބޮޑަށް ކުރިމަތިވި އެވެ.
މި މައްސަލަ ހައްލުކުރުމަށް، ސަރުކާރުން ވަނީ ރާއްޖޭން ބޭރުން 5،000 ރުއް ގެނެސް، ރާއްޖޭގައި އިންދަން ގައުމީ ފެންވަރުގެ މަޝްރޫއެއް ފަށާފަ އެވެ.
އެގްރިކަލްޗާ މިނިސްޓްރީން ބުނިގޮތުގައި މި މަޝްރޫއުގެ ދަށުން ހަތް އަތޮޅެއްގެ 11 ރަށެއްގައި ރުއް އިންދާނެ އެވެ.
ހުޅަނގުގެ ވިއްސާރައާ ދިމާކޮށް، މިހާރު ވެސް ބައެއް ރަށްރަށުގައި ވަނީ ރުއް ޖަހައިފަ އެވެ. އެއީ:
-
ހދ. ވައިކަރަދޫ، މަޝްރޫއު ފެށީ އެ ރަށުގައި
-
ހދ. ނޭކުރެންދޫ
-
ހއ. އުތީމު
-
ހއ. ހޯރަފުށި
-
ރ. ހުޅުދުއްފާރު
-
ރ. ފައިނު
-
ނ. ވެލިދޫ
-
ނ. ކެނދިކުޅުދޫ
މޯލްޑިވްސް ގްރީން ފަންޑުގެ އެހީގައި ރާއްޖެ ގެންނަ މި ރުއްތައް، ދެ އަހަރާއި ބައިގެ ތެރޭގައި ފޯދި، ކުރުނބާ ލިބެން ފަށާނެ ކަމަށް އުއްމީދު ކުރެވެ އެވެ. މިއީ ރާއްޖޭގައި އާއްމުކޮށް ހައްދާ ދެ ވައްތަރެއް ކަމަށްވާ، 'ޑްވާފް ކޮކޮނަޓް'ގެ ރުއްތަކެވެ.
ރަށްރަށަށް ރުއް ބަހަން ފެށީ، ހދ. ހަނިމާދޫގައި ކަރަންޓީނު ކުރުމަށް ފަހު، ބައްޔެއް ނެތްކަން ޔަގީން ކުރުމަށް ފަހު އެވެ.
އެގްރިކަލްޗާ މިނިސްޓްރީން މިއަދު ބުނިގޮތުގައި:
-
ރުއްތައް ހަދިޔާ ކުރަނީ، ބޮޑު ރުއްގަނޑެއް ހެއްދޭނެ ފަދަ ޖާގަ އޮތް ރަށްރަށަށް
-
ކޮންމެ ރުކެއްގެ ދެމެދުގައި 20 ފޫޓުގެ ދުރުމިނެއް ބަހައްޓާ. އެއީ ދެ ރުކުގެ ފަން ވެސް ނުޖެހޭހާ ދުރުމިން
-
އޭގެ ބޭނުމަކީ، މިނިސްޓްރީން ބުނިގޮތުގައި އެއް ރުކަށް ޖެހޭ ބަލި އަނެއް ރުކަށް އެރިޔަ ނުދިނުން
-
މިއީ އާއްމުކޮށް ރާއްޖޭގައި ހެދޭ ރުއްތަކަށް ވުރެ ކުދި ރުއްތަކެއް؛ އާއްމު ގޮތެއްގައި މި ބާވަތުގެ ރުއް ހެދެނީ ފަސް މީޓަރަށް
އެގްރިކަލްޗާ މިނިސްޓްރީން ބުނިގޮތުގައި ސަރުކާރުގެ އުއްމީދަކީ، މި ރުއްތައް ވީހާވެސް އަވަހަކަށް ފޯދި، އޭގެ މަންފާ މީހުންނަށް ލިބެން ފެށުމެވެ. އޭރުން މިހާރު ދިމާވެފައިވާ ކުރުނބަ އާއި ކާށީގެ ދަތިކަން ހައްލުވެ، 'ރުކުގެ އާ ޖީލެއް' އުފެދިގެންދާނެ ކަމަށް ބުންޏެވެ.