އަޒްހާންގެ މަރަށް 6 މަސް؛ އަދިވެސް ތަހުގީގު ކޮޅެއްގައި ނުޖެހޭ

ގެލިގެން ހޯދަމުންދަނިކޮށް މަރުވެފައި އޮއްވާ ފެނުނު މުހައްމަދު އަޒްހާންގެ މަރަށް ހަ މަހަށް ވުރެ ގިނަ ދުވަސް ވެފައި ވީއިރު، އެ މައްސަލައިގެ ތަހުގީގު އަދިވެސް ކޮޅެއްގައި ނުޖެހޭކަން ހާމަވެއްޖެ އެވެ. 

މައްސަލައިގެ ފެށުން - 18 ސެޕްޓެމްބަރުން ފެށިގެން އަޒުހާން ގެއްލިގެން ހޯދަމުންދަނިކޮށް، އޭނާގެ ހަށިގަނޑު ވަރަށް ބޮޑަށް ކުނިވެފައި އޮއްވާ ފެނުނީ 2 އޮކްޓޯބަރުގަ އެވެ. މަރުގެ ހަގީގަތް ދެނެގަތުމަށް ހަށިގަނޑު ބޭރަށް ފޮނުވައިގެން ޕޯސްޓްމޯޓަމް ވެސް ހަދާފައި ވާއިރު، މިކަމާ ގުޅޭ ގޮތުން ފުލުހުން މާ ގިނަ މައުލުމާތުތަކެއް ހާމަކޮށްފައެއް ނުވެ އެވެ.

ފުލުހުންގެ ބަސް - މި ތަހުގީގްގެ އަޕްޑޭޓަކާ ގުޅޭ ގޮތުން 'ދައުރު'ން ސުވާލު ކުުރުމުން ފުލުހުންގެ ތަރުޖަމާނަކު މިއަދު ވިދާޅުވީ އެ ތަހުގީގު އަދި ނުނިމޭ ކަމަށާއި އެކަމާ ގުޅިގެން ސުވާލު ކުރަން ޖެހޭ ފަރާތްތަކާ އަދިވެސް ސުވާލު ކުރަމުން އަންނަ ކަމަށެވެ.

"އަޒްހާންގެ މަރުގެ މައްސަލައިގެ ތަހްގީގަކީ މިހާރު ވެސް ހިނގަމުން ދާ ތަހުގީގެއް. މައްސަލައިގައި ސުވާލުކުރަން ޖެހޭ ފަރާތްތަކާ ސުވާލުކޮށް، ތަހުގީގުގެ ތެރެއިން ކުރަން ޖެހޭ އެހެނިހެން މަސައްކަތްތައް ދަނީ ކުރަމުން،" އަޒްހާންގެ މައްސަލަ މިހާރު ފައިލް ކުރީތޯ ކުރި ސުވާލުގެ ޖަވާބުގައި ތަރުޖަމާނު ވިދާޅުވި އެވެ.

މި މައްސަލައިގައި ފުލުހުން 15 އޮކްޓޯބަރުގައި ބޭއްވި ނޫސްވެރިންގެ ބައްދަލުވުމުގަައި ހާމަކުރި ގޮތުގައި، ޕޯސްޓްމޯޓަމްގެ ވަގުތީ ނަތީޖާ ދައްކާ ގޮތުން އަޒްހާންގެ ހަށިގަނޑަށް ބޮޑުތި އަނިޔާތަކެއް ލިބިފައެއް ނެތެވެ. ދާއިމީ ނަތީޖާ ލިބެން ދެ ތިން މަސް ނަގާނެ ކަމަށް ފުލުހުން އޭރު ބުނެފައިވެ އެވެ.

ޕޯސްޓްމޯޓަމްގެ ދާއިމީ ނަތިޖާ އަދި މިހާތަނަށް ފުލުހުން ހާމަކޮށްފައެއް ނުވެ އެވެ. އެކަމާ ގުޅޭ ގޮތުން  ސުވާލުކުރުމުން ފުލުހުން އެދުނީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނު (އާރުޓީއައި) މެދުވެރިކޮށް އެ މައުލޫމާތު ހޯދުމަށެވެ.

ފުލުހުން މީގެ ކުރިން ބުނެފައިވާ ގޮތުން:

ޕޯސްޓްމޯޓަމްއަށް ފަހު، އަޒްހާންގެ ހަށިގަނޑު ރާއްޖެ ގެނެސް ވަޅުލާފައިވަނީ 14 އޮކްޓޯބަރުގަ އެވެ.