ގާނޫނުގައި އަންހެނުންނަށް ކޯޓާ ކަނޑައެޅުމާ ޕާޓީތަކުން ދެކޮޅު ހަދައިފި

ސިޔާސީ ޕާޓީތަކުގެ މަގާމުތަކުގެ ވަކި ވަރެއް އަންހެނުންނަށް ހާއްސަކުރުމަށް އިލެކްޝަންސް ކޮމިޝަން (އީސީ) އިން ސިޔާސީ ޕާޓީތަކުގެ ގާނޫނަށް ހުށަހަޅާފައިވާ އިސްލާހާއި މެދު ސިޔާސީ ޕާޓީތަކުން މިއަދު ދެކޮޅު ހަދައިފި އެވެ.

ވީ ކިހިނެއް؟ - ސިޔާސީ ޕާޓީތަކުގެ ގާނޫނަށް އީސީން ވަނީ އިސްލާހުތަކެއް ހުށަހަޅާފަ އެވެ. އެ އިސްލާހުތައް މިނިވަން މުއައްސަސާތަކުގެ ކޮމިޓީން މިހާރު ދިރާސާކުރަމުން އަންނައިރު، މިއަދުގެ ކޮމިޓީ ބައްދަލުވުމަށް ރާއްޖޭގެ ސިޔާސީ ޕާޓީތައް ވަނީ ހާޒިރުކޮށްފަ އެވެ. އީސީ އާއި އެޓާނީ ޖެނެރަލްގެ އޮފީހުގެ އިތުރުން ކޮމިޓީއަށް ހާޒިރުވީ:

އެ ބައްދަލުވުމުގައި އީސީން ހުށަހެޅި އިސްލާހުތަކަށް ވަކިވަކިން ޕާޓީތަކުގެ ހިޔާލު ހޯދާފައިވެ އެވެ.

އިތުރަށް ކިޔާލަން- ސިޔާސީ ޕާޓީތަކަށް ފައިސާ ދޭ އުސޫލު ބަދަލުކުރަން ލަފާ ދޭން ހުށަހަޅައިފި

ތަފްސީލް - ކޮމިޓީ ބައްދަލުވުމުގައި އެންމެ ދިގުކޮށް ބަހުސް ކުރެވުނު އެއް އިސްލާހަކީ، ޕާޓީތަކުގައި އަންހެން މެމްބަރުންނަށް ހާއްސަ މަގާމުތައް އުފެއްދުން ނުވަތަ އެ މަގާމުތަކުގެ %33 އަންހެން މެމްބަރުންނަށް ހާއްސަ ކުރުމެވެ. އެންމެ އަންހެން މަންދޫބެއް ވެސް ނެތް ބައްދަލުވުމުގައި ޕާޓީތަކުން ބުނީ:

ޝިޔާމް ވިދާޅުވީ އަންހެނުންނަށް ވަކި ކޯޓާއެއް ކަނޑައަޅާނަމަ، ދޭން ޖެހެނީ 33% އެއް ނޫނެވެ. އޭނާ ވިދާޅުވި ގޮތުގައި އަންހެނުންނަށް އިހުތިރާމުކުރާނަމަ، އެއަށް ވުރެ އަދަދެއް ކަނޑައަޅަން ޖެހެއެވެ.

"ކޯޓާއެއް ދެއްވަންޏާ 33% އެއް ނޫން ދޭން ޖެހޭނީ. އެއަށް ވުރެ ބޮޑަށް ދެއްވަން ޖެހޭނެ އަންހެން ބޭފުޅުން ދެކެ ލޯބިވާކަމަށް ވަންޏާ." ޝިޔާމް ވިދާޅުވި އެވެ.

"މިއީ އަންހެން ބޭފުޅުން ދެރަކޮށްލަން ބުނާ އެއްޗެއް ނޫން. އެއްވެސް ޕާޓީއަކަށް ރަށު ކައުންސިލްތަކުގައި އަންހެނުންނަށް އެ އޮންނަ %33 އެއްވެސް ޕާޓީއަކަށް އެ ހުރިހާ ގޮނޑިއެއް ހަމަ ނުކުރެވޭ. ޑަބްލިއުޑީސީއަށް ވެސް ހުރިހާ މެމްބަރުން ނުނެރެވޭ." އިބްރާހީމް ވަހީދު ވިދާޅުވި އެވެ.

"އަޅުގަނޑަށް ހީވަނީ ޝިޔާމް އެ ދެއްކެވީ ރަނގަޅު ވާހަކައެއްހެން. އަޅުގަނޑުމެން މިގޮތަށް ކޯޓާއެއް ކަނޑައަޅައިގެން ކަންތައްތައް ކުރުން... އެހެނެއް ނޫން ލިޔެވިދާނެ އަންހެން ބޭފުޅުންނަށް އިސްކަން ދޭންވާނޭ.. އެކަހަލަ ގޮތަށް"

"ގާނޫނު އަސާސީގައި އެބަ ބުނޭ ކޮންމެ ދިވެހި ރައްޔިތަކަށްވެސް މަގާމުތަކަށް ވާދަކުރުމުގެ ހައްގުވެސް އެބައޮތޭ. އެހެންވެއްޖިއްޔާ އޭގައި ވެސް %33 އަންހެނުންނަށް ޖަހާފަ އޮތީސް ކަންނޭނގެ. އެހެންމަ މީތި ލިމިޓްކުރަން އަޅުގަނޑުމެންނަކަށް ވެސް އެހާއެއް ތާއީދެއް ނުކުރެވޭ،" އާރިފް ވިދާޅުވި އެވެ.

ބުނީ ކީކޭ؟ - ޕާޓީތަކުން ފާހަގަކުރި ގޮތަށް، އަންހެނުންނަށް ހާއްސަކޮށް ކޯޓާއެއް ކަނޑައެޅުމަކީ އެންމެ ރަނގަޅު ގޮތް ކަމަށް ވިލިމާލެ ދާއިރާގެ މެމްބަރު އަހުމަދު އުޝާމްވެސް ގަބޫލެއް ނުކުރައްވަ އެވެ. 

"ޕްރެކްޓިކަލީ އެކަން ކުރެވިދާނެތޯ އެއީވެސް އުފެދޭ ސުވާލެއް. ގާނޫނުގައި އެހެން ލިޔެފިއްޔާ އޭގެ މާނައަކީ ޕާޓީތަކުގެ ކައުންސިލްތަކުގައި އާއި ކޮމިޓީތަކުގައި % 33 އަންހެނުންނަށް ދީގެން ކިހާ ދުވަހެއް ނަގާނެތޯ އެ މަގާމުތަކަށް މީހުން އައްޔަނުކުރަން،" އުޝާމް ވިދާޅުވި އެވެ.

އޭގެ ބަދަލުގައި އުޝާމް ހުށަހެޅުއްވީ، "މިންތީގެ ހަމަހަމަކަން ގާއިމުކުރަން ޕާޓިތަކުން މަސައްކަތް ކުރަން ޖެހޭނެ ކަމަށް" ގާނޫނުގައި ބަޔާން ކުރުމުގެ ހިޔާލެވެ.

އިލެކްޝަންސް ކޮމިޝަނުން ވެސް އުޝާމްގެ އެ ހިޔާލަށް ތާއީދުކުރި އެވެ.

އެނގުން މުހިންމު - 2019ގައި މަޖިލީހުން ވަނީ ކައުންސިލްތަކުގެ %33 ގޮނޑި އަންހެނުންނަށް ހާއްސަކުރަން ނިންމައި ލާމަރުކަޒީ ގާނޫނު ވަނީ އިސްލާހުކޮށްފަ އެވެ. އެގޮތަށް ކައުންސިލްތަކުން ވަކި ވަރެއް އަންހެނުންނަށް ހާއްސަކުރަން އުޅުމުން، އެއީ ފިރިހެނުންނަށް އޮތް ފުރުސަތުތައް ހަނިކޮށް އެމީހުންނަށް ވެވޭ ބޭއިންސާފެއް ކަމަށް ބުނެ ބައެއް މީހުން ސަރުކާރަށް ވެސް ފާޑުކިޔެވެ.