ޑައުން ސިންޑްރޯމް ހުންނަ މީހަކު އޭނާ ރަމްޒުކޮށްދޭ ބާބީއާ އެކު
ޑައުން ސިންޑްރޯމް ރަމްޒު ކޮށްދޭ ބާބީ ޑޯލްއެއް ފުރަތަމަ ފަހަރަށް
ޑައުން ސިންޑްރޯމް ހުންނަ މީހަކު ތަމްސީލުކުރާ ފުރަތަމަ ބާބީ ޑޯލް ހުސްވި މަހު ފަހުކޮޅު ވަނީ ތައާރަފްކޮށްފަ އެވެ. ކުޅޭ ސާމާނު އުފައްދާ ކުންފުނި މެޓެލް އިން އެ ބާބީ ތައާރަފްކުރީ އެމެރިކާގެ ނޭޝަނަލް ޑައުން ސިންޑްރޯމް ސޮސައިޓީ (އެންޑީއެސްއެސް)އާ ގުޅިގެންނެވެ. މިއީ ޑައުން ސިންޑްރޯމް ހުންނަ މީހަކު ރަނގަޅަށް ރަމްޒުކޮށްދޭ އެެއްޗެއްކަން އެ ކުންފުނިން ކަށަވަރު ކުރި އެވެ.
އާ ބާބީ ފަރުމާކޮށްފައިވަނީ ޑައުން ސިންޑްރޯމް ހުންނަ މީހެއްގެ ޖިސްމާނީ ބައެއް ސިފަތައް ދައްކުވައިދިނުމުގެ އިތުރުން ފޭރާމާއި އެކްސެސަރީޒްގައި ހާއްސަ މާނަތަކެއް ހިމެނޭ ގޮތަށެވެ.
ޑޯލްގެ ހެދުމުގައިވާ ނޫ ކުލަ އާއި ރީނދޫ ކުލަ އާއި ފިނިފެންމަލުން، ޑައުން ސިންޑްރޯމްއަށް ހޭލުންތެރިކުރުމާ ގުޅިފައިވާ ނިޝާންތަކާއި ކުލަތައް ރަމްޒުކޮށްދެ އެވެ. އަދި ބާބީގެ ފަށުގައިވާ ތިން ޝެވްރޯން ރަމްޒުކޮށްދެނީ ޑައުން ސިންޑްރޯމް ހުންނަ މީހުންގެ 21 ވަނަ ކްރޮމޮޒޯމްގެ ތިން ކޮޕީ އެވެ. މީގެ އިތުރުން ޑައުން ސިންޑްރޯމް ހުންނަ ބައެއް ކުދިން ބޭނުންކުރާ އެންކަލް ފުޓް އޯތޮޓިކްސް ވެސް މި ބާބީގެ ހުރެ އެވެ.
އެންޑީއެސްއެސްގެ ރައީސް އަދި ސީއީއޯ ކެންޑި ޕިކާޑް ނެރުއްވި ބަޔާނެއްގައި ވިދާޅުވެފައިވަނީ މި ބާބީ ޑޯލް އަކީ ޑައުން ސިންޑްރޯމް ހުންނަ މީހުންނަށް ވަރަށް މުހިއްމު އެއްޗެއް ކަމަށެވެ. އަދި ފުރަތަމަ ފަހަރަށް އެމީހުން ކަހަލަ ބާބީއަކާ ކުޅުމުގެ ފުރުސަތު ލިބުމުގެ އުފާ އޭނާ ފާހަގަ ކުރެއްވި އެވެ.
"މި ބާބީ އަކީ މުޖުތަމައުގެ މީހުން ތަމްސީލުކުރުމުގެ މުހިއްމުކަން ދައްކުވައިދޭ މިސާލެއް،" ޕިކާޑް ވިދާޅުވި އެވެ.
ޑައުން ސިންޑްރޯމް ހުންނަ މީހުން ރަމްޒުކޮށްދޭ ބާބީ އަކީ މެޓެލްގެ ފެޝަނިސްޓާސް ކަލެކްޝަންގައި ހިމެނޭ އެއްޗެކެވެ. މީގެ ކުރިން ފެޝަނިސްޓާސް ކަލެކްޝަނަށް ތައާރަފްކޮށްފައިވާ ބާބީތަކުގެ ތެރޭގައި ޕްރޮސްތެޓިކް ފައި ހުންނަ ކޭން ޑޯލް އަކާއި ހިއަރިން އެއިޑްސް ހުންނަ ބާބީއަކާއި ހަމުގެ ބަލި ވިޓިލިގޯ ހުންނަ ޑޯލް ހިމެނެ އެވެ.