ދުބާއީ: އެންމެ ގިނަ މީހުން ދާން ބޭނުންވާ ސިޓީ

ދުނިޔޭގެ އެންމެ ގިނަ މީހުން ދަތުރުކުރަން ބޭނުންވާ މަންޒިލް ހޯދުމަށް، ޓިކްޓޮކް ވިއުސް އަށް ބަލައިގެން، ކުރި ސާވޭއަކުން އެއްވަނަ ހޯދީ ދުބާއީ އެވެ.

އެންމެ ގިނަ ބަޔަކު ދާން ބޭނުންވާ މަންޒިލްތަކުގެ ލިސްޓްގެ އެންމެ ކުރީގައި ޔޫއޭއީގެ ދުބާއީ އޮތް އިރު، ދެވަނައިގައި އޮތީ އެމެރިކާގެ ނިއު ޔޯކް ސިޓީ އެވެ. މި ލިސްޓުގެ ތިންވަނައިގައި އޮތީ އިނގިރޭސިވިލާތުގެ ލަންޑަން އެވެ.

މި ސާވޭ ހަދާފައިވަނީ  ޓިކްޓޮކުގައި ތަފާތު 140 ސިޓީއަކަށް ލިބުނު ވިއުސްގެ އަދަދުންނެވެ. އަދި އެއަށް ފަހު 50 ސިޓީއެއް ޝޯޓްލިސްޓު ކޮށްގެންނެވެ.

ލަގެޖް ރައްކާކުރުމަށް އެހީވާ ކުންފުންްޏެއް ކަމުގައިވާ ބައުންސް އިން ހެދި ޓިކްޓޮކް ޓްރެވެލް އިންޑެކްސް 2022  ސާވޭއިން ދަައްކާގޮތުގައި 'ދުބާއީ' ހޭޝްޓެގް ބޭނުންކޮށްގެން ކޮށްފައިވާ ޕޯސްޓްތައް 81.8 ފަހަރު ބަލާފައިވެ އެވެ.

ނިއު ޔޯކްގެ ޕޯސްޓްތައް ބަލާފައިވާ އަދަދު 59.5 ބިލިއަނަށް އަރަ އެވެ. އަދި ލަންޑަންގެ ޕޯސްޓްތައް ބަލާފައިވާ އަދަދަކީ 36.8 ބިލިއަނެވެ.

މި ސާވޭގައި މިދިޔަ އަހަރު އެއްވަނަ ހޯދީ ނިއު ޔޯކް ސިޓީ އެވެ. އަދި ދުބާއީ އޮތީ ދެވަނައިގަ އެވެ.

ފަތުރުވެރިންގެ މެދުގައި ދުބާއީ މަގުބޫލު މަންޒިލަކަށް ވަނީ އެ ސިޓީ މުއްސަނދިކަމާއި ލަގްޒަރީ ދިރިއުޅުމާ ގުޅުވާލެވިފައިވާތީ އެވެ. އަދި އެއީ އަވީގައި ވަގުތު ހޭދަކޮށްލައި ތަފާތު އެކި ކަންކަން ކުރެވޭ ސިޓީއެއްގެ ގޮތުގައި ސާވޭގެ ރިޕޯޓްގައި ފާހަގަކޮށްފައިވެ އެވެ.

"އަލްޓްރާ މޮޑަން ސިޓީ"ގެ ލަގަބު ލިބިފައިވާ ދުބާއީ އަކީ މުޅި ދުނިޔެއަށް ބަލާއިރު ވެސް ފަރުމާގެ ގޮތުން ފާހަގަކޮށްލެވޭ ފަދަ އުސް އިމާރާތްތައް ހިމެނޭ ސިޓީ އެކެވެ. އަދި މިހާރު ދުނިޔޭގައި ހުރި އެންމެ އުސް އިމާރާތް ކަމުގައިވާ ބުރުޖް ހަލީފާ ވެސް ހުންނަނީ ދުބާއީގަ އެވެ.

ގަދަ 10ގައި ދެން ހިމެނޭ ގައުމުތަކުގެ ތެރެއިން ހަތަރު ވަނައިގައި އޮތީ ތުރުކީގެ އިސްތަންބުލް އެވެ. އަދި ފްރާންސްގެ ޕެރިސް ފަސްވަނަ ހޯދި އިރު ހަވަނަ، ހަތްވަނަ އަދި އަށްވަނަ ލިބިފައިވަނީ އެމެރިކާގެ ސިޓީތަކަށެވެ. ނުވަ ވަނައިގައި އޮތީ ކެނެޑާގެ ޓޮރޮންޓޯ އެވެ. ދިހަވަނަ އަށް ދިޔައީ ސްޕެއިންގެ މެޑްރިޑް އެވެ.