ކޯލްޑްޕްލޭ އާއެކު ޕާފޯމް ކުރަން ޖިން އާޖެންޓީނާ އަށް

މަޝްހޫރު ބޭންޑު ކޯލްޑް ޕްލޭ އިން އާޖެންޓީނާ ގައި ދޭ ޝޯ އެއްގައި ޕާފޯމް ކުރަން ކޮރެއާގެ ބޯއީ ބޭންޑު ބީޓީއެސްގެ މެންބަރު ޖިން އާޖެންޓީނާ އަށް ހިނގައްޖެ އެވެ.

ބޭންޑުގެ މެންބަރުން އަސްކަރިއްޔާ އަށް ހިދުމަތް ކުރަން ބީޓީއެސްގެ ހަރަކާތްތައް މެދުކަނޑާލާފައިވާއިރު ބޭންޑު އެނބުރި އަންނާނެ ކަމަށް ބުނެފައިވަނީ 2025 ވަނަ އަހަރު އެވެ. އޭގެ ކުރިން މެންބަރުން އަސްކަރީ ހިދުމަތާ ގުޅުމާ ހަމައަށް މެންބަރުންގެ އަމިއްލަ ސޯލޯ މަސައްކަތްތައް ކުރިއަށް ގެންދާނެ އެވެ.

މި މަހުގެ 28 ގައި ކޯލްޑްޕްލޭ އިން އާޖެންޓީނާގައި ދޭ ޝޯ ގައި ޖިން އޭނާގެ ސޯލާ ހިޓް 'ދި އެސްޓްރޮނޯޓް' ހުށަހަޅައިދޭނެ އެވެ. ބީޓީއެސް ތަމްސީލްކުރާ އެޖެންސީ ބިގްހިޓް އިން ވެސް ވަނީ އެކަން ހާމަކޮށްފަ އެވެ.

'ދި އެސްޓްރޮނޯޓް' އަކީ ޖިން އާއި ކޯލްޑްޕްލޭ ގުޅިގެން ލިޔެފައިވާ ލަވަ އެކެވެ. މި ޕާފޯމަންސް ވާނީ އޭނާ އެ ލަވަ ލައިވްކޮށް ކިޔާ ފުރަތަމަ ޕާފޯމަންސް އަށެވެ.

ރިޕޯޓުތައް ބުނާގޮތުން ބީޓީއެސްގެ މެންބަރު ޖަންކުކް ވެސް ސޯލޯ ޕާފޯމަންސްއެއް ދޭން ގަތަރަށް ދާނެ އެވެ. އެއީ ގަތަރުގައި އަންނަ މަހު ފަށާ ވޯލްޑް ކަޕް ފުޓްބޯޅަ މުބާރާތުގެ ތެރޭން ދޭ ޕާފޯމަންސް އެކެވެ.