ނިންމުން ބަދަލުކޮށް ސަފާރީތަކުން 500 ޑޮލަރު ނަގަން ފުވައްމުލަކު ކައުންސިލުން ނިންމައިފި

ފުވައްލުމަކު ބަނދަރަށް ވަންނަ ސަފާރީތަކުން ނަގަން ނިންމި 500 ޑޮލަރުގެ ފީ 150-200 ޑޮލަރުގެ ފީއަކަށް ކުޑަކުރަން އެ ރަށުގެ ކައުންސިލުން ނިންމި ނިންމުމަށް އަމަލު ކުރުން މަޑު ޖައްސާލައި އަނެއްކާ ވެސް ބޮޑުފީ ނަގާ ގޮތަށް ނިންމައިފި އެވެ.

ވީ ކިހިނެއް؟ - އެ ރަށު ކައުންސިލުން މިއަދު ކުރި އިއުލާނެއްގައި ބުނީ ސަފާރީތަކުން ދުވާލަކަށް 150-200 ޑޮލަރުގެ ފީއެއް ނެގުމަށް ކައުންސިލުން މީގެ ކުރިން ނިންމި ނިންމުމަށް އަމަލު ކުރުން މަޑުޖައްސާލަން މިއަދު ބޭއްވި ކައުންސިލްގެ ބައްދަލުވުމުން ފާސްކޮށްފައިވާ ކަމަށެވެ. އެހެންކަމުން މިއަދުން ފެށިގެން ސަފާރީތަކުން އަނެއްކާ ވެސް ނަގާނީ ދުވާލަކަށް 500 ޑޮލަރުގެ ފީއެއް ކަމަށް ވެސް ކައުންސިލުން ބުންޏެވެ.

އެގޮތަށް ނިންމި ސަބަބެއް ކައުންސިލުން ހާމައެއް ނުކުރި އެވެ.

އެނގުން މުހިންމު - ސަފާރީތަކުން ދުވާލަކަށް 500 ޑޮލަރުގެ ފީއެއް ނަގާތީ ސަފާރީތައް ތަމްސީލް ކުރާ ގައުމީ ޖަމްއިއްޔާ ބޯޓިން އެސޯސިއޭޝަނުން ވަނީ ކަންބޮޑުވުން ފާޅުކޮށް އެ ފީ ކުޑަކުރަން މީގެ ކުރިން ގޮވާލައިފަ އެވެ. ފީ ކުޑަކުރަން ނިންމީ ވެސް އެ ޖަމްއިއްޔާގެ ގޮވާލުންތަކާއި ދާއިރާގެ ފަރާތްތަކުގެ ފާޑުކިޔުން އަމާޒުވުމާ ގުޅިގެންނެވެ.