ގަތަރު ފައިނޭންޝަލް ސެންޓަރުން ފައިނޭންޝަލް ސެންޓަރަށް ބޭނުންވާ ފަންނީ އެހީތެރިކަން ދެނީ

ރާއްޖޭގައި ގާއިމުކުރަން ނިންމާފައިވާ ބައިނަލްއަގްވާމީ ފައިނޭންޝަލް ސެންޓަރަށް ބޭނުންވާ ފަންނީ އެހީތެރިކަން ފޯރުކޮށްދިނުމަށް ގަތަރު ފައިނޭންޝަލް ސެންޓަރު (ކިއުއެފްސީ)އިން ނިންމައިފި އެވެ.

ވީ ކިހިނެއް؟ - އިކޮނޮމިކް މިނިސްޓްރީ އާއި ކިއުއެފްސީއާ ދެމެދު އެކަމާ ގުޅޭ ފަހުމުނާމާއެއްގައި މިއަދު ވަނީ ސޮއިކޮށްފަ އެވެ.

ބުނީ ކީކޭ؟ - "މިއީ ރައީސް މުއިއްޒުގެ ތަސައްވުރާ އެއްގޮތަށް ބައިނަލްއަގްވާމީ ފައިނޭންޝަލް ސެންޓަރެއް ގާއިމުކުރުމަށް އެޅޭ މުހިންމު ފިޔަވަޅެއް. ކިއުއެފްސީގެ ފަރާތުން މިކަމުގައި ބޮޑު އެހީތެރިކަމެއް ލިބޭނެ ކަމުގެ ޔަގީންކަން އެބައޮތް،" އެ ފަހުމުނާމާއާ ބެހޭގޮތުން އިކޮނޮމިކް މިނިސްޓަރު މުހައްމަދު ސައީދު ވިދާޅުވި އެވެ.

ތަފްސީލު - އިކޮނޮމިކް މިނިސްޓްރީން ބުނީ މި އެމްއޯޔޫއާ އެކު ރާއްޖޭގައި ބައިނަލްއަގްވާމީ ފައިނޭންޝަލް ސެންޓަރެއް ގާއިމުކުރުމަށް ބޭނުންވާ އިލްމު ހޯދައި، ކެޕޭސިޓީ ބިނާކުރަން މަގުފަހިވާނެ ކަމަށެވެ.

އެ އެމްއޯޔޫގެ ދަށުން ކިއުއެފްސީއިން ފައިނޭންޝަލް މެނޭޖްމަންޓުގެ ބެސްޓް ޕްރެކްޓިސްތަކާއި މިކަމާ ބެހޭ ގާނޫނީ އޮނިގަނޑާއި އޮޕަރޭޝަނަލް ސްޓްރެޓަޖީތަކާ ބެހޭ މައުލޫމާތު ސެޝަންތަކެއް ކުރިއަށްގެންދާނެ އެވެ.

މީގެ އިތުރުން އެކި މާލީ އިންސްޓިޓިއުޝަންތަކާއި މި ދާއިރާގެ މަސައްކަތްތައް ރެގިއުލޭޓްކުރާ ގާނޫނީ ޝަހުސުތަކާއި ތަޖުރިބާކާރުންނާ އެކު ނެޓްވޯކިން ފުރުސަތުތަކެއް ވެސް ކިއުއެފްސީއިން ފަހިކޮށްދޭނެ އެވެ.

އެނގުން މުހިންމު - ތެޔޮ ރައްކާކުރުމަށް އެސްޓީއޯ އިން ބޭނުންކުރާ ކ. ފުނަދޫގައި އެ މަސައްކަތް ކުރުން ހުއްޓާލައި، އެ ރަށް އިގްތިސޯދީ ހަބަކަށް ބަދަލުކުރަން މި ސަރުކާރުން ވަނީ ނިންމާފަ އެވެ.

މިދިޔަ ޖެނުއަރީގައި އެކަން އިއުލާންކުރައްވައި ރައީސް މުއިއްޒު ވިދާޅުވީ ފުނަދޫ ބައިނަލްއަގްވާމީ ފައިނޭންޝަލް ސެންޓަރެއްގެ ގޮތުގައި ތަރައްގީކޮށް، އެ ރަށާއި އެއާޕޯޓާ ދެމެދު އަދި އެ ރަށާއި މާލެއާ ދެމެދު ބުރިޖުން ގުޅުވާލައި، ފަސޭހަކަމާ އެކީގައި ފަސިންޖަރުންނާއި ކަސްޓަމަރުންނާއި މުވައްޒަފުންނަށް ދަތުރުކުރެވޭ ފަދަ ނިޒާމެއް ގާއިމްކުރަން ނިންމާފައިވާ ކަމަށެވެ.

މީގެ އިތުރުން ރާއްޖޭގެ އުތުރުން އިހަވަންދިއްޕޮޅުގައި ތަރައްގީކުރާ މޯލްޑިވްސް އިކޮނޮމިކް ގޭޓްވޭގައި ވެސް އިސްލާމިކް ފައިނޭންސް ސެންޓަރެއް އެޅުމަށް ސަރުކާރުން ވަނީ ނިންމާފަ އެވެ.