އިސްލާމިކް ޑިވަލޮޕްމަންޓް ބޭންކުން ރާއްޖެއަށް 65 މިލިއަން ޑޮލަރުގެ ލޯނެއް ދެނީ

އިގްތިސާދު ކުރިއެރުވުމަށް އެހީތެރިވުމުގެ ގޮތުން އިސްލާމިކް ޑިވަލޮޕްމަންޓް ބޭންކް (އައިއެސްޑީބީ)އިން ރާއްޖެއަށް 64.7 މިލިއަން ޑޮލަރު (997 މިލިއަން ރުފިޔާ)ގެ ލޯނެއް ދިނުމަށް ނިންމައިފި އެވެ. 

ވީ ކިހިނެއް؟ - އެ ބޭންކުގެ ވެބްސައިޓުގައި މިއަދު އިއުލާންކުރި ގޮތުގައި އެ ލޯނު ރާއްޖެއަށް ދިނުމަށް ނިންމީ މިއަދު ބޭއްވި އެ ބޭންކުގެ ބޯޑް ބައްދަލުވުމުގަ އެވެ. 

ތަފްސީލް - އެ ބޭންކުން  ބުނި ގޮތުގައި އެ ލޯން ރާއްޖެއަށް ދެނީ ރާއްޖޭގެ މަސްވެރިކަމުގެ ދާއިރާ ތަރައްގީ ކުރުމަށް ސަރުކާރުން ރާވާ ޕްރޮގްރާމްތަކަށް އިންވެސްޓްކުރުމަށެވެ. 

ގުޅުންހުރި - އައިއެސްޑީބީގެ އެގެޒެކެޓިވް ބޯޑުން މިއަދުވަނީ ރާއްޖެ ހިމެނޭހެން 17 މެންބަރު ގައުމެއްގެ އިޖުތިމާއީ އަދި އިގްތިސާދީ ކަންކަމަށް ހަރަދުކުރުމަށް 20 ޕްރޮޖެކްޓަށް 3 ބިލިއަނަށްވުރެ ގިނަ ޑޮލަރު ދިނުމަށް ނިންމައިފަ އެވެ. 

ބުނީ ކީކޭ؟ - އެ ލޯނުތައް ދޭން ނިންމުމާ ގުޅޭ ގޮތުން އެ ބޭންކުގެ ރައީސް ޑރ. މުހައްމަދު އަލް ޖައްސަރު ވިދާޅުވީ އެ ޕްރޮޖްކެޓްތަކުގެ ސަބަބުން މެންބަރު ގައުމުތަކަށް ބޮޑެތި ކުރިއެރުންތަކެއް ލިބޭނެ ކަމަށެވެ. 

އެނގުން މުހިންމު - އިސްލާމީ ޝަރީއަތުގެ އުސޫލުތަކާ އެއްގޮތްވާ ގޮތުގެ މަތިން ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް އެހީ ދިނުމަށް 616 މިލިއަން ރުފިޔާގެ ފަންޑެއް ގާއިމްކުރުމަށް އެ ބޭންކާއެކު މިދިޔަ އަހަރުގެ މެއި މަހު ރާއްޖޭން ވަނީ އެއްބަސްވުމެއްގައި ސޮއިކޮށްފަ އެވެ.