ސެލީނާ ގޯމޭޒްގެ އާ ޝޯގެ ޕޯސްޓަރެއް.
ސެލީނާގެ ހުނަރު ލޮސް އެންޖެލެސްގެ ބަދިގެތަކަށް
މަގުބޫލު ލަވަކިޔުންތެރިޔާ އަދި ޑިޒްނީ ތަރި ސެލީނާ ގޯމޭޒްގެ ކަލިނަރީ އެޑްވެންޗާތަކާ އެކު 'ސެލީނާ + ރެސްޓޯރެންޓްސް' ޝޯ މާދަމާރޭ ޓީއެލްސީން ދައްކަން ފަށާނެ އެވެ.
މި ޝޯގައި ސެލީނާގެ ކެއްކުމުގެ ހުނަރު އިތުރު ހަރުފަތަކަށް ގެންގޮސް، އޭނާގެ ގޭގެ ބަދިގެއިން ނުކުމެ، ލޮސް އެންޖެލެސްގެ މަޝްހޫރު ރެސްޓޯރެންޓުތަކުގެ ބަދިގެތަކުގައި އެ ހުނަރު ދައްކާލާނެ އެވެ.
މަގުބޫލު އަދި ތަޖުރިބާކާރު ޝެފުންނާ އެކު ސެލީނާގެ ކެއްކުމުގެ ހުނަރު ދައްކާލި 'ސެލީނާ + ޝެފް' ސިލްސިލާއަށް ފަހު މި ފަހަރު ފަށާ ރެސްޓޯރެންޓުތަކަށް ހާއްސަ ސިލްސިލާގައި ހަ އެޕިސޯޑު ދައްކާނެ އެވެ.
'ސެލީނާ + ރެސްޓޯރެންޓްސް' ޝޯގައި ސެލީނާގެ އެންމެ ގާތް އެކުވެރިޔާ ރެކުއެލް ސްޓީވަންސްއާ އެކު އެލްއޭގެ އެންމެ މަގުބޫލު ރެސްޓޯރެންޓްތަކުގެ ބަދިގޭގައި ސެލީނާގެ ކަލިނަރީ ހުނަރުތައް ދައްކާލާނެ އެވެ. އަދި ތަޖުރިބާކާރު ޝެފުން ސެލީނާގެ ކަލިނަރީ ހުނަރަށް ޗެލެންޖުތައް ކުރާނެ އެވެ. މި ސީރީޒްގައި ސެލީނާ މަސައްކަތް ކުރާނީ ރެސްޓޯރެންޓުގެ މެނޫން އޭނާގެ ސިގްނޭޗާ ޑިޝްއަށް ޖާގައެއް ހޯދުމަށެވެ.
މި ސީރީޒްގައި ފެންނަ ކޮންމެ ޝެފަކު ވެސް އެ މީހަކު ބޭނުންވާ ދާއިރާއަކުން ހިލޭ ސާބަހަށް އެހީ ވެސް ދޭނެ އެވެ. 'ސެލީނާ + ޝެފް' ސީރީޒްގައި ވެސް މިކަން ފެނިގެންދިޔަ އެވެ.
'ސެލީނާ + ރެސްޓޯރެންޓު'ގެ އެޕިސޯޑުތައް އަންނަ މަހުގެ 19އާ ހަމައަށް ދައްކާނެ އެވެ. އެގޮތުން، 30 މިނެޓުގެ ކޮންމެ އެޕިސޯޑެއްގައި ވެސް މީރު ކެއުމެއް ތައްޔާރުކޮށް، ސެލީނާގެ ހުނަރު ދައްކާލުމުގެ އިތުރުން ހިލޭ ސާބަހަށް މަސައްކަތް ކުރުމަށް ބާރު އެޅުމުގެ ބައެއް ވެސް ފެންނާނެ އެވެ.
-
ސެލީނާގެ ހުނަރު ފެންނަ 'ސެލީނާ + ރެސްޓޯރެންޓު'ގެ އެޕިސޯޑުތައް މީޑިއާނެޓުގެ ޗެނަލް 824، ޓީއެލްސީން ފެންނާނެ