އުރީދޫން އިސްރަށްވެހިންގެ ދުވަސް ފާހަގަކޮށްފި

ބައިނަލްއަގްވާމީ އިސްރަށްވެހިންގެ މީހުންގެ ދުވަސް އުރީދޫ މޯލްޑިވްސް އިން އިސްރަށްވެހިންގެ ނާދީއާ ގުޅިގެން ކުލަގަދަކޮށް ފާހަގަކޮށްފި އެވެ.

ވީ ކިހިނެއް؟ - އުރީދޫން އިއްޔެ ވަނީ އެ ކުންފުނީގެެ އިޖުތިމާއީ ޒިންމާގެ ދަށުން ނާދީގައި 'ގްރޯ ވިތު އުރީދޫ' ސެޝަނަކާއި ޑިޖިޓަލް ޕާޓްނާޝިޕް އިއުލާނާއި ފޮތް ހަދިޔާ ކުރުމުގެ ހަރަކާތެއް ކުރިއަށް ގެންގޮސްފަ އެވެ.

މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާ ގުޅިގެން އުރީދޫ މޯލްޑިވްސް އިން ވަނީ 'ގްރޯ ވިތު އުރީދޫ' ސެޝަނެއް އިސްރަށްވެހިންގެ ނާދީގައި ބާއްވާފަ އެވެ. ގޯތިތެރޭގައި ގަސް އިންދުމާ ގުޅޭ މައުލޫމާތު ދިނުމަށް ކުރިއަށް ގެންދިޔަ މި ސެޝަނަކީ ތިމާވެށީގެ ދެމެހެއްޓެނިވިކަން ކުރިއެރުވުމަށް ފަރުމާކޮށްފައިވާ ސެޝަނެކެވެ.

ގޭގައި ތިބެގެން އަމިއްލަ ބަގީޗާތައް ހައްދައި ބެލެހެއްޓުމުގެ ޓެކްނިކްތައް ބައިވެރިން ދަސްކުރިއިރު، ފަސޭހަ އަދި ދެމެހެއްޓެނިވި ގޮތްތަކަށް މި މަސައްކަތް ކުރުމަށް ހާއްސަ އިސްކަމެއް އެ ސެޝަންގައި ކުރިއަށް ގެންދިޔަ އެވެ.

އުމުރުން ދުވަސްވީ މީހުންނަށް ކަނެކްޓިވިޓީ އިތުރުކުރުމުގެ މަގްސަދުގައި އުރީދޫން ވަނީ ނާދީގައި އާ ޑިޖިޓަލް ޕާޓްނާޝިޕެއް ވެސް އިއުލާނުކޮށްފަ އެވެ.

މި ޕާޓްނާޝިޕްގެ ސަބަބުން އުރީދޫގެ ޓެލެކޮމިއުނިކޭޝަން އަދި ޑިޖިޓަލް ހިދުމަތްތައް ފަސޭހަކަމާ އެކު ލިބި، އެ ފަރާތްތަކުގެ އިވެންޓްތަކަށް ކަނެކްޓިވިޓީ އިތުރުވެގެންދާނެ އެވެ.

އުރީދޫން ވަނީ ނާދީ އަށް ފޮތް ހަދިޔާކޮށްފަ އެވެ. މީގެ ސަބަބުން އުމުރުން ދުވަސްވީ ރަށްވެހިންނަށް ނާދީގައި ހޭދަކުރާ ވަގުތުތަކުގައި އެކި މައުލޫގެ ފޮތްތައް ކިޔައި މައުލޫމާތު އިތުރަށް މުއްސަނދިކުރުމަށް އެހީއަކަށް ވާނެ ކަމަށް އުރީދޫން ބުންޏެވެ.

މި ހަރަކާތްތަކަކީ މުޖުތަމައުގައި އިސްރަށްވެހިންގެ ބައިވެރިވުން އިތުރުކުރުމުގެ ގޮތުން އުރީދޫން މިއަހަރު ފެށި ޕްރޮގްރާމުގެ ބައެކެވެ.