އެމް-ފައިސާގެ ހިދުމަތް ދޭން އުރީދޫގެ ސަބްސިޑަރީ ކުންފުންޏަކަށް ހުއްދަ ދީފި

އުރީދޫ މޯލްޑިވްސްގެ އީ-ވޮލެޓު، 'އެމް-ފައިސާ'ގެ ހިދުމަތް ދިނުމަށް އެ ކުންފުނީގެ ސަބްސިޑަރީ ކުންފުންޏެއް ކަމަށްވާ ޓެކްފިން މޯލްޑިވްސް ޕްރައިވެޓް ލިމިޓެޑަށް އިއްޔެ ހުއްދަ ދޫކޮށްފި އެވެ.

ވީ ކިހިނެއް؟ - ގައުމީ ޕޭމަންޓް ސިސްޓަމްގެ ގާނޫނުގެ ދަށުން، ރާއްޖޭގައި އިލެކްޓްރޯނިކް ފައިސާގެ ހިދުމަތް ދިނުމުގެ ހުއްދަ އެ ކުންފުންޏަށް ދީފައިވާ ކަމަށް މަރުކަޒީ ބޭންކު، އެމްއެމްއޭ އިން އިއްޔެ ބުންޏެެވެ.

ތަފްސީލް - ގައުމީ ޕޭމެންޓް ނިޒާމުގެ ގާނޫނުގެ ދަށުން، މާލީ ހިދުމަތް ދިނުމުގެ ލައިސެންސް ދެވޭނީ އެކަމަށް ހާއްސަ ކުންފުންޏެއްގެ ދަށުން ރަޖިސްޓްރީކޮށްގެންނެވެ.

އެއާ އެކު، އެމް-ފައިސާގެ ހިދުމަތް ފޯރުކޮށްދިނުމަށް ޓެކްފިން މޯލްޑިވްސް ޕްރައިވެޓް ލިމިޓެޑްގެ ނަމުގައި ކުންފުންޏެއް އުފައްދައި ރަޖިސްޓްރީ ކުރީ މިދިޔަ 16 މެއިގަ އެވެ.

އުރީދޫން މީގެ ކުރިން އާންމުކޮށްފައިވާ ގޮތުން، މާދަމާ އިން ފެށިގެން އެމް-ފައިސާގެ ހިދުމަތްތައް ޓެކްފިން މޯލްޑިވްސްގެ ދަށުން ފޯރުކޮށްދޭން ފަށާނެ އެވެ.

ފާހަގަ ކުރެވޭ - އެމް-ފައިސާ މެދުވެރިކޮށް ބިލުތައް ދެއްކުމުގެ އިތުރުން، 'ބަނޑޭރި ޕޭ' މެދުވެރިކޮށް ކުރާ މުއާމަލާތްތަކަށް ވެސް ފައިސާ ދެއްކެ އެވެ. މީގެ އިތުރުން، ބައެއް ފިހާރަތަކާއި ކެފޭ އަދި ރެސްޓޯރެންޓުތަކަށް ވެސް އެމް-ފައިސާ މެދުވެރިކޮށް ފައިސާ ދެއްކެ އެވެ.