މިފްކޯއަށް ސީއީއޯއެއް ހޯދަން އަނެއްކާ ވެސް އިއުލާންކޮށްފި

ސަރުކާރުގެ މަސް ކުންފުނި މިފްކޯއަށް ސީއީއޯއެއް ހޯދަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން އިއުލާންކޮށްފި އެވެ.

ވީ ކިހިނެއް؟ - މިއީ މި އަހަރު މިފްކޯއަށް ސީއީއޯއެއް ހޯދަން އިއުލާންކުރި ދެ ވަނަ ފަހަރެވެ. އެގޮތުން މިދިޔަ ޖޫންގައި މިފްކޯއަށް ސީއީއޯއެއް ހޯދަން އިއުލާންކުރި ނަމަވެސް، ޝަރުތުހަމަވާ ކެންޑިޑޭޓަކު ކުރިމަތިނުލާ ކަމަށް ބުނެ ޖުލައިގައި އެ އިއުލާން ވަނީ ބާތިލުކޮށްފަ އެވެ.

ތަފްސީލު - ޕީސީބީއިން މިއަދު ކުރި އިއުލާނުގައި ބުނެފައިވަނީ މަސްވެރިކަމުގެ ސިނާއަތަށް އީޖާދީ އަދި ދެމެހެއްޓެނިވި ހިޔާލު ހުރި މީހަކު މިފްކޯގެ ސީއީއޯގެ މަގާމަށް ހޯދާ ކަމަށެވެ.

މި މަގާމަށް ކުރިމަތިލުމުގެ ސުންގަޑި ހަމަވާނީ 8 އޮކްޓޫބަރު 2024ގެ މެންދުރު 2 ޖަހާއިރު އެވެ.

މަގާމަށް ކުރިމަތިލާން ބޭނުންވާ ލިޔެކިޔުންތައް ފޮނުވާނީ info@pcb.gov.mv އާއި ahmed.yameen@finance.gov.mv އަށެވެ.

މި މަގާމަށް ކުރިމަތިލާ މީހުންގެ ހުންނަން ޖެހޭ ބައެއް ޝަރުތުތައް:

މި މަގާމުގެ މުއްދަތަކީ މަދުވެގެން ހަތަރު އަހަރު ދުވަހެވެ. އަދި މުއްދަތު އާ ކުރާނީ އަހަރީ ޕާފޮމެންސް އިވެލުއޭޝަނަށް ބަލާފަ އެވެ.

މަގާމުގެ މުސާރައަކީ 12،000 - 15،000 ޑޮލަރު (184،320 - 230،400 ރުފިޔާ) އެވެ.

އެނގުން މުހިންމު - މިފްކޯގެ ސީއީއޯގެ މަގާމު ހުސްކަމަކަށް ދިޔައީ ކުރިން އެ ކުންފުނީގެ މެނޭޖިން ޑިރެކްޓަރު އަދި ސީއީއޯގެ މަގާމުގައި ހުންނެވި އަހުމަދު ޝަމާހު ރަޝީދު މިދިޔަ މެއި މަހު އެ މަގާމުން ވަކިކުރުމާ ގުޅިގެންނެވެ.

އޭނާ ފަހުން ވަނީ ފިޝަރީޒް މިނިސްޓްރީގެ ސްޓޭޓް މިނިސްޓަރަކަށް އައްޔަންކޮށްފަ އެވެ.

ޕީސީބީން ބެލި މައްސަލައަކާ ގުޅިގެން މިދިޔަ މާޗު މަހު ޝަމާހު ސަސްޕެންޑު ކުރި އެވެ. އޭނާގެ ސަސްޕެންޝަން އޭޕްރީލް މަހު އުވާލީ 37 ދުވަހަށް ފަހު އެވެ.

ސީއީއޯއަކު ހޯދަން އިއުލާން ކުރި އިރު، މިފްކޯގެ މާލީ ހާލަތު ވަނީ ވަރަށް ބޮޑަށް ދަށަށް ގޮސްފަ އެވެ.