މާފަރު އެއާޕޯޓު
މާފަރު އެއާޕޯޓުގައި ޖެޓް ޕާކުކުރާ ޖާގަ ދެގުނަ ކުރަނީ
ނ. މާފަރު އިންޓަނޭޝަނަލް އެއާޕޯޓުގެ ޕާކިން ޖާގަ އިތުރުކުރުމަށް އެއާޕޯޓުގެ އޭޕްރަން ބޮޑުކުރުމުގެ މަސައްކަތް އެމްޓީސީސީއާ ހަވާލުކޮށް އެ މަސައްކަތުގެ އެއްބަސްވުުމުގައި ސޮއިކޮށްފި އެވެ.
ވީ ކިހިނެއް؟ - މިއަދު ބޭއްވި ރަސްމިއްޔާތެއްގައި މަސައްކަތުގެ އެއްބަސްވުމުގައި ސޮއިކުރެއްވީ:
-
އެމްޓީސީސީގެ ފަރާތުން އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އަބްދުﷲ ޒިޔާދު
-
މާފަރު އެއާޕޯޓު ހިންގާ އައިލެންޑު އޭވިއޭޝަނުގެ ފަރާތުން މެނޭޖިން ޑިރެކްޓަރު އިބްރާހިމް އިޔާސް
We are pleased to announce the signing of agreement with MTCC for the Maafaru International Airport apron expansion project. This strategic partnership is a key step in enhancing our airport infrastructure and capacity.
— MaldivianAero (@MaldivianAero) August 11, 2024
Read More: https://t.co/Y2QrOHoHGY#MaldivianAero pic.twitter.com/pRGXVYaUxb
ތަފްސީލް - އައިލެންޑު އޭވިއޭޝަނުން ބުނީ މާފަރު އެއާޕޯޓުގެ އޭޕްރަން ބޮޑު ކުރުމުގެ މަޝްރޫއަކީ އެ އެއާޕޯޓުގެ އިންފްރާސްޓްރަކްޗާ ތަރައްގީކޮށް، އެއާޕޯޓުގެ ހިދުމަތް ފުޅާކޮށް، ކެޕޭސިޓީ އިތުރުކުރުމަށް ކުރިއަށް ގެންދާ މަޝްރޫއެއް ކަމަށެވެ.
އެ މަޝްރޫއުގެ ދަށުން މާފަރު އެއާޕޯޓުގެ ޕާކިން ކެޕޭސިޓީ ދެ ގުނަ ކުރުމަށް 15،300 އަކަ މީޓަރުގެ ސަރަހައްދެއް ތަރައްގީ ކުރާނެ އެވެ. އެގޮތުން:
-
މިވަގުތު މާފަރު އެއާޕޯޓުގައި 13 ބިޒްނަސް ޖެޓް ޕާކު ކުރެވޭ
-
އޭޕްރަން ބޮޑު ކުރުމުގެ މަޝްރޫއު ނިމުމުން އެއްފަހަރާ 26 ޖެޓް ޕާކު ކުރެވޭނެ
-
މި މަޝްރޫއާ އެކު ސީޒަން ތެރޭ މާފަރު އެއާޕޯޓުން ދަތުރުކުރާ މަތީ ފަންތީގެ ފަތުރުވެރިންނަށް ބޮޑު ލުޔެއް ލިބޭނެ
އައިއޭއެސްގެ އެމްޑީ އިޔާސް ވިދާޅުވީ މާފަރަކީ އެ ސަރަހައްދުގެ މައި ދޮރާށީގެ ގޮތުގައި ތަރައްގީކޮށް، ރަނގަޅު ހިދުމަތްތަކެއް ފޯރުކޮށްދިނުމަށް މިއީ މުހިއްމު މަޝްރޫއަކަށް ވާނެ ކަމަށެވެ.
އެ މަސައްކަތް ހަވާލުކުރި ހަ މަހުން ނިންމާގޮތަށެވެ.
ފާހަގަކޮށްލެވޭ - މާފަރަކީ މާލެ ފިޔަވާ އެންމެ ގިނަ ޖެޓުތައް ދަތުރުކުރާ ރާއްޖޭގެ އިންޓަނޭޝަނަލް އެއާޕޯޓެވެ. އެ ސަރަހައްދުގައި އޮންނަ އަގުބޮޑެތި ރިސޯޓުތަކަށް ދާ މަތީފަންތީގެ ފަތުރުވެރިން މާލެ ނައިސް ސީދާ ދަނީ މާފަރު އެއާޕޯޓަށެވެ.
އެއާޕޯޓް ތަރައްގީ ކުރުމުގެ ދެ ވަނަ ފިޔަވަހީގެ ދަށުން ވައިޑް ބޮޑީ އެއާކުރާފްޓުތައް ޖެއްސޭ ފެންވަރަށް މާފަރު އެއާޕޯޓުގެ ރަންވޭ ދިގު ކުރުމުގެ މަސައްކަތް ވެސް އަންނަނީ ކުރަމުންނެވެ.
އެއާޕޯޓުގެ ރަންވޭ ބޮޑުކޮށް، އެ އެއާޕޯޓް އިތުރަށް ތަރައްގީކުރުމުގެ މަޝްރޫއު 27.2 މިލިއަން ޑޮލަރު (419.1 މިލިއަން ރުފިޔާ)އަށް ހަވާލުކޮށްފައި ވަނީ ވެސް އެމްޓީސީސީއާ އެވެ.
އެ މަޝްރޫއުގެ ދަށުން:
-
ރަންވޭ 650 މީޓަރަށް ދިގުކޮށް، ފުޅާކުރުމަށް ބިން ހިއްކައި ތޮށިލާނެެ؛ އޭރުން ބޮއިން 777 މަރުކާގެ ބޯޓްތަކަށް ޖެއްސޭނެ
-
ޓެކްސީވޭ ފުޅާކުރާނެ
-
އޭޖީއެލް އަޕްގްރޭޑް ކުރާނެ
-
ޕަވަ ސިސްޓަމް އަޕްގްރޭޑް ކުރާނެ
މާފަރު އެއާޕޯޓް ތަރައްގީ ކޮށްފައިވަނީ އަބޫދާބީ ފަންޑުގެ ހިލޭ އެހީގަ އެވެ.