ވެލާނާ އިންޓަނޭޝަނަލް އެއާޕޯޓުގައި ފަތުރުވެރިން. (ދައުރު ފޮޓޯ/ އަބްދުﷲ އަނޫފް ޖުނައިދް)
އުންމީދަކީ އިންޑިއާ މާކެޓު އަލުން ގަދަ 3އަށް ގެނައުން: ޝިއުރީ
ރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކުގެ ލިސްޓުގެ އެންމެ ކުރިއަށް އިންޑިއާ އަލުން ގެނައުމަށް އެމްއެމްޕީއާރުސީއިން އަމާޒު ހިފައިފި އެވެ.
އެނގުން މުހިިއްމު - މިދިޔަ ތިން އަހަރު ވެސް ރާއްޖެއަށް އެންމެ ގިނަ ފަތުރުވެރިން އައި އިންޑިއާ މާކެޓު މިހާރު އޮތީ ރާއްޖެއަށް އެންމެ ގިނައިން ފަތުރުވެރިން އަންނަ މާކެޓުތަކުގެ ހަ ވަނައިގަ އެވެ.
އެ ގައުމުން އަންނަ ފަތުރުވެރިން މަދުވީ މި އަހަރުގެ ކުރީކޮޅު ރާއްޖޭގެ ސަރުކާރުގެ އިސް މަގާމުގައި ތިއްބެވި ތިން ފަރާތަކުން އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސްވާ ގޮތަށް ސޯޝަލް މީޑިއާގައި ވާހަކަ ދެއްކުމުން ރާއްޖެ ބޮއިކޮޓު ކުރަން އެ ގައުމުގައި ކުރިއަށް ގެންދިޔަ ކެމްޕޭނަކާ އެކު އެވެ.
އެއާ އެކު، އިންޑިއާގެ އިންފުލުއެންސަރުންނާއި ފިލްމީ ތަރިން ރާއްޖެ އައުން މަދުވި އެވެ.
ވީ ކިހިނެއް؟ - އެމްއެމްޕީއާރުސީގެ މެނޭޖިން ޑިރެކްޓަރު އިބްރާހިމް ޝިއުރީ އިންޑިއާގެ ނޫހަކަށް ދެއްވި ބަސްދީގަތުމެއްގައި ދެ ގައުމުގެ ދެމެދުގައި ފަތުރުވެރިކަން ފުޅާކުރަން ކުރާ މަސައްކަތްތަކާ ބެހޭ ބައެއް ތަފްސީލު ވަނީ ހިއްސާކުރައްވާފަ އެވެ.
ތަފްސީލު - ޝިއުރީ ވިދާޅުވި ގޮތުގައި، މިދިޔަ މަހުގެ ނިިޔަލަށް މިއަހަރު އިންޑިއާއިން 71،381 ފަތުރުވެރިން ރާއްޖެއަށް އައިސްފައިވެ އެވެ.
"[އިންޑިއާގައި މިދިޔަ ހަފްތާގައި ބޭއްވި] ރޯޑްޝޯ ފަދަ ހަރަކާތްތަކުން އިންޑިއާއިން އަންނަ ފަތުރުވެރިންގެ އަދަދު އިތުރުވެ، ޓޮޕް ތިން މާކެޓުތަކުގެ ތެރޭގައި އިންޑިއާ އަލުން ހިމެނޭނެ ކަމުގެ ވަރަށް ބޮޑު އުންމީދެއް އެބައޮތް،" ޝިއުރީ ވިދާޅުވި އެވެ.
މިހާރު ވެސް ރާއްޖެ އާއި އިންޑިއާއާ ދެމެދު ފަސް އެއާލައިނަކުން ދަތުރުކުރަމުން އަންނައިރު، އޭނާ ވިދާޅުވީ ކަނެކްޓިވިޓީ އިތުރު ކުރުމަށްޓަކައި ރާއްޖޭގެ އެކި ސަރަހައްދުތަކާއި އިންޑިއާގެ އިތުރު ސިޓީތަކާ ދެމެދު ސީދާ ދަތުރުތައް ފެށޭނެ ގޮތްތައް ވެސް އަންނަނީ ބަލަމުންނެވެ.
ގުޅުންހުރި ކަމެއް - އެމްއެމްޕީއާރުސީއިން 'ވެލްކަމް އިންޑިއާ'ގެ ނަމުގައި ނިއު ދިއްލީ، މުމްބާއި އަދި ބެންގަލޫރުގައި ރޯޑްޝޯތަކެއް ވަނީ ބާއްވާފަ އެވެ.
މި ރޯޑްޝޯގެ މަގްސަދަކީ:
-
ރާއްޖޭގެ ރީތި ގޮނޑުދޮށްތަކާއި ރިސޯޓްތައް އަދި ހިތްގައިމު ގެސްޓްހައުސްތަކާއި މުއްސަނދި ސަގާފީ ތަރިކަ ދައްކާލުން
-
ރޯޑްޝޯގައި ބައިވެރިވާ ފަރާތްތަކަށް ރާއްޖޭގެ މެހެމާންދާރީ ތަޖުރިބާކުރުމުގެ ފުރުސަތާއި ވިޔަފާރީގެ ފުރުސަތުތަކުގެ މައުލޫމާތު ދިނުން
-
ކޮންމެ ރޯޑްޝޯއެއްގައި ހަދިޔާއެއް ދޭނެ؛ ނަސީބުވެރި ފަރާތްތަކަށް ރާއްޖޭގައި ޗުއްޓީއެއް ހޭދަކޮށްލުމުގެ ފުރުސަތު ލިބޭނެ
-
ހަދިޔާ ދޭ ފަރާތްތަކުގެ ތެރޭގައި ކަނޑިންމަ މޯލްޑިވްސް، ނޯވާ މޯލްޑިވްސް، އެރީނާ ހޮޓެލްސް، ކާނި ހޮޓެލްސް، ވިލާ ނޯޓިކާ، ސިއްރު ފެން ފުށި، ހޮލިޑޭ އިން ކަންޑޫމާ އަދި އަލީލާ ކޮތައިފަރު މޯލްޑިވްސް ހިމެނޭ