އަންހެނުންގެ ދުވަހުގެ މުނާސަބަތުގައި އެމްޕީއެލްއިން ބޭއްވި ހަފްލާގައި އެ ކުންފުނީގެ ޑެޕިއުޓީ ސީއީއޯ އިބްރާހިމް އަބްދުﷲ. (ފޮޓޯ/އެމްޕީއެލް)
އެމްޕީއެލް މުވައްޒަފުންގެ ނަފްސާނީ ދުޅަހެޔޮކަމަށް ހާއްސަ ޗުއްޓީއެއް ތައާރަފްކޮށްފި
މުވައްޒަފުންގެ ނަފްސާނީ ދުޅަހެޔޮކަމަށް އެހީތެރިވުމަށް ޓަކައި ހުރިހާ އިނާޔަތްތައް ލިބޭ ގޮތަށް އެމްޕީއެލްއިން ޗުއްޓީއެއް ތައާރަފު ކޮށްފި އެވެ.
ވީ ކިހިނެއް؟ - އެމްޕީއެލްއިން އެ ޕޮލިސީ ތައާރަފު ކުރީ ބައިނަލްއަގްވާމީ އަންހެނުންގެ ދުވަހުގެ މުނާސަބަތުގައި ބޭއްވި ހަފްލާގަ އެވެ.
ތަފްސީލު - އެ ކުންފުނިން ބުނި ގޮތުގައި މިއީ މުވައްޒަފުންގެ ދިރިއުޅުމުގައި ދިމާވާ ޓްރައުމާތަކުން އަރައިގަތުމަށާއި ނަފްސާނީ ދުޅަހެޔޮކަމަށް އެހީތެރިވުމުގެ ގޮތުން، ހުރިހާ އިނާޔާތްތަކެއް ލިބޭ ގޮތަށް އެކުލަވާލާފައިވާ ޕޮލިސީއެކެވެ.
އެ ޕޮލިސީގެ ދަށުން ޗުއްޓީ ދިނުމަށް ޓްރައުމާގެ ގޮތުގައި ބަލާ ހާލަތްތަކަކީ:
-
ބައިގެން ދިއުން
-
މުވައްޒަފެއްގެ ދަރިއެއް ނިޔާވުން
-
މުވައްޒަފެއް ދިރިއުޅެމުން އަންނަ ގެ އަލިފާނުގެ ކާރިސާއަކުން ގެއްލުންވެ، ސަރުކާރުގެ ވަގުތީ ހިޔާއަށް ބަދަލުވުން
ބުނީ ކީކޭ؟ - އެ ޗުއްޓީ ތައާރަފްކުރި ސަބަބާ ގުޅޭ ގޮތުން ބުނީ ނަފްސާނީ ދުޅާހެޔޮކަމަކީ މުވައްޒަފުންގެ މަސައްކަތުގެ ފެންވަރާއި ގުޅިލާމެހިފައިވާ ކަމެއް ކަމަށެވެ. އަދި ދިރިއުޅުމުގައި ދިމާވާ "ޓްރޯއުމާ"ތަކަކީ އިތުރު އެހީއާ އެކު އެކަމަކުން އަރައިގަނެވޭނެ ކަންތައްތައް ކަމަށް ވެސް އެމްޕީއެލްއިން ބުންޏެވެ.