އިނގިރޭސި ރާނީ އުމުރުފުޅުން 96 އަހަރުގައި އަވަހާރަވެއްޖެ

ހަތްދިހަ އަހަރުގެ ދިގު މުއްދަތަކަށް ރަނިކަން ކުރެއްވުމަށް ފަހު އިނިގިރޭސި ރާނީ އެލިޒަބަތު II އުމުރުފުޅުން 96 އަހަރުގައި މިއަދު އަވަހާރަވެއްޖެ އެވެ.

ރާނީ އަވަހާރަވިކަން ޝާހީ އާއިލާގެ ސޯޝަލް މީޑިއާ އެކައުންޓުތަކުގައި ވަނީ އިއުލާންކޮށްފަ އެވެ. އަދި ރާނީގެ ދޮށީ ދަރިކަލުން ޗާލްސް މިހާރު ވަނީ ރަސްގެފާނަށް ވެވަޑައިގެންފަ އެވެ.

ރާނީގެ ހާލުކޮޅާ މެދު ޑޮކްޓަރުން ކަންބޮޑުވެފައިވާކަމުގެ ހަބަރު ބަކިންހަމް ޕެލެސް އިން މިއަދު ވަނީ ދީފަ އެވެ. ހާލުކޮޅު ދެރަވުމާ ގުޅިގެން ރާނީ ގެންދެވީ ބާއްވަވަން އޮތް ބައްދަލުވުމެއް ކެންސަލްކުރެއްވުމަށް ފަހު، ސްކޮޓްލެންޑްގެ އެބަޑީންގައި ހުންނަ ޝާހީ ގެކޮޅު ބެލްމޯރަލް ކާސްލްގައި އަރާމުކުރައްވަމުންނެވެ. އަދި އެކަމަނާއަށް ޒިޔާރަތްކުރެއްވުމަށް ޝާހީ އާއިލާގެ މެމްބަރުން ވަނީ އެ ތަނަށް ވަޑައިގެންފަ އެވެ.

މިހާރު ރަސްގެފާނު ޗާލްސް، 73، ހިމެނިވަޑައިގަންނަވާ ގޮތަށް ތިން ދަރިކަލުންނާއި ދަރިކަނބަލަކާއި މާމަ ވިދާޅުވާ އަށް ބޭފުޅުން އަދި މުނި މާމަ ވިދާޅުވާ 12 ބޭފުޅުން ރާނީގެ އެބަތިއްބެވި އެވެ. ރާނީގެ ފިރިކަލުން ޕްރިންސް ފިލިޕް މިދިޔަ އަހަރު ވަނީ އަވަހާރަވެފަ އެވެ.

ރާނީގެ ހާލުކޮޅު ދެރަވުމުގެ ހަބަރާ އެކު ދުނިޔޭގެ އެކި ކަންކޮޅުތަކުން ސިޔާސީ ލީޑަރުންނާއި އާއްމުން އައީ ސޯޝަލް މީޑިއާގައި އެކަމަނާ އަށާއި އާއިލާއަށް ހެޔޮ އެދުންތައް ފޮނުވައި ކަންބޮޑުވުމުގެ ޝުއޫރުތައް ފާޅުކުރަމުންނެވެ. އަދި އާއްމުން ވާރޭގެ ތެރޭގައި ބެލްމޯރަލް އާއި ބަކިންހަމް ޕެލެސް ދޮށަށް އެއްވެ ހިތާމައިގައި ކޮޅަށް ތިއްބެވެ.

އަވަހާރަވުމުގެ ދެ ދުވަސް ކުރިން ރާނީ ވަނީ އާ ބޮޑުވަޒީރު ލިޒް ޓްރަސް މަގާމަށް އައްޔަންކުރައްވައިފަ އެވެ. ބޮޑުވަޒީރުން އައްޔަންކުރެއްވުން ލަންޑަންގެ ބަކިންހަމް ޕެލެސްގައި ކުރިއަށް ގެންދެވުމުގެ އާދަކާދައިގެ ބޭރުން ރާނީ އަންގާރަ ދުވަހު ޓްރަސްއާ ބައްދަލުކުރެއްވީ އެކަމަނާ ހޫނު މޫސުން ހޭދަކުރައްވާ ބެލްމޯރަލްގަ އެވެ.

ފަހަކަށް އައިސް ރާނީއަށް ދަތުރުކުރެއްވުން ދައްޗެވެ. ރަސްމީ ކަންކަމުގައި ބައިވެރިވެވަޑައިގެންނެވުން މަދުކުރައްވައި އުނދަގޫފުޅު ޒިންމާތައް ވަނީ ޗާލްސްއާ ހަވާލުކުރައްވައިފަ އެވެ.

ރާނީގެ ރަނިކަމަށް 70 އަހަރު ފުރުނީ މިދިޔަ ފެބްރުއަރީ 6ގަ އެވެ. އެކަމަނާގެ ޕްލެޓިނަމް ޖުބިލީ ފާހަގަކުރުމަށް މިދިޔަ ޖޫން މަހު ހަތަރު ދުވަހުގެ ރަސްމިއްޔާތުތައް ބާއްވައިފައިވެ އެވެ. އެ އިހުތިފާލްތަކުގެ ތެރެއިން އާއިލާއާ އެކު ބަކިންހަމްގެ ޕެލެސްގެ ބެލްކަނީން ރާނީ އާއްމުންނަށް ފެނުނެވެ.

އިނގިރޭސި ތަހުތުގައި އެންމެ ގިނަ ދުވަސް ހޭދަކުރެއްވި ބޭފުޅަކަށް ސެޕްޓެމްބަރު 2015ގައި ރާނީ ވަނީ ވެވަޑައިގެންފަ އެވެ. އެކަމަނާ އޭރު ވިދާޅުވެފައި ވަނީ އެއީ ދުވަހަކު ވެސް ހޯއްދަވަން އުއްމީދުކުރައްވައިގެން ހުންނެވި ލަގަބެއް ނޫން ކަމަށެވެ. ހަމަ އެ ދުވަހު އެކަމަނާ ވަނީ ދުނިޔޭގެ ތާރީހުގައި، އެންމެ ދިގު މުއްދަތަކަށް ރެނދަލި ކުރެއްވި އަންހެން ބޭފުޅާ އަށް ވެސް ވެވަޑައިގެންފަ އެވެ. 

ބައްޕާފުޅު އަވަހަރާވުމުން އުމުރުފުޅުން 25 އަހަރުގައި ރާނީ އަށް ވެވަޑައިގެންނެވި އެލިޒަބަތު II އެ މަގާމަށް ވަޑައިގެންނުވުމުގެ ރަސްމިއްޔާތު އޮތީ 2 ޖޫން 1953ގަ އެވެ. މި އަހަރުގެ ޖޫން މަހު އެކަމަނާ ވަނީ ދުނިޔޭގެ ތާރީހުގައި ދެވަނަ އަށް އެންމެ ގިނަ ދުވަހު ތަހުތުގައި ދެމިހުންނެވި ބޭފުޅާގެ ޝަރަފް ހޯއްދަވައިފަ އެވެ. އެކަމަނާއަށް ވުރެ ގިނަ ދުވަހު ރެނދަލިކަން ކުރައްވާފައިވަނީ އުމުރުފުޅުން އެންމެ 4 އަހަރުގައި ރަސްކަލަކަށް ވެވަޑައިގެންނެވި ފްރާންސްގެ ލުއީ XIV އެކަންޏެވެ.

ރާނީ ވަނީ 1972ގައި ރާއްޖެއަށް ޒިޔާރަތެއް ކުރައްވައިފަ އެވެ.