ޕެލޭ، ވޯލްޑް ކަޕްގެ ތައްޓާ އެކު: އޭނާއަކީ ތިން ފަހަރު އެ ތަށި އުފުލައިލި ހަމައެކަނި ކުޅުންތެރިޔާ
ޕެލޭގެ ހަޔާތުން ބައެއް ސަފުހާތައް
އޭނާ ކާމިޔާބުކުރި ފުރަތަމަ ވޯލްޑް ކަޕްގެ ފައިނަލް މެޗުން މޮޅުވެގެން ބްރެޒިލްގެ ކީޕަރުގެ ކޮނޑުގައި ބޯ އަޅައިގެން ރުއި ވަގުތު ކަމަށް ވިޔަސް، ފުޓްބޯޅަ ކެރިއަރުގެ ފަހު މެޗުގައި ނިއު ޔޯކް ކޮސްމޮސްގެ ދަނޑުގައި، ދުނިޔެއަށް ބޭނުންވަނީ ކުޑަކުދިންނަށްޓަކައި 'ލޯބި، ލޯބި، ލޯބި' ކަމަށް ބުނެލި ވާހަކަކޮޅު ކަމަށް ވިޔަސް އަދި 'ގައުމީ ހަޒާނާއެއް' ކަމަށް ބަލައި، ބްރެޒިލުން ބޭރަށް އޭނާ ވިއްކާނުލެވޭ ގޮތަށް ސަންޓޯސްއަށް، އެ ގައުމުގެ އަސްކަރީ ސަރުކާރުން ހުރަސްއެޅި ހުރަސް ކަމަށް ވިޔަސް، ޕެލޭއަކީ ދުނިޔެ ދުށް އެންމެ އާދަޔާ ހިލާފު، އެންމެ މަޝްހޫރު އެއް ޝަހުސިއްޔަތެވެ.
އަހަރުގެ ފަހު ދެ ވަނަ ދުވަސް، 30 ޑިސެމްބަރު 2022ގައި، އުމުރުން 82 އަހަރުގައި، މަރުވި ކުޅުންތެރިޔާގެ ވަނަން، ޕެލޭ، ނީވޭ މީހަކު ދުނިޔޭގައި މަދުވާނެ އެވެ. ފުޓްބޯޅަ ދެކެ ލޯބިނުވާ މީހަކަށް ވެސް އެ ނަން އޮންނާނީ އިވިފަ އެވެ. އޭނާއަކީ ކާކުކަން އޮންނާނި އެނގިފަ އެވެ.
ފަގީރު އާއިލާއަކަށް ނިސްބަތްވާ ޕެލޭ ދުނިޔޭގެ ފުޓްބޯޅައިގެ ތަރިއަކަށް ވީ އެންމެ 17 އަހަރުގަ އެވެ. ބްރެޒިލްގެ ފުރަތަމަ ވޯލްޑް ކަޕް 1958ގައި ކާމިޔާބުކުރި ފައިނަލް މެޗުގައި ދެ ލަނޑު ޖެހި އެވެ. އެހާ ކުޑަ ކުއްޖަކަށް ވާތީ، އޭނާގެ އިހުސާސްތައް، ސީނިއަ ކުޅުންތެރިންނަށް ވުރެ ބޮޑެވެ. ސްވިޑްން 5-2 އިން ބަލިކުރި މެޗަށް ފަހު ވޯލްޑް ކަޕް އުފުލާލުމަކީ އެ އުމުރުގައި ދުނިޔޭގެ ތާރީހުން ފެނުނު ބޮޑެތި ކާމިޔާބީތަކެވެ.
އޭގެ ފަހުން 1962ގެ ވޯލްޑް ކަޕާއި 1970ގެ ވޯލްޑް ކަޕް ބްރެޒިލުން ހޯދި އިރު ވެސް ޕެލޭއަކީ ޓީމުގެ އެންމެ މުހިންމު ކުޅުންތެރިޔާ އެވެ.
ޕެލޭ މުޅި ދުނިޔެ ފަތަހަކުރި އެވެ. ނައިޖީރިޔާގެ އެތެރޭގެ ހަނގުރާމަ، އޭނާގެ ދަތުރަށް، މެދުކަނޑާލި އެވެ. ސަންޓޯސް އިން ބޭރު ގައުމުތަކަށް ކުރި ދަތުރުތަކުގައި ޓިކެޓް ވިކި ހުސްވީ ހަމައެކަނި ޔޫރަޕްގައެއް ނޫނެވެ. ޕެލޭގެ ކުޅުން ދެކިލަން ބޭނުންވި އޭޝިއާގެ މީހުން ވެސް، އޭޝިއާގެ ގައުމުތަކުގައި ސަންޓޯސް ކުޅުނު މެޗުތަކަށް ދަނޑު ފުރާލި އެވެ.
ބްރެޒިލުން ބޭރަށް ޕެލޭ ވިއްކާލަން އަސްކަރީ ސަރުކާރުން 1960 ގައި ސަންޓޯސްއަށް ހުރަސްއެޅީ އޭނާއަކީ ގައުމީ ހަޒާނާއެއް ކަމަށް ކަނޑައަޅައިފަ އެވެ. އެކަމަކު އޭގެ 10 އަހަރު ފަހުން އެމެރިކާގެ ނިއު ޔޯކް ކޮސްމޯއަށް އޭނާ ބަދަލުވެ، އެމެރިކާގައި ފުޓްބޯޅައިގެ ފޯރި ހިއްޕާލި އެވެ.
ޕެލޭ ކުޅުން ހުއްޓާލީ 1977 ގައި އެމެރިކާގަ އެވެ. އޭގެ ހަތަރު އަހަރު ފަހުން މަޝްހޫރު ފިލްމީ ތަރި ސިލްވެސްޓަ ސްޓެލޯންއާ އެކު 'އެސްކޭޕް ޓު ވިކްޓަރީ' ފިލްމުގައި ޕެލޭ ހިމެނުނެވެ. މިއީ ފުޓްބޯޅައަށް ހާއްސަކޮށްގެން އުފެއްދި އެންމެ މަޝްހޫރު ފިލްމު ވެސް މެ އެވެ. ޕެލޭގެ އިތުރުން އިނގިރޭސި ވިލާތުގެ މަޝްހޫރު ބައެއް ކުޅުންތެރިން ވެސް ފިލްމުގައި ކުޅުންތެރިންގެ ގޮތުން ބައިވެރިވި އެވެ.
ޕެލޭ ސިފަކުރި ގޮތުގައި ފުޓްބޯޅައަކީ ހަމައެކަނި ކުޅިވަރެއް ނޫނެވެ. އެއީ ޚާއްސަ އާޓެކެވެ. ފަންނީ މަސައްކަތެކެވެ. މަތީ އަދި އެހާމެ ހިތްގައިމު ހުނަރެކެވެ. ފުޓްބޯޅައިން ދުނިޔެ އެކުވެރިކޮށްދެ އެވެ. އިންސާނުންގެ މެދުގައި އޮންނަ ތަފާތު ނައްތާލަ އެވެ. ދުޝްމަނުން ވެސް ދަނޑު މަތީގައި އެއްކޮށް ވާދަކޮށް، ހިތްހަމަޖެހުން ހޯދި އެވެ.
ޕެލޭގެ މުޅި އުމުރު އޭނާ ހޭދަކުރީ ލޯބި ދެއްކުމުގަ އެވެ. ލޯބި ދިނުމުގަ އެވެ. ދުނިޔެއަށް އޭނާ ފެނުނީ އެގޮތަށެވެ.
ކުޅިވަރުގެ ދުނިޔޭގައި ޕެލޭ ވަރުގެ ޝަހުސިއްޔަތެއް ނުއުފެދެ އެވެ. އޭނާގެ ނުފޫޒު ގަދަ ހަޔާތުގައި ފެނުނު މަންޒަރުތަކަށް ބަލާއިރު އެފަދަ ދެވަނަ ޝަހުސިޔެއް އުފެދިދާނެތޯ ވެސް ސުވާލުކުރެވެ އެވެ.