ވަގަށް ނެގި ކަމަށް ބެލެވޭ ގޮނޑި މީހަކު ގެންދަނިކޮށް ހުއްޓުވައިގެން ފުލުހުން ސުވާލު ކުރަނީ. (ދައުރު ފޮޓޯ)
ވަގަށް ނެގި 5،000ރ.ގެ ފުރޮޅުލީ ގޮނޑި ފެނުނުއިރު ނީލަމުގައި 150ރ.އަށް ވިއްކާލައިފި
ނުކުޅެދުންތެރިކަން ހުންނަ މީހެއްގެ ފުރޮޅުލީ ގޮނޑި ގެއްލިގެން ހޯދަމުން ދަނިކޮށް، މީހަކު ނީލަން ފިހާރަ އިން 150ރ.އަށް މިއަދު އެ މޮޑެލްގެ ގޮނޑިއެއް ގަނެގެން ގެއަށް ގެންދަނިކޮށް އަތުލައިގެންފި އެވެ. އެ ގޮނޑީގެ އަސްލު އަގަކީ 5،000ރ. އެވެ.
ވީ ކިހިނެއް؟ - ގެއްލިފައިވަނީ ނުކުޅެދުންތެރިކަން ހުންނަ މީހެއް ކަމަށްވާ އަހްމަދު އަލީފްގެ ގޮނޑި އެވެ. އެ ގޮނޑި ގެއްލުމާ އެކު، އާއިލާގެ ފަރާތުން ވަނީ މޯލްޑިވްސް އެސޯސިއޭޝަން އޮފް ޕާސަންސް ވިތު ޑިސްއެބިލިޓީ (އެމްއޭޕީޑީ)އަށް ވެސް އެކަން ރިޕޯޓުކޮށްފަ އެވެ. އެ ގޮނޑި މަގުމަތިން ގެންދަނިކޮށް ފެނިފައިވަނީ އެ ޖަމިއްޔާގެ ލީގަލް ޑިރެކްޓަރު ހުސައިން ރަމީޒަށެވެ.
ތަފްސީލު - ރަމީޒު މިރޭ 'ދައުރު'އަށް ވިދާޅުވީ، އޭނާ މަގުމަތިން ދަނިކޮށް މީހަކު އެ ގޮނޑި ގެންދާ ތަން ފެނުނު ކަމަށެވެ. އެގޮތުން:
-
އެ ވަގުތު އެ ސަރަހައްދުން ދިޔަ ޓްރެފިކް ފުލުހުންގެ އެހީތެރިކަމާ އެމީހާ ހުއްޓުވި
-
އެމީހާ އާ ސުވާލު ކުުރުމުން ބުނީ، ނީލަން ފިހާރައިން މީހަކު ގަތް ގޮނޑިއެއް ޑެލިވަރީކޮށްލަނީ ކަމަށް
"ސީދާ އެ ގޮނޑިކަމެއް އަދި ޔަގީނެއް ނޫން. އެކަމަކު ހަމަ ވަރަށް ގާތް އެއީ އެ ގޮނޑިކަން. ހަމަ އެއް މޮޑެލްއެއް،" ރަމީޒް ވިދާޅުވި އެވެ.
'ދައުރު'ގެ ނޫސްވެރިން މިރޭ 7:30ހާއިރު އެ ސަރަހައްދަށް ގޮސް މަޑުކުރި ފަހުން، ގޮނޑި ގަތް މީހާ ވެސް އެ ތަނަށް އަ އެވެ. އުމުރުން ދުވަސްވީ އެ މީހާ ފުލުހުން ކައިރީ ބުނީ، އެ ގޮނޑި ނީލަން ފިހާރަ އިން ގަތީ 150ރ.އަށް ކަމަށެވެ.
"ޑެލިވަރީ ކުރި މީހާ ބުނީ، އޭނާއަށް 20ރ. ދިނުމުން އޭތި ގަތް މީހާގެ ގެއަށް ގެންގޮސްދިނީ ކަމަށް. ނޭނގެ ސީދާ އޭނަ ކަމެއް ވަގަށް ނެގީ ނުވަތަ އެހެން މީހަކު ނީލަން ފިހާރަ އިން ވިއްކާލީމަ އެ ގޮނޑި ގަތީ ކަމެއް،" ރަމީޒް ވިދާޅުވި އެވެ.
އަލީފްގެ މަަންމަ، ސަލްމާ އަލީ މިރޭ 'ދައުރު'އަށް ބުނީ، އެ ގޮނޑި ގެއްލުނީ މިއަދުގެ މެންދުރުފަހުގެ ވަގުތެއްގަ ކަމަށެވެ.
"މިއަދު މެންދުރު މޫދަށް ގޮސް އައިސް، މަގުމަތީގައި ހިއްކަން ބަހައްޓާފައި ހުއްޓާ ގެއްލުނީ،" ސަލްމާ ބުންޏެވެ.
"ވަރަށް ދެރަވެފައި އަލީފް ހުރީ. އެއީ ދަރިފުޅުގެ ދެ ފައި."
ސަލްމާ ބުނީ، ފުރޮޅުލީ ގޮނޑިއެއް ހިފައިން ދިޔަ މީހަކު ހުއްޓުވިކަން އެމްއޭޕީޑީން އާއިލާގެ ސަމާލުކަމަށް މިހާރު ގެނެސްފައިވާ ކަމަށެވެ.
"މިހާރު [އަލީފް] ވަރަށް އުފަލުން އިނީ ފެނުނު ވާހަކަ ބުނީމަ،" ސަލްމާ ބުންޏެވެ.
ގޮނޑި ފެނުމުގެ ފަސް ގަޑިއިރު ކުރިން އެމްއޭޕީޑީގެ ބާނީ އަމިނަތު އިބްރާހިމް ވަނީ އެ ގޮނޑި ގެއްލުނުކަން އާންމުންގެ ސަމާލުކަމަށް ގެނައުމަށް ފޭސްބުކްގައި ޕޯސްޓެއް ކޮށްފަ އެވެ. އެ ޕޯސްޓުގައި އޭނާ ވިދާޅުވީ، މިކަމުގެ ސަބަބުން އަލީފަށް އެއްވެސް ތަނަކަށް ދެވޭނެ ގޮތެއް ނެތި، ގޭގައި އިންނަން މަޖުބޫރުވެފައިވާ ކަމަށެވެ.
"ވަގަށް ނުނަގަނީ ކޯއްޗެއްތޯ.. މުޖުތަމައުގެ ހާލަތު މި ވަނީ ވަރަށް ދަށު ދަރަޖައަކަށް ވެއްޓިފައި،" އޭނާ ލިޔުއްވާފައިވެ އެވެ.
ފުލުހުންގެ ބަސް - ފުލުހުންގެ ތަރުޖަމާނަކު މިރޭ 'ދައުރު'އަށް ވިދާޅުވީ، ބަނަފްސާ މަގުން ފުރޮޅުލީ ގޮނޑިއެއް ހިފައިގެން ދިޔަ މީހަކު އެ މުއައްސަސާގެ ބެލުމުގެ ދަށަށް ގެންގޮސްފައިވާ ކަމަށެވެ.
"ގޮނޑީގެ ވެރިފަރާތް ހޯދުމުގެ މަސައްކަތް ދަނީ ކުރަމުން،" ތަރުޖަމާނު ވިދާޅުވި އެވެ.
އެނގުން މުހިންމު - ނީލަން ފިހާރައިން މި ގޮނޑި 150ރ.އަށް އާންމު މީހަކު ގަތް އިރު، ވަރަށް އާކޮށް ހުރި އެ ގޮނޑިއަށް އެއްވެސް ގެއްލުމެއް ލިބިފައެއެ ނުވެ އެވެ. ސަލްމާ ބުނި ގޮތުގައި، ވަގަށް ނެގި ގޮނޑީގެ އަގަކީ 5،000ރ. އެވެ.
ކޮމެންޓް (6)
އައްޓަމަސް
އުދާސް
ކުޑަ ސޮރު
ޖުލައި
މަމެން
ހަކީމް