އައްޑޫ ފޭދޫ މަތިން ނަގާފައިވާ ފޮޓޯއެއް (ފޮޓޯ/އައްޑޫ ސިޓީ،ފޭސްބުކް ޕޭޖް)
އައްޑޫގެ ސިލްސިލާ މާރާމާރީތަކާ ގުޅިގެން ހައްޔަރުކުރި 3 މީހުން ދޫކޮށްލައިފި
އައްޑޫ، ފޭދޫގައި ހިންގި ސިލްސިލާ ގްރޫޕު މާރާމާރީތަކާ ގުޅިގެން ހައްޔަރުކުރި ތިން މީހުން ވެސް ކޯޓުން ދޫކޮށްލައިފި އެވެ.
އެނގުން މުހިންމު - ފޭދޫގެ ހިންގި ސިލްސިލާ މާރާމާރީތަކުގައި މި މަހުގެ ދެ ވަނަ ދުވަހު އުމުރުން 21 އަހަރުގެ ޒުވާނަކު ވަނީ މަރާލައިފަ އެވެ.
ބުނީ ކީކޭ؟ - ފުލުހުންގެ މީޑިއާ އޮފިޝަލް 'ދައުރު'އަށް މިއަދު ވިދާޅުވީ ފޭދޫގެ މާރާމާރީތަކާ ގުޅިގެން ހައްޔަރު ކުރި މީހުންގެ ތެރެއިން ތިން މީހަކު މިހާރު ދޫކޮށްލާފައިވާ ކަމަށެވެ.
"ކުޑަ ދެ ކުދިންގެ ބަންދުގެ މުއްދަތު އަދި ހަމަ ނުވޭ. ބާކީ ތިބި ތިން މީހުންގެ ބަންދާ މެދު ގޮތެއް ނިންމަން ކޯޓަށް ގެންދިއުމުން ކޯޓުން އެ މީހުން ދޫކޮށްލީ،" އޮފިޝަލް ވިދާޅުވި އެވެ.
ތަފްސީލު - އެ ފަސް މީހުންގެ ތެރޭގައި ހިމެނެނީ:
-
މާރާމާރީއާ ގުޅިގެން ތުހުމަތު ކުރެވޭ: 16 އަހަރުގެ ކުއްޖަކާއި 15 އަހަރުގެ ކުއްޖެއް
-
ރަށުގެ އަމަން ނަގާލަން އުޅުމުގެ ތުހުމަތުގައި: 18 އަހަރުގެ ދެ މީހަކާއި 29 އަހަރުގެ މީހެއް
ޖޫން 2 ވަނަ ދުވަހުގެ ރޭ ދަންވަރު ހިންގި މާރާމާރީގައި މަރާލީ ސ. ފޭދޫ، ސޮލިޑް، މުހައްމަދު ޒަޔާން އެވެ. އޭނާ މަރައިލީ މަގުމަތީގައި ކަމަށް މީގެ ކުރިން ފުލުހުން ބުނި ނަމަވެސް، އެކަން ހިނގީ އޭނާ ދިރިއުޅޭ ގޭގެ ތެރޭގައިކަން 'ދައުރު'އަށް ވަނީ ކަށަވަރުވެފަ އެވެ.
މި މާރާމާރީއަކީ ދެ ގްރޫޕެއްގެ ދެމެދުގައި އުފެދުނު ހަމަނުޖެހުމަކާ ގުޅިގެންނާއި މަސްތުވާތަކެއްޗާ ގުޅުން ހުރި މާރާމާރީއެއްކަން އެނގިފައިވާ ކަމަށް ފުލުހުން މީގެ ކުރިން ބުނެފައިވެ އެވެ.
އެ މާރާމާރީއަށް މިރޭ ދެ ހަފުތާ ވާއިރު، މި މައްސަލައާ ގުޅިގެން އިތުރު މީހަކު އަދި ހައްޔަރެއް ނުކުރެ އެވެ.