މީހަކު އޭޓީއެމްއިން ޑޮލަރު ނަގަނީ (ފޮޓޯ/ބީއެމްއެލް)
ބޭރު ފައިސާގެ އާމްދަނީއަށް 222 މިލިއަން ޑޮލަރު އިތުރުވެއްޖެ
މިދިޔަ އަހަރު ދައުލަތަށް ލިބުނު ބޭރު ފައިސާގެ އާމްދަނީއަށް 222.4 މިލިއަން ޑޮލަރު އިތުރުވެފައިވާ ކަމަށް ދައުލަތުގެ ޓެކްސް އިދާރާ، މީރާގެ ތަފާސްހިސާބުތަކުން ދައްކައިފި އެވެ.
ވީ ކިހިނެއް؟ - މީރާގެ ތަފާސްހިސާބުތަކުން ދައްކާ ގޮތުގައި، މިދިޔަ އަހަރު ބޭރު ފައިސާ އިން ލިބުނު އާމްދަނީ އަކީ 889.10 މިލިއަން ޑޮލަރެވެ. އެއީ:
-
އޭގެ ކުރީ އަހަރު، 2021އާ އަޅާ ބަލާއިރު 222.4 މިލިއަން ޑޮލަރު ނުވަތަ %42ގެ އިތުރު އަދަދެއް
-
2021ގައި ލިބިފައި ވަނީ 626.2 މިލިއަން ޑޮލަރު
ތަފްސީލް - ޑޮލަރުން ލިބުނު އާމްދަނީގެ ތެރެއިން އެންމެ ބޮޑު އެއްޗެއް ލިބިފައި ވަނީ ޓޫރިޒަމް ދާއިރާގެ ޖީއެސްޓީ ނުވަތަ ޓީޖީއެސްޓީންނެވެ. އެގޮތުން، ޓީޖީއެސްޓީން 430.6 މިލިއަން ޑޮލަރު ލިބިފައިވެ އެވެ.
އޭގެ އިތުރުން، ޑޮލަރުން އާމްދަނީ ލިބުނު ދާއިރާތަކަކީ:
-
ރިސޯޓްތަކުގެ ކުލީގެ މުއްދަތު އިތުރުކުރުން - 127.5 މިލިއަން ޑޮލަރު
-
ރިސޯޓް ކުލި - 125.2 މިލިއަން ޑޮލަރު
-
ގްރީން ޓެކްސް - 63.5 މިލިއަން ޑޮލަރު
-
ޑިޕާޗާ ޓެކްސް - 51.4 މިލިއަން ޑޮލަރު
ބޭރު ފައިސާ އިން ލިބުނު އާމްދަނީ ރަނގަޅުވީ ޓޫރިސްޓުން ރާއްޖެ އައި މިންވަރު މިދިޔަ އަހަރު ރަނގަޅުވުމާ ގުޅިގެންނެވެ. އެގޮތުން، ކޮވިޑްގެ ކުރިއާ ގާތްގަނޑަކަށް އެއްވަރަކަށް ޓޫރިސްޓުން ވަނީ މިދިޔަ އަހަރު ރާއްޖެ އައިސްފަ އެވެ.
އެނގުން މުހިންމު - މިދިޔަ އަހަރު މީރާ މެދުވެރިކޮށް އާމްދަނީގެ ގޮތުގައި ދައުލަތަށް ވަނީ ޖުމްލަ 22 ބިލިއަން ރުފިޔާ ލިބިފަ އެވެ. އެއީ އޭގެ ކުރީ އަހަރަށް ވުރެ 6.3 ބިލިއަން ރުފިޔާ އިތުރު އަދަދެކެވެ.