ގދ. ފިޔޯރީއަށް އުދަ އަރައި ބޮޑެތި ގެއްލުންތަކެއް ވަނީ ލިބިފައި. (ފޮޓޯ/ ހިލްޓަން އާޒިފް، ފޭސްބުކް)
20 އަށް ވުރެ ގިނަ ރަށަށް އުދައިގެ އަސަރު ކުރި: އެންޑީއެމްއޭ
ރާއްޖެއަށް މިހާރު ކުރަމުންދާ ވިއްސާރައިގައި 20 އަށް ވުރެ ގިނަ ރަށަކަށް މިއަދު އުދަ އަރައި އެކި ވަރުގެ ގެއްލުންތައް ލިބިފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން މިރޭ ބުނެފި އެވެ.
ވީ ކިހިނެއް؟ - މެޓް އޮފީހުން ވަނީ އުދައަރާނެ ކަމަށް ލަފާކޮށް މެދު ރާއްޖެ ތެރޭގެ އަތޮޅުތަކުން ފެށިގެން ދެކުނުގެ އަތޮޅުތަކަށް ވައިޓް އެލާޓް ނެރެފަ އެވެ. އެލާޓް ނެރެފައިވާ ސަރަހައްދުތަކަށް ހަވީރުން ފެށިގެން ދަނީ އުދަރައަރަމުންނެވެ.
-
އިތުރަށް ކިޔާލަން - އައްޑޫ އާއި ބައެއް ރަށްތަކަށް އުދަ އަރައި ފެނު އަޑީގައި
ތަފްސީލް - އުދަ އެރި ރަށްރަށުގެ ހާލަތާ ގުޅޭ ގޮތުން އެންޑީއެމްއޭ އިން ބުނީ މެދު ރާއްޖެތެރެ އާއި ދެކުނުގެ ހަތް އަތޮޅަކަށް އުދަ އަރައި އެކި ވަރުގެ ގެއްލުން ލިބިފައިވާ ކަމަށެވެ.
ތ. އަތޮޅު
ތ. އަތޮޅުގެ އަށް ރަށަކަށް އުދަ އަރާފައިވާ ކަމަށް އެންޑީއެމްއޭ އިން ބުންޏެވެ. އެގޮތުން، އެ ރަށްރަށުގެ މީހުން ދިރިއުޅޭ ގެތަކަށް ލޮނުވަދެ، އެކި ވަރުގެ ގެއްލުން ލިބިފައިވާ ކަމަށް އެމްޑީއެމްއޭ އިން ބުންޏެވެ. އެގޮތުން ގެއްލުންވި ރަށްތަކަކީ:
-
ކިނބިދޫ: އަށް ގެ
-
ގާދިއްފުށި: 35 ގެ
-
މަޑިފުށި: 60 ގެ
-
ދިޔަމިގިލި: ފަސް ގެ
-
ވޭމަންޑޫ: 10 ގެ
-
ތިމަރަފުއްޓަށް ވެސް އުދައިގެ އަސަރު ކުރި
-
ގުރައިދޫގައި މީހުން ދިރިއުޅޭ ހިސާބަށް އުދައިގެ އަސަރުކުރި ނަމަވެސް، ގޭގެއަށް ފެން ވަދެފައެއް ނުވޭ
ލ. އަތޮޅު
-
މާވަށަށް އުދަ އަރައި ހަތަރު ގެއަކަށް އެކި ވަރުގެ ގެއްލުން ލިބުނު
ގއ. އަތޮޅު
-
ކޮލަމާފުއްޓަށާއި މާމެންދުއަށް ކޮންމެވެސް ވަރަކަށް އަސަރުކޮށްފައިވޭ
ގދ. އަތޮޅު
-
އެ އަތޮޅުގެ ފަސް ރަށަކަށް ވަރަށް ބޮޑަށް އުދައިގެ އަސަރުކޮށްފައިވޭ
-
މަޑަވެލީގެ %98 ގޭގެއަށް ލޮނުވަދެ، އެކި ވަރުގެ ގެއްލުން ލިބުނު
-
ފަރެސްމާތޮޑާގައި ގެއަކަށް ބޮޑެތި ގެއްލުންތަކެއް ލިބިފައިވޭ
-
ހޯނޑެއްދޫ، ފިޔޯރީ އަދި ރަތަފަންދުއަށް އުދަ އަރައި އެކި ވަރުގެ ގެއްލުން ލިބުނު
-
ފިޔޯރީގެ ދަނޑުތައް ވަރަށް ބޮޑަށް ހަލާކުވެފައިވާ ކަމަށް އެ ރަށު މީހުން ބުނޭ
އައްޑޫ
-
މަރަދޫގެ 50 ގެއަކަށް ލޮނު ވަދެފައިވޭ
-
އޭގެ ތެރެއިން ދެ ގެއަކުން މީހުން އެހެން ގެއަކަށް ބަދަލުކުރުމުގެ މަސައްކަތް މިހާރު ދަނީ ކުރަމުން
-
މަރަދޫފޭދުއަށް އުދަ އަރައި 30 ގެއަކަށް ލޮނުވަދެފައިވޭ
ޅ. އަތޮޅު
-
ކުރެންދުއަށް އުދައިގެ އަސަރުކުރި
-
ނައިފަރަށް ވާރޭވެހި، ފެން ބޮޑުވެގެން ފެން ހިންދުމުގެ މަސައްކަތް ދަނީ ކުރަމުން