ސްޕެނިޝް ލަ ލީގާގެ އާ ސީޒަން ފަށައިފި؛ ބައެއް މެޗުތައް މީޑިއާނެޓުން ދައްކާނެ

• އައިސް ޓީވީ (ޗެނަލް 100)

• އައިސް ސްޕޯޓްސް (ޗެނަލް 102)
  

• އައިސް ޕްލަސް (ޗެނަލް 888)
  

ލަ ލީގާގެ ޓީމުތަކާ ގުޅުނު ފާހަގަކޮށްލެވޭ ބައެއް ކުޅުންތެރިން

• ޕޮލެންޑް ގައުމީ ޓިމުގެ ކެޕްޓަން އަދި ފާއިތުވި ދެ ސީޒަންގައި މުޅި ޔޫރަޕުން އެންމެ ގިނަ ގޯލު ޖަހައި ރަންބޫޓު ހޯދި ލެވަންޑޯސްކީ މިފަހަރު ފެނިގެންދާނީ ސްޕެއިން ފުޓުބޯޅައިގެ އެންމެ ކާމިޔާބު އެއް ޓީމު ކަމަށްވާ ބާސެލޯނާ އިން

• ގޯލް ޖެހުމުގައި ކުޅަދާނަ ލެވަންޑޯސްކީ އުމުރުން 33 އަހަރުގައި ވެސް ބާސެލޯނާއަށް ވަރަށް މުހިންމު ކުޅުންތެރިއަކަށްވާނެކަން ޕްރީ ސީޒަން މެޗުތަކުން ވެސް ފެނިގެންދިޔަ؛ ނަމަވެސް ލަ ލީގާގެ އާ ސީޒަން ފަށަން ރޭ ބާސެލޯނާ ކުޅުނު މެޗުގެ ފުރަތަމަ 11ގައި ހިމެނުނު ލެވަންޑޯސްކީއަށް ގޯލެއް ޖެހޭ ގޮތެއް ނުވި
  

• ޖަރުމަނުގެ ބެޔާން މިއުނިކަށް އަށް އަހަރުގެ މުއްދަތަކަށް ކުޅުމަށް ފަހު ލެވަންޑޯސްކީ ބާސެލޯނާއާ ގުޅުނުއިރު އޭނާގެ ފުޓުބޯޅަ ކެރިއަރުގައި 600އަށް ވުރެ ގިނަ ގޯލު ވަނީ ޖަހާފައި
  

• ބްރެޒިލްގެ ޒުވާން ސަމްބާ ބޯއީ ރަފީނިއާ ހޯދުމަށް ޓްރާންސްފާ މާކެޓުގައި އިނގިރޭސި ކްލަބް ޗެލްސީއާ ވަރުގަދަ ހަނގުރާމައެއް ކުރުމަށް ފަހު، އޭނާގެ ސޮއި ވެސް ކާމިޔާބުކުރީ ބާސެލޯނާ އިން

• އަބަދުވެސް ބާސެލޯނާއަށް ކުޅެން ބޭނުންވެފައި ހުރި ރަފީނިއާ ވަނީ ޕްރީ ސީޒަންގައި ރަނގަޅު ކުޅުމެއް ދައްކާފައި؛ ބާސެލޯނާގެ އެންމެ ވާދަވެރި ޓީމް ރިއާލް މެޑްރިޑާ ދެކޮޅަށް ކުޅުނު ޕްރީސީޒަން މެޗުގައި ރަފީނިއާ ޖެހި ލަނޑު ފާހަގަކޮށްލެވޭ
  

• ބޯޅަ ގެންގުޅެން މޮޅު، ހަލުވި ކުޅުންތެރިއެއްގެ ގޮތުގައި ފާހަގަކުރެވޭ ރަފީނިއާގެ ފަރާތުން މި ސީޒަނުގައި ތަފާތު މޮޅު ކުޅުމެއް ފެންނާނެ ކަމަށް ގިނަ ބަޔަކު އުންމީދުކުރޭ؛ ރޭ ބާސެލޯނާ އިން ކުޅުނު މެޗުގެ ފުރަތަމަ ހާފުގައި އިދިކޮޅު ޓީމުގެ ގޯލަށް ނުރައްކާކުރި ނަމަވެސް، ރަފީނިއާއަށް ވެސް ގޯލެއް ނުޖެހޭ
  

• 2020 ވަނަ އަހަރު ޗެލްސީން ޗެމްޕިއަންސް ލީގު ކާމިޔާބުކުރިއިރު އެ ޓީމުގެ ޑިފެންސްގައި މޮޅު ކުޅުމެއް ދައްކައި އެންމެ މުހިންމު ދައުރެއް އަދާކުރި ޖަރުމަނުގެ ރުޑިގާ މި ސީޒަންގައި ފެނިގެންދާނީ ސްޕެއިންގެ ފުޓުބޯޅަ ރަސްގެފާނު އަދި އެންމެ ފަހުގެ ޗެމްޕިއަން ރެއާލް މެޑްރިޑުން

• ފިޒިކަލީ ވަރުގަދަ އަދި ޓެކުލް ކުރަން މޮޅު ރުޑިގާ، އިދިކޮޅު ޓީމުތަކުގެ އެޓޭކްތައް ހުއްޓުވުމުގައި ރެއާލް މެޑްރިޑް ޑިފެންސްގައި އެންމެ މުހިއްމު ދައުރެއް މި ސީޒަނުގައި އަދާކުރާނެ އެއް ކުޅުންތެރިއަށް ވާނެ؛ ޖަރުމަނު ގައުމީ ޓީމުން ބަރާބަރަށް ޖާގަ ހޯދަމުން އަންނަ ރުޑިގާ އަކީ ޑިފެންސްގައި ހުރެ ލިބޭ ފުރުސަތުތަކުގައި އެޓޭކްގައި ވެސް ބައިވެރިވެ، ގޯލު ޖަހާ ކުޅުންތެރިއެއް
  

• ފްރާންސްގެ އެންމެ އުންމީދީ އެއް ތަރި، އުމުރުން 22 އަހަރުގެ ޓޫކަމެނީގެ ސޮއި ހޯދުމަށް މި ޓްރާންސްފާ މާކެޓުގައި ގިނަ ކްލަބްތަކުން ކުރި މަސައްކަތަށް ނިމުން އައީ ބޮޑު ފީއަކަށް ފްރާންސްގެ މޮނާކޯއިން ރެއާލް މެޑްރިޑްއަށް އޭނާ ސޮއި ކުރުމުން

• ޓީމުގެ މެދުތެރެއިން ޑިފެންސިވް މިޑްފީލްޑަރެއްގެ ރޯލު އަދާކުރާ ޓޫކަމެނީ އަކީ ކުރިއަށް ރީތި ބޯޅަތަކެއް ލައިދިނުމުގެ ގާބިލުކަންވެސް ހުރި ކުޅުންތެރިއެއް 

• މިދިޔަ އަހަރު ފްރާންސްގެ ގައުމީ ޓީމުން ޖާގަ ހޯދުމަށް ފަހު ޓޫކަމެނީ އަންނަނީ ބަރާބަރަށް ފްރާންސްގެ ގައުމީ ޓިމުން ޖާގަ ހޯދަމުން
  

• ދުނިޔޭގެ އެންމެ ބޮޑެތި ލީގުތަކުގައި ކުޅެފައިވާ ބެލްޖިއަމްގެ ތަޖުރިބާކާރު ކުޅުންތެރިޔާ ވިޓްސެލް މި ސީޒަނުގައި ފެނިގެންދާނީ ސްޕެނިޝް ލީގުގެ އެތުލެޓިކޯ މެޑްރިޑުން 

• ބެލްޖިއަމްގެ ގައުމީ ޓީމަށް 124 މެޗު ކުޅެފައިވާ އުމުރުން 33 އަހަރުގެ ވިޓްސެލް އަކީ މެދުތެރެއިން ޑިފެންސް އަދި އެޓޭކުގައި ވަރުބަލިކަމެއް ނެތި 90 މިނެޓު ބައިވެރިވާ ބުންވަރު ގަދަ ކުޅުންތެރިއެއް

• ގޯލާ ރައްޓެހި ވިޓްސެލް ވަނީ ކެރިއަރުގައި 100އަށް ވުރެ ގިނަ ގޯލު ޖަހާފައި 

• މީގެ ކުރިން ޕޯޗުގަލް، ރަޝިއާ އަދި ޖަރުމަނު ލީގުގައި ކުޅެފައިވާ ވިޓްސެލްގެ ތަޖުރިބާގެ އެހީގައި އެޓްލެޓިކޯ މެޑްރިޑަށް ކުރިއެރުންތަކެއް ލިބޭނެކަން ޔަގީން