ޓީ-ޖެޓީއާ ހަވާލުވާން ސިޓީ ކައުސިލުން ހިނގައްޖެ

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބަލަހައްޓަމުން އަންނަ މާލޭ ޓީޖެޓީ އަކީ މާލޭ ސިޓީ ކައުންސިލްގެ އަމިއްލަ ބިމެއް ކަމަށާއި، އެ ތަން ހަވާލުކުރަން ދިން މުއްދަތު ހަމަވެފައިވާ ކަމަށް ބުނެ އެ ތަނާ ހަވާލުވާން ކައުންސިލުން މިއަދު ހިނގައްޖެ އެވެ.

އެނގުން މުހިއްމު - ޓީޖެޓީ އެމްޕީއެލްއާ ހަވާލުކޮށްފައި ވަނީ، މާލޭ ސިޓީގެ މިހާރުގެ މޭޔަރު، ޑރ. މުހައްމަދު މުއިއްޒު، ހައުސިން މިނިސްޓަރުކަމުގައި ހުންނަވައި 2015ގަ އެވެ.  

ވީ ކިހިނެއް؟ - މިދިޔަ މަހުގެ 8ގައި ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވިދާޅުވެފައި ވަނީ:

ޓީޖެޓީ ހަވާލުކުރަން އެމްޕީއެލްއަށް ދިން 90 ދުވަހުގެ މުއްދަތު ހަމަވީ މި މަހުގެ 12ގަ އެވެ. އެހެންކަމުން އެ ދުވަހު ކައުންސިލުން ޓީޖެޓީއާ ހަވާލުވާން ކުރަން ޖެހޭ އެންމެހާ ކަންކަން ކުރުމަށް ކައުންސިލުން އޮތީ ފާސްކޮށްފަ އެވެ.

ތަފްސީލް - އެމްޕީއެލް އަށް ދިން މުއްދަތު ހަމަވިތާ ހަފްތާއެއް ފަހުން، މިއަދު ސިޓީ ކައުންސިލުން ވަނީ ޖެޓީއާ ހަވާލުވާން އެ ސަރަހައްދަށް ގޮސްފަ އެވެ. ޖެޓީއާ ހަވާލުވާން ބައެއް ކައުންސިލަރުން މިހާރު ތިއްބެވީ ޖެޓީ ސަރަހައްދުގަ އެވެ.

އެމްޕީއެލްގެ ބަސް - އެމްޕީއެލް އިން މީގެކުރިން ބުނެފައި ވަނީ، ޖެޓީއާ ގުޅޭގޮތުން ހައުސިން މިނިސްޓްރީއާ އެކު ސޮއިކޮށްފައިވާ އެއްބަސްވުމުގައި ވަކި މުއްދަތެއް ބަޔާންކޮށްފައި ނެތް ކަމަށާއި ޓީޖެޓީ އެމްޕީއެލް އަތުން ނެގި ނަމަވެސް އެކަން ކުރެވޭނީ ހައުސިން މިނިސްޓްރީއަށް ކަމަށެވެ.

މޭޔަރުގެ ބަސް - ނަމަވެސް މޭޔަރު މުއިއްޒު ވިދާޅުވީ ލާމަރުކަޒީ ގާނޫނުގެ ދަށުން، މާލޭގެ ބަނދަރުތައް ކައުންސިލާ ހަވާލުކޮށްފައިވާ ކަމަށެވެ. އަދި މުނިސިޕަލްޓީ ޒަމާނުން ފެށިގެން ވެސް ޓީޖެޓީ އަކީ ކައުންސިލްގެ ރަޖިސްޓްރީގައި އޮތް ތަނެއް ކަމަށެވެ.

"އަޅުގަނޑުމެން ބޭނުން ވަނީ މާލޭގެ ރައްޔިތުންނަށް ހިދުމަތް ކުރުމަށްޓަކައި އެ ތަނުން ލިބޭ އާމްދަނީ މާލޭ ރައްޔިތުންނަށް ހޯދައިދިނުމަށް. ސަރުކާރުގެ ކުންފުންޏަކަށް މާލޭ ރައްޔިތުންގެ ބިމަކުން ލިބޭ ފައިސާ ގޮސް ކުންފުނީގެ ބޭނުން ކުރުމަކީ މީ ކޮން ހަމައެއްތޯ؟" މުއިއްޒު މީގެކުރިން ވިދާޅުވެފައިވެ އެވެ.

އިތުރަށް ކިޔާލަން -