ސިޔާސީ ޕާޓީތަކުގެ ގާނޫނަށް ގެންނަން ފެންނަ އިސްލާހުތަކާ ގުޅޭ ގޮތުން އިލެކްޝަންސް ކޮމިޝަނުގެ މެމްބަރުން މަޖިލީހުގެ މިނިވަން މުއައްސަސާތަކުގެ ކޮމިޓީގައި. (ފޮޓޯ/ މަޖިލީސް)
ސިޔާސީ ޕާޓީތަކަށް ފައިސާ ދޭ އުސޫލު ބަދަލުކުރަން ލަފާ ދޭން ހުށަހަޅައިފި
ސިޔާސީ ޕާޓީތަކަށް ފައިސާ ދޭ އުސޫލު ބަދަލުކުރުމަށް އިލެކްޝަންސް ކޮމިޝަނުން ދިން ލަފަޔާ އެއްގޮތަށް، ސިޔާސީ ޕާޓީތަކުގެ ގާނޫނަށް އެ އިސްލާހު ހުށަހަޅަން ސަރުކާރަށް ލަފާ ދިނުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފި އެވެ.
ވީ ކިހިނެއް؟ - މިގޮތަށް ސަރުކާރަށް ލަފާ ދިނުމަށް ކޮމިޓީން ނިންމީ، ސިޔާސީ ޕާޓީތަކަށް މީހުން ވެއްދުމާއި ވަކިކުރުމުގައި އަމަލު ކުރާ އުސޫލާ ގުޅޭ ގޮތުން ކަންބޮޑުވުން ފާޅުކުރައްވައި ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގް ހުށަހެޅުއްވި މައްސަލަ ދިރާސާކުރުމަށް ފަހު އެކުލަވާލި ރިޕޯޓުގަ އެވެ. އިއްޔެގެ ޖަލްސާގައި އެ ކޮމިޓީ ރިޕޯޓު ވަނީ ތަޅުމަށް ހުަށަހަޅާފަ އެވެ. ނަމަވެސް، ކޮމިޓީ ރިޕޯޓަށް އަދި ވޯޓަކަށް ނާހަ އެވެ.
އެނގުން މުހިއްމު - މީހުންނަށް ސިޔާސީ ޕާޓީތަކަށް ނޭނގި ވައްދާ މައްސަލައިގައި ކަންބޮޑުވުން ފާޅުކުރައްވައި މުހައްމަދު އަބްދުﷲ ޝަފީގް މިދިޔަ ޖޫން މަހު ހުށަހެޅުއްވި އެ މައްސަލައިގައި ބުނެފައިވަނީ:
-
އެފަދަ އަމަލުތަކުގެ ސަބަބުން ވަކި ސިޔާސީ ފިކުރެއްގައި މަސައްކަތްކުރަން ބޭނުންވާ ފަރާތްތަކަށް އެ ހައްގު ގެއްލޭ ކަމަށް
-
ނުހައްގު މަންފާ އާއި ގެއްލުން ސިޔާސީ ޕާޓީތަކަށް ލިބޭ ކަމަށް
-
އެފަދަ ޝަކުވާތައް ބެލުމުގައި އިލެކްޝަންސް ކޮމިޝަނުން އަމަލުކުރަމުންދާ އުސޫލުގެ ސަބަބުން އިތުރު މައްސަލަތައް ކުރިމަތިވަމުންދާ ކަމަށް
-
ސިޔާސީ ޕާޓީ ނިޒާމަށް ރައްޔިތުންކުރާ އިތުބާރު ކުޑަވުމާއި އާންމު ރައްޔިތުންނަށް އިތުރު އުނދަގޫތައް ކުރިމަތިވަމުންދާކަމަށް
ތަފްސީލް - މި މައްސަލަ ދިރާސާކުރުމަށް ކޮމިޓީން ވަނީ އިލެކްޝަންސް ކޮމިޝަނާ ބައްދަލުކޮށް، އެ ކޮމިޝަނަށް ދިމާވާ ގޮންޖެހުންތަކާއި އެ ކަންކަމަށް ގެނެވިދާނެ ހައްލުތަކާ ގުޅޭ ގޮތުން މަޝްވަރާކޮށްފަ އެވެ.
ކޮމިޓީން ފާހަގަކޮށްފައިވާ ބައެއް މައްސަލަތަކަކީ:
-
އިނގިލީގެ ނިޝާނުގެ ސައްހަކަށް ކަށަވަރުނުކުރެވުން
-
ޕާޓީތަކުން މީހުން ވަކިކުރުމަށް ހުރި މައްސަލަތައް
-
ސައްހަ ނޫން ފޯމު ހުށަހަޅައިގެން ޕާޓީތަކަށް މީހުން ވައްދަނީ ދައުލަތުން ހަރަދުކުރާތީ ކަމަށް ބެލެވޭ
ސައްހަ ނޫން ފޯމު ހުށަހަޅައިގެން ޕާޓީތަކަށް މީހުން ވައްދާ ސަބަބެއް ކަމަށް، އިލެކްޝަނަށް ގަބޫލުކުރެވުނީ ދައުލަތުން ޕާޓީތަކަށް ހަރަދުކުރަމުން ދިއުމެވެ. އެ ކޮމިޝަނުން ފާހަގަކުރި ގޮތުގައި، ދައުލަތުން ޕާޓީތަކަށް ހަރަދުކުރުން ހުއްޓާލައިފި ނަމަ އެ މައްސަލައަށް ހައްލެއް ލިބޭނެ އެވެ.
އެނގުން މުހިންމު - މިހާރު ގާނޫނު އޮންނަ ގޮތުން:
-
ޕާޓީތަކަށް ފައިސާ ދެނީ 10،000 މެންބަރުން ހަމަވާ ޕާޓީތަކަށް އެކަނި، މެންބަރުންގެ އަދަދުގެ ނިސްބަތުން
-
އެ އަދަދަށް މެމްބަރުން ހަމަކުރުމަށް ބައެއް ޕާޓީތަކުން ސައްހަ ނޫން ފޯމު ހުށަހަޅައިގެން މެމްބަރުން އިތުރުކުރަން މަސައްކަތް ކުރުމަކީ ގިނަ ބައެއްގެ ޝަކުވާއެއް
"ދައުލަތުން ޕާޓީތަކަށް ފައިސާ ހަރަދުކުރަން ކޮންމެހެން ޖެހޭ ގޮތަށް ސިޔާސަތު ކަނޑައަޅާ ނަމަ، ސިޔާސީ ޕާޓީއަށް ރަޖިސްޓްރީވުމާއި ޕާޓީން ވަކިވުމަށް މިހާރު ކުރިމަތިވުންދާ ހުރަސްތައް ހައްލުކުރުމަށް އެ ކޮމިޝަނަށް ފެންނަ އެންމެ ރަނގަޅު އެއް ހައްލަކީ، އިންތިހާބުގައި ވޯޓު ލިބޭ އަދަދަށް ބަލައިގެން ޕާޓޫތަކަށް ފައިސާ ދޫކުރުމުގެ އުސޫލު ހަމަޖެއްސުންކަން އެ ކޮމިޝަނުން ފާހަގަކޮށްފައިވޭ،" ކޮމިޓީ ރިޕޯޓުގައި ބުނެފައިވެ އެވެ.
ކޮމިޓީގެ ނިންމުން:
-
ސިޔާސީ ޕާޓީތަކަށް މީހުން ވެއްދުމުގަ އާއި އެއް ޕާޓީން އަނެއް ޕާޓީއަށް މީހުން ބަދަލުކުރުމުގަ އާއި ޕާޓީން މެމްބަރުން ވަކިކުރުމުގައި އެ މީހެއްގެ އެއްވެސް ބައިވެރިވުމެއް ނެތި ބައެއް ޕާޓީތަކުން އަމަލުކުރަމުންދާ ލިޔުން ނިމުމަކަށް ގެނައުމަށް މިހާރުން މިހާރަށް ހުރި ބަދަލުތައް ގެނައުމަށް
-
މީހަކަށް ނޭނގި އެ މީހަކު އެހެން ޕާޓީއެއްގެ ދަފްތަރުގައި ހިމަނާފައި އޮވެއްޖެ ހާލަތެއްގައި އަދި އެއީ އޭނާގެ އެއްވެސް ބައިވެރިވުމެއް ނެތި ކޮށްފައިވާ ކަމެއްކަން ސާބިތުކޮށްދީފި ނަމަ، އޭނާގެ ރަޖިސްޓްރީ ކުރިން އޮތް ޕާޓީގައި ބޭއްވޭނެ އުސޫލެއް ކަނޑައެޅުން
-
ސިޔާސީ ޕާޓީގެ ގާނޫނު އިސްލާހު ކުރުން
"ސިޔާސީ ޕާޓީގެ ގާނޫނު އިސްލާހުކުރުމަށް އިލެކްޝަންސް ކޮމިޝަނަށް ފެންނަ އިސްލާހުތައް ހިމަނައިގެން އެ ކޮމިޝަނުން އެކުލަވާލި އިސްލާހުތައް މިނިވަން މުއައްސަސާތަކަށް ވެސް ލިބިފައިވާ ކަމަށާއި އެޓާނީ ޖެނެރަލްގެ އޮފީހުގެ ލަފަޔާ އެކު އެ އިސްލާހުތައް ބިލެއްގެ ގޮތުގައި ރައްޔިތުންގެ މަޖިލީހަށް ހުށަހެޅުމަށް ފެންނަ ކަމަށް،" ކޮމިޓީގެ ރިޕޯޓުގައި ބުނެފައިވެ އެވެ.
ފަސް މަންޒަރު - ވަގު ފޯމުގެ މައްސަލަ ބޮޑުވެ، އިލެކްޝަނުން ވަނީ މިހާރު ވެސް ބައެއް ފިޔަވަޅުތައް އަޅާފަ އެވެ. އެގޮތުން، ކޮމިޝަނުން ނިންމާފައި ވަނީ:
-
މިދިޔަ އޭޕްރީލް މަހުން ފެށިގެން ލިބިފައި ހުރި ފޯމުތަކާއި ކުރިއަށް އޮތް ތަނުގައި ހުށަހަޅާ ފޯމުތަކުގެ ތެރޭގައި ސައްހަ ނޫން ފޯމެއް ހިމެނޭޭ ނަމަ، އެފަދަ ފޯމެއް ހުށަހެޅި ޕާޓީއެއް، ކޮންމެ ފޯމަކަށް 10،000ރ.ގެ މަގުން ޖޫރިމަނާ ކުރަން
-
އޭގެ އިތުރުން، ޕާޓީގެ ރަޖިސްޓްރާ ވެސް ފުރަތަމަ ފަހަރު 5،000ރ. އިން އަދި ތަކުރާރު ކުރާ ކޮންމެ ފަހަރަކު 10،000ރ. އިން ޖޫރިމަނާ ކުރުން
-
މިދިޔަ މަހު އިލެކްޝަންސް އިން ވަނީ ޕާޓީތަކަށް ވަންނަން ހުށަހަޅާ މީހުންގެ ނަންތައް ވެބްސައިޓުގައި އާންމުކުރަން ފަށާފައި