ދަނޑުގެ ސެކިއުރިޓީ ފެއިލްވި ކަމަށް ސީޕީ ހަމީދު އިއުތިރާފްވެއްޖެ

ގަލޮޅު ދަނޑުގައި އިއްޔެ ހެނދުނު ކުރިޔަށް ގެންދިޔަ ޔޯގާ ހަރަކާތަށް ހުރަސްއަޅައި ހަމަނުޖެހުން ހިންގަން އެ މީހުންނަށް ފުރުސަތު ލިބި، ސެކިއުރިޓީ ބްރީޗްވި ގޮތާ މެދު ވަރަށް ބޮޑަށް ކަންބޮޑުވެވަޑައިގަންނަވާ ކަމަށް ކޮމިޝަނަރު އޮފް ޕޮލިސް (ސީޕީ) މުހައްމަދު ހަމީދު މިއަދު ވިދާޅުވެއްޖެ އެވެ.

ވީ ކިހިނެއް؟ - ދައުލަތުގެ ބައެއް އިސް ފަރާތްތަކާއި ބޭރުގެ އިސް އޮފިޝަލުންތަކެއް ބައިވެރިވި އެ ހަރަކާތުގެ ތެރެއަށް ބަޔަކު ވަދެ، ބަޔަކަށް ހަމަލާ ދިން އިރު، ދަނޑުގެ ސެކިއުރިޓީ ކަންކަން ހުރި ގޮތާ މެދު ބޮޑެތި ފާޑުކިޔުންތަކެއް އަންނަނީ އަމާޒުވަމުންނެވެ.

ތަފްސީލް - ހަމީދު މިއަދު ކުރެއްވި ޓުވީޓެއްގައި ވިދާޅުވީ، އިއްޔެގެ އެ ހަރަކާތުގައި ފުލުހުން ހަރަކާތްތެރިވި ގޮތާއި ސެކިއުރިޓީ ބްރީޗްވެގެން ދިޔަ ގޮތާ މެދު ވަރަށް ބޮޑެތި ކަންބޮޑުވުންތަކެއް އޭނާގެ ވެސް އެބަހުރި ކަމަށެވެ.

ބުނީ ކީކޭ؟ - "އިއްޔެގެ ފުލުހުންގެ އޮޕަރޭޝަނާ ގުޅޭ އިންޓާނަލް ރިވިއުއެއް ދަނީ ހަދަމުން،" ހަމީދު ވިދާޅުވި އެވެ.

ހަމީދު ވިދާޅުވީ، ކަމާ ގުޅުންހުރި އިދާރާތަކުން ކުރިއަށް ގެންދާ ތަހުގީގަށް ފުލުހުންގެ ފުރިހަމަ އެއްބާރުލުން ލިބޭނެ ކަމަށެވެ.

އިއްޔެ ހަމަނުޖެހުން ހިންގި މީހުންނާ މެދު އަވަސް ފިޔަވަޅު އެޅުމަށް ފުލުހުން މަސައްކަތް ކުރަމުން އަންނަ އިރު، ފުލުހުންގެ އޮޕަރޭޝަންތައް ހަރުދަނާ ކުރުމަށް ވެސް ފިޔަވަޅު އަޅާނެކަމުގެ ޔަގީންކަން ވެސް ހަމީދު ދެއްވި އެވެ.

އެނގުން މުހިންމު - ޔޯގާ ހަރަކާތަށް ބަޔަކު ހުރަސްއަޅައި ހަމަނުޖެހުން ހިންގި މައްސަލަ ބަލައި ފިޔަވަޅު އަޅަން ވަޒީރުންގެ މަޖިލީހުގެ ސަބް ކޮމިޓީއެއް ރޭ ވަނީ އެކުލަވާލައިފި އެވެ. މައްސަލަ ބަލަން އެކުލަވާލި ވަޒީރުންގެ ކޮމިޓީގައި ހޯމް މިނިސްޓަރު އިމްރާން އަބްދުﷲ ހިމެނިވަޑައެއް ނުގަންނަވަ އެވެ.

އެ މައްސަލައާ ގުޅިގެން މިހާތަނަށް ހަ މީހަކު ހައްޔަރުކޮށްފައި ވާއިރު، ހަމަނުޖެހުން ހިންގި މައްސަލައިގައި ޒިންމާވާ މީހުން ވަރަށް އަވަހަށް ގާނޫނުގެ ކުރިމައްޗަށް ގެންނާނެ ކަމަށް ރައީސް އިބްރާހިމް މުހައްމަދު ސޯލިހު ވެސް ވަނީ ވިދާޅުވެފަ އެވެ.