ޗަނާޗާ: މިއީ ރާއްޖޭގެ ފެންވަރުން ވެސް ވަރަށް ބޮޑު، ފުރިހަމަ ޝޯއެއް (ދައުރު ފޮޓޯ/ އަބްދުﷲ ޔާޝާއު)
ޗަނާޗާ: ހުނަރާއި ފޯރި އާއި ހުވަފެނީ މާހައުލެއްގައި
މުހިންމު ނުކުތާތައް
ބޭންޑްތަކާ އެކު އެތައް ބަޔަކު ހޭދަކުރީ އުފާވެރި ވަގުތުކޮޅެއް
ސްޓޭޖުން ފެށިގެން ފަންނާނުން ހުށައަޅައިދިން ލަވަތައް ވެސް ހިތްގައިމު
ބޭންޑްތަކާއި އެތައް ބަޔަކު ބައިސްކޯފްގެ މަސައްކަތަށް ތައުރީފްކުރި
ބައިސްކޯފުން އިންތިޒާމްކޮށްގެން ހުޅުމާލޭ ޓްރެކް ދަނޑުގައި، މިދިއަ ހޮނިހިރުދުވަހުގެ ރޭ ބޭއްވި ޗަނާޗާ ޝޯ ބަލަން ދިޔަ އެތައް ހާސް ބަޔަކު ވަރަށް ފޯރިނެގި އެވެ.
ޝޯއަށް އޮތް ތަރުހީބު، ދަނޑަށް ވަންނަން ދަމާލާފައި އޮތް ކިޔޫއިން ވެސް އެނގުނެވެ. މިއީ ރާއްޖޭގައި މި ފަހަކަށް އައިސް ބޭއްވި އެންމެ ވަރުގަދަ ޝޯ ކަމާ މެދު އެއްވެސް ޝައްކެއް ނެތެވެ.
"ޗަނާޗާ 2022" ބޮޑު ބެނާއާ އެކު އުސް ސްޓޭޖެވެ. ދިއްލާފައި ހުރި އަލިތައް ދުރަށް ފެތުރިފަ އެވެ. ސްޓޭޖްގެ ވަށައިގެން ހުރި ސްކްރީންތަކުން ފެންނަނީ ފަންނާނުންގެ ލަވަތަކަށް ބާރުދޭ އެނިމޭޝަންތަކެވެ. ލައިޓިން ރީއްޗެވެ. ސްޓޭޖް ފުރިހަމަ އެވެ. ދިވެހި ފަންނާނުންނަށް އެފެންވަރުގެ ސްޓޭޖެއް މި ފަހުން ފެނިފައެއް ނެތެވެ. އެ ފުރިހަމަކަން ގެނެސްދިނީ ސްޓޭޖް ކޯ އިންނެވެ. އިހްސާސްކޮށްލެވެނީ ރާއްޖެއިން ބޭރުގެ ޝޯއެއް ހެންނެވެ.
ޝޯގައި ގުގުމުން ދިޔައީ ދިވެހި އަމިއްލަ އުފެއްދުންތަކެވެ. ދިވެހި ފަންނާނުން ހުށަހެޅީ އަމިއްލަ ރާގެވެ. ދިވެހި ސަޕޯޓަރުންނަށް މީގެ ކުރިން މިހާ ގިނަ އަމިއްލަ ރާގުތައް އެއް ތަނަކުން ލައިވް ޝޯއަކުން ފެނިފައި ނުވާނެ ކަން ޔަގީނެވެ.
ދިވެހި މިއުޒިކް ލެޖެންޑެއް ކަމަށްވާ ލަވަކިޔުންތެރިޔާ އަހުމަދު ފަސީހް އޭނާގެ ބޭންޑް "ފަސީ ލައިވް" އާ އެކު 2016 ގައި މޯލްޑިވިއަން އައިޑަލް އިން އެއްވަނަ ހޯދި ލައިޝާ ޖުނެއިދު ވެސް ފެނުނެވެ. ފަސީ ނެރޭ އާ އަލްބަމްގައި އޭނާގެ އަޑު ހިމެނޭ ލަވައިގެ އޮރިޖިނަލް ފީޗާއެއް ހުށަހަޅާދިނެވެ.
އެޗޭސިއާގެ މިޔުޒިކުން އެތައް ބަޔަކަށް ހިތްހަމަޖެހުން ލިބުނެވެ. އެ ބޭންޑްގެ ރީތި ލަވަތައް މާހައުލު އިތުރަށް ފުރިހަމަކޮށްލަދިނެވެ.
ސްކައިރޮކްގެ 'ސަމުގާ' ޖެއްސި އިރު ސްކްރީންތަކުން ފެންނަ މަންޒަރުތަކުން އެ މިއުޒިކު ތެރެއަށް މީހާ އިތުރަށް ގަންބާލި އެވެ. ބޭންޑްގެ ކޮސްޓިއުމްއަކީ ފެހުންތެރިޔާ ޖާދުއްﷲ އިސްމާއިލްގެ ފުރިހަމަ މަސައްކަތެވެ. ދިވެހިވަންތަ އަދި ޒަމާނީ ގޮތްގަނޑެކެވެ. ޝޯ ފުރިހަމަކުރަން ތަފާތު ފަންނުވެރިއެއްގެ އިތުރު އެހެން މަސައްކަތެކެވެ.
އިކުއެޓިކްވައިބް އެމީހުންގެ 'ގާދޫނި'ގެ އިތުރުން އާ ލަވައެއް ވެސް ދޫކޮށްލި އެވެ. ލަވަކިޔުންތެރިޔާ ޝައްމޫން މުހައްމަދު އެ ޕާފޯމްގެ ތެރެއަށް ވަދެފައި ހުރީ ވަރަށް ބޮޑަށެވެ. އޯޑިއަންސުން އެ ލޯބި އޭނާއަށް އަނބުރާ ދިނެވެ.
ސްރީ ލަންކާގެ ނަތާޝާ ރަތަނައިކަގެ ހުށެހެޅުމުން އެންމެންގެ ސަމާލުކަން ހޯދާ މުޅި ތަނުގެ ރޫހު ބަދަލުކޮށްލި އެވެ. މުޅި ޝޯގައި ވެސް ފުރަތަމަ ފަހަރަށް އިނގިރޭސި ލަވައެއް އިވުނު އޭނާގެ ފަރާތުންނެވެ. ލަވަޔާ އެއްވަރަށް ބެލުންތެރިން އަތް ނަގާ ނަށަން ފެށި އެވެ. ދިވެހި ބަހުގެ ޅެންވެރިކަމުން އިނގިރޭސި ޅެންވެރިކަމަށެވެ.
ޝޯއަށް ވަން އިރު މީހުންނަށް ދިން ދިއްލޭ އެތިކޮޅުތަކުގެ ކުލައިން ތަން ދިއްލަމުން އެންމެން އެ ލަވައިގެ ޖާދުލުގައި ޖެހުނު ކަހަލަ އެވެ.
ޑިޓިއުން ބޭންޑްގެ ވަގުތުކޮޅު ވެސް އެހާމެ ހާއްސަ އެވެ. ބައެއް މީހުން މުޅި އާއިލާއާ އެކު ގޮސް ތުއްތު ކުދިން އުރާލައިގެން ތިއްބެވެ. އަނެއް ބަޔަކު ވިނަގަނޑު މަތީގައި އިށީނދެލައިގެންނެވެ. އަނެއް ބަޔަކު ބައިވެރިޔާ ގައިގައި ބާރަށް ބާއްދާލައިގެން މި މިއުޒިކްގަ އެވެ. އަނެއް ބަޔަކު ހުއްޓުމެއް ނެތި ފޯރި ނަގަނީ އެވެ. ވަރުބަލި ކަމެއް އިހްސާސެއް ނުވި އެވެ. ވަގުތު ކުޑަ ކަމުން މާ ގިނަ ލަވަތަކެއް ކިޔައިދެވެން ނެތް ކަމަށް ބޭންޑުން އެންގި އެވެ. އެކަމަކު 'ނަށާލާ' ހުށަހަޅައިދިނީ ދިނީ ފޯރިއާ އެކު އެވެ. އޯޑިއަންސުން އަތްޖަހަމުން ދިޔަ އެވެ.
ޒުވާނުންގެ ހިތް އަތުލި އެއް ބޭންޑަކީ ރެވިއޯ އެވެ. އެމީހުންގެ ލަަވަތަކާ އެކު ނެށުމުގެ ބައި ވެސް ކުރިއަށް ދިޔަ އެވެ. 'ހޫރެއް ފަދައިން'ގެ ވީޑިއޯ ލަވައިގެ އުޅޭ އެކްޓަރުން ނެށުމުގެ ހަރަކާތްތަކެވެ. އާ ލަވަ 'ނީނާ' ވެސް އެ ފޯރިގަނޑުގައި ދޫކޮށްލި އެވެ. ފޭނުންގެ ފެވަރިޓް 'އުދުހިލާ' ކިޔަމުން ގެންދިޔައީ އޯޑިއަންސް އެވެ.
ސިމްބޮލިކް ރެކޯޑްސްގެ ރެޕަރުން ހުސް ހުދުގައި މިފަހަރު ސްޓޭޖަށް އެރީ އެންމެ މަގުސަދެއްގަ އެވެ. އެމީހުން ބޭނުންވާ ބަސް ބުނުމަށެވެ. ސިޔާސީ ބަސްތަކެވެ. 'ވެރިންގެ ވެރިކަން' އާއި 'ގައްދާރު' އިއްވާލި އެވެ. ހިތްގައިމެވެ.
ޝޯގައި އެންމެން ވެސް އިންތިޒާރުކުރި އެއް ފަންނާނަކީ ސްރީ ލަންކާގެ ލަވަކިޔުންތެރިޔާ ޔޮހާނީ ޑިލޯކާ ޑިސިލްވާ އެވެ. އޭނާގެ ހިންދީ ލަވަ 'އެކި ލަޅްކީ ކީ އޭސާ' އާއި 'ޗައްމަކަޗައްލޯ' ހުށައެޅި އެވެ. އޭނާގެ މަޝްހޫރު މަނީކޭ މަގޭ ހިތޭ އާއި ލަންކާ ބަހުން އަމިއްލަ ރެޕަކާއި ސަގާފީ ބީޓެއްގެ ލަވައެއް ވެސް ގެނެސްދިނެވެ.
ސަގާފީ ލަވައާ އެކު ފޭނުން ބޮޑު ބެރު ސްޓައިލަށް ނަށަން ފެށި އެވެ. މިއުޒިކަކީ ވަކި ނަސްލެއް އޮންނަ އެއްޗެއް ނޫނެވެ. އެއީ ރޫހެކެވެ. ޝޯ ބަލަން ގޮސް ތިބި ލަންކާ ފޭނުން އުތުރިއަރަން ފެށި އެވެ. އެންމެން އެއްކޮށްހެން ނަށައިގަތީ އެެވެ.
ޔޮހާނީއަށް ފަހު، ބައިސްކޯފުގެ ބޭންޑް، "ހަމްބަލް ބަކަރި" އެވެ. އެމީހުންނާ އެއްކޮށް ލަވަ ހުށަހެޅި ފަންނާނުންނަށް ފޯރިދޭން އެތައް ބަޔަކު ކުރިއަށް ޖެހުނެވެ. ކުރީގެ ސަލްޓަންސް ބޭންޑްގެ ލަވަކިޔުންތެރިޔާ ހުސެއިން މުއާދުގެ އަޑު ޖެހުމުން އެތައް ބައެއްގެ ހަނދާނަށް 90ގެ އަހަރުތައް ވެރިވެގަތެވެ.
މުހައްމަދު މައިސާން މުމްތާޒް (ބޮކިޓޯސް) އޭނާގެ ހުރި ހުރިހާ ހަކަތައެއް ސްޓޭޖް މަތިން ދައްކާލި އެވެ. ލަވަކިޔުންތެރިޔާ ހަދީޖާ މުހައްމަދު (ރިޒޫ)ގެ ހުށެހެޅުން ވެސް ވަރުގަދަ އެވެ. އެންމެންގެ ލޯތައް ހުއްޓިފައި ހުރީ އޭނާއާ ދިމާލަށެވެ.
ހަމްބަލް ބަކަރިއަށް ފަހު ދެން އޮތީ ރޮކް ބޭންޑް ޓްރެފިކް ޖޭމެވެ. އެމީހުންގެ ސަޕޯޓަރުން ސްޓޭޖާ ދިމާލަށް ދުއްވައިގަތީ ފޯރިއާ އެކު އެވެ. އާ ލަވަ 'ދިވެހިންނަށް ދިވެހިން' ގެނެސްދިނެވެ. ސްޓޭޖްގެ ވަށައިގެން ހުރި ސްކްރީންތަކުން ފޭނުންނަށް ހިތްވަރު ދެނީ ސަޕޯޓް ދިނުމަށެވެ. އަޑުގަދަކޮށްލުމަށެވެ. ބޭންޑްގެ އެ އެދުމަށް ކަމޭހިތި އެވެ.
މި ބޭންޑްގެ އެއް ލަވަ ބަލާލައިފައި ދެން ދާން ޖެހުނީ ގެއަށެވެ. ސަބަބަކީ ލަވަކިޔުންތެރިޔާ މުހައްމަދު ރަޝީދު (ކަޔާނޯ)ގެ މަންމައަށް ލަސްވާ ގޮތަށް 1:30 ނުވިޔަސް އެތައް ބަޔަކަށް ލަސްވީ އެވެ.
ބައިސްކޯފްގެ ޗަނާޗާ ވަރަށް ފުރިހަމަ އެވެ. ދިވެހި އަމިއްލަ އުފެއްދުންތެރިކަން ބަލައިލަން ދަނޑު ފުރޭހާ މިންވަރަށް މީހުން ވަނީ ވެސް އެ އުއްމީދުގަ އެވެ. ފަންނާނުން ހުނަރުވެރި އެވެ. މާހައުލު ވެސް ފުރިހަމަ އެވެ.
ޝޯ ބައްލަވާލައްވަން ރައީސް އިބްރާޙިމް މުހައްމަދު ސޯލިހާއި ޓުއަރިޒަމް މިނިސްޓަރު، ޑރ. އަބްދުﷲ މައުސޫމް ވެސް ވަޑައިގަތެވެ.
ޝޯ އަށް ފަހު ސޯޝަލް މީޑިއާ ފުރާލާފައި ވަނީ އޭގެ ވީޑިއޯ އާއި ފޮޓޯތަކުންނެވެ. އޭގެ ތެރޭގައި ފަންނާނުންނާ ބެހޭ މިނިސްޓަރު ޔުމްނާ މައުމޫނު ވެސް ހިމެނެ އެވެ.
މި ޝޯގެ ވާހަކަ މި ޝޯ ބަލަން ދިޔަ މީހުންގެ ހަނަދާނުގައި އަދި މި ޝޯގެ ފޯރި ސޯޝަލް މީޑީއާގައި އެތަށް ދުވަހަކަށް ދެމިގެންދާނެ އެވެ. ސަބަބަކީ ފިސާރި، ފޯރިގަދަ ފަންނުވެރިންނެވެ. މިއަހަރު ނުދެވުނު މީހުން މިއަންނަ އަހަރަށް ތައްޔާރު ވާށެވެ. އަދި މިފަދަ ޝޯއެއް މިހާ ފުރިހަމަކޮށް އިންތިޒާމް ކުރީތީ ބައިސްކޯފަށް ހޫނު އަތްތިލަ ބަޑި އެކެވެ.