ރާނީގެ ޕްލެޓިނަމް ޖުބިލީގައި ވިދާލީ ޕްރިންސް ލުއީ

އިނގިރޭސި ރާނީ އެލިޒަބަތުގެ ރަނިކަމަށް 70 އަހަރު ފުރުން ފާހަގަކުރުމުގެ 'ޕްލެޓިނަމް ޖުބިލީ ޕެޖަންޓް'ގެ ތެރެއިން އެންމެ ބޮޑު ސަމާލުކަމެއް ހޯއްދެވީ ރާނީގެ މުނި މާމަ ދަރިކަލުން ޕްރިންސް ލުއީ އެވެ. ޝާހީ އާއިލާގެ އުފާފާޅުކުރުމުގެ ހަފްލާތަކުގައި ޕްރިންސް ވިލިއަމްގެ އެންމެ ހަގު ދަރިކަލުންގެ ޝުއޫރުތައް ފެނުނީ މުޅިން ތަފާތުކޮށެވެ. 

ބަކިންގްހަމް ޕެލެސްގެ ބެލްކަނީގައި 'ޓްރޫޕިން ދަ ކަލާސް ޕެރޭޑް' ކުރިއަށް ދިޔަ އިރު މަތިން ދިޔަ ރޯޔަލް އެއާ ފޯސްގެ ޖެޓުތަކުގެ އަޑުފަށްގަނޑާ މެދު ހިތްހަމަނުޖެހި އަދި އެ އަޑުތަކުގެ ސަބަބުން އުނދަގޫވެވަޑައިގެން ޕްރިންސް ލުއީ ކަންފަތުގައި އަތް އަޅުއްވާ މަންޒަރުތައް ފެނިގެން ގޮސްފައިވެ އެވެ.

ދެ ގަޑި އިރާއި ބަޔަށް ކުރިއަށް ދިޔަ އިހުތިފާލުތަކުގައި ހިމޭނުން ހުންނަވަން އުމުރުން 4 އަހަރުގެ ޕްރިންސް ލުއީ އަށް ތަންކޮޅެއް އުނދަގޫވީ އެވެ.

ތުއްޕުޅު ޕްރިންސްގެ މައިންބަފައިން ކަމަށްވާ ޕްރިންސް ވިލިއަމް އާއި ކޭޓް މިޑްލްޓަން އަދި ބޭބެ ޕްރިންސް ޖޯޖް އާއި ދައްތަ ޕްރިންސެސް ޝާލޮޓްއާ އެކު އިށީނދެވަޑައިގެން އިންނެވި އިރު 'ބަސްއަހައިގެން' ހުންނަވަން އުދަނގޫވެ ވަޑައިގެން އުޅުއްވި މަންޒަރުތައް ފެނުނެވެ.

މަންމަ، ޑަޗަސް އޮފް ކެމްބްރިޖް ކޭޓް ލުއީ މަސަލަސް ކުރައްވަން އުޅުއްވާ ތަން ބީބީސީ ވަންގެ ލައިވް ކަވަރޭޖްތަކުން ފެނިފައިވެ އެވެ.

ކޭޓްގެ މޫނުމަތީގައި ލުއީ އަތް އަޅުއްވާ ތަނާއި ދޫ ބޭރަށް ނެރެ މަންމަ އަށް އެއްބާރުލުން ނުދޭތަން ފެނިގެން ގޮސްފައިވެ އެވެ.

ވިލިއަމް އާއި ކޭޓް ވާހަކަ ދައްކަވަން ތިއްބަވަނިކޮށް ލުއީ ދުވެވަޑައިގެން ކާފަ ޕްރިންސް ޗާލްސްގެ އުނގުގައި އިރުކޮޅަކަށް މަސަލަސްވެ އިން ތަން ފެނުނެވެ.

ރާނީގެ 70 އަހަރުގެ ލީޑަޝިޕް ފާހަގަކުރުމުގެ ރަސްމިއްޔާތުގައި ޕްރިންސް ލުއީ އުޅުއްވި ގޮތަށް ޓުވިޓާގައި އިޝާރާތްކުރައްވައި ވިލިއަމް އާއި ކޭޓް ހޯމަދުވަހު ޓްވިޓާގައި ވިދާޅުވީ އެ ހަފްލާތަކުގައި އެ އާއިލާ އިން ވެސް އެހެން އެންމެންނެކޭ އެއްގޮތަށް ބައިވެރިވެ ހޭދަކުރި ވަގުތު ހާއްސަގޮތެއްގައި ލުއީއަށް އުފާވެރި ކަމަށެވެ.

ޕްރިންސް ލުއީގެ މި ޖަޒުބާތުތައް ފެންނަ ފޮޓޯތައް މިހާރު ވަނީ މީމްސްގެ ގޮތުގައި ސޯޝަލް މީޑިއާގައި މަގުބޫލުވެގެން ގޮސްފަ އެވެ.