ޗަނާޗާގައި ބައިވެރިވާން ޔޮހާނީ ރާއްޖެ އަތުވެއްޖެ؛ ހޫނު މަރުހަބާއެއް

ވީޑިއޯ ސްޓްރީމިން ޕްލެޓްފޯމް، ބައިސްކޯފުން އިންތިޒާމްކޮށްގެން ހޮނިހިރު ދުވަހު ބާއްވާ ޗަނާޗާ ޝޯގައި ޕާފޯމް ކުރުމަށް، ދިވެހިންގެ މެދުގައި ވެސް މަޝްހޫރު، ސްރީ ލަންކާގެ ލަވަކިޔުންތެރިޔާ ޔޮހާނީ ޑިލޯކާ ޑިސިލްވާ މިއަދު ރާއްޖެ އަތުވެއްޖެ އެވެ.

ވީ ކިހިނެއް؟ - 'މަނިކޭ މަގޭ ހިތޭ' ލަވައިން ދިވެހިންގެ މެދުގައި ވެސް މަގުބޫލުކަން ހޯދާފައިވާ ޔޮހާނީ، 28، ރާއްޖެ އައިސްފައި ވަނީ މިއަދުގެ މެންދުރު ފަހުގެ ވަގުތެއްގަ އެވެ. ބައިސްކޯފާއި ޔޫތު މިނިސްޓްރީއިން ވަނީ އެއާޕޯޓުުން އޭނާއަށް ހޫނު މަރުހަބާއެއް ކިޔައިފަ އެވެ.

ޔޮހާނީ ވަނީ ރާއްޖެއިން ދިން ހޫނު މަރުހަބާ އަށް އިންސްޓަގްރާމްގައި ޝުކުރު އަދާކޮށްފަ އެވެ. 

ދުނިޔޭގެ އެކި ކަންކޮޅުތަކުން އޭނާގެ އަޑަށް މީހުންގެ ހިތްޖައްސައި، ކުޑަ ދުވަސްކޮޅެއްގެ ތެރޭ ބޮޑު މަޝްހޫރުކަމެއް ޔޮހާނީ ވަނީ ހޯދައިފަ އެވެ.

ހުޅުމާލޭ ދުވާ ޓްރެކްގައި ބާއްވާ ޝޯގެ ޓިކެޓް އާއްމު ޓިކެޓުތައް ބައިސްކޯފުން ވިއްކަނީ 150ރ. އަށެވެ. ނަމަވެސް ވީއަޕީ ޓިކެޓެއް 999ރ. އަށް ނަގައިގެން ޔޮހާނީއާ ބައްދަލުކޮށްލައި އޭނާ އެކު ސެލްފީ ނެގުމުގެ ފުރުސަތު ބައިސްކޯފުން ވަނީ ހުޅުވާލަފަ އެވެ.

ބައިސްކޯފުން ބުނީ ވީއައިޕީ ޓިކެޓު ގަނެގެން ޝޯ ބަލަން ދާ މީހުންނަށް ދަނޑުގައި ހާއްސަ އިންތިޒާމްތަކެއް ވެސް ހަމަޖައްސާފައި ހުންނާނެ ކަމަށެވެ.

މި ޝޯގައި ލަވަ ހުށަހަޅާ ދިވެހި ފަންނާނުން އަންނަނީ ޝޯ އަށް ފޯރިއާ އެކު ތައްޔާރުވަމުންނެވެ.