ފޭދޫ ގޭންގަކުން ފުލުހުންނަށް: ތިއީ އަހަރެމެން ހަރަދުކުރާ މީހުން

"ކަލޭމެންނަށް ހަރަދު ކުރަނީ އަހަރެމެން. އެހެންވީމަ ކަލޭމެން ޖެހޭނީ އަހަރެމެން ދޫކޮށްލަން،" ސ. ފޭދޫގައި ވަޅިން ހަމަލާދީ މަރާލި މުހައްމަދު ޒަޔާން މޫސާގެ މަރުގެ މައްސަލައިގެ ތުހުމަތުގައި އެ ރަށު މަގުއްދޫ ހިސާބުގައި އޮންނަ ގުރޫޕަކުން ބަޔަކު ހައްޔަރުކުރުމާ ހަމައިން ކޯޓަށް މުއްދަތު ޖަހަން ވެއްދުމާ ދެމެދު ގޮވަމުން ދިޔައީ މިހެންނެވެ.

ފޭދޫ އެތައް ބަޔަކަށް އެ އަޑު އިވުނެވެ. ނަމަވެސް މިއީ އެންމެންނަށް އެނގޭ، ބޮޑު ސިއްރެއްގެ ގޮތުގައި އޮތް ކަމެކެވެ. މިހާ ފާޅުގައި، ފުލުހުންނަށް ރިޝްވަތު ދޭ ވާހަކަ މި ގޮވީ މަރުގެ މައްސަލައެއްގެ ތުހުމަތުގައި ބަޔަކު ހައްޔަރުކުރުމުންނެވެ. ޒަޔާންގެ މަރުގެ ތުހުމަތުކުރަނީ، އަދި ތުހުމަތުގައި ހައްޔަރުކޮށްފައިވަނީ ފޭދޫ މަގުއްދޫ ސަރަހައްދުގައި އޮޕަރޭޓު ކުރާ ގޭންގަކަށް ނިސްބަތްވާ ބައެކެވެ.

ޒަޔާންއަށް ވަޅިން ހަމަލާ ދީ އަނިޔާވެރި ގޮތަކަށް މަރާލީ 2 ޖޫން ވީ ބުރާސްފަތި ދުވަހުގެ ދަންވަރުގެ ވަގުތެއްގައި އޭނާ ދިރިއުޅޭ ގޭތެރެއަށް ބަޔަކު ވަދެގެންނެވެ. މިހާތަނަށް ބެލިބެލުމުން އެނގެނީ ހަމަލާ ދޭން އެ ގެއަށް ވަނީ ހަތަރު މީހުން ކަމެވެ. ނަމަވެސް އެ މީހުން ފިލުމުގައި އެހީތެރިވި މީހުންނާ އެކު އެ އަދަދު އެއަށް ވުރެ މާ ގިނަވާނެ ކަމަށް ލަފާކުރެވެ އެވެ.

ޒަޔާން މަރާލީ ފޭދޫގެ ދެ ގުރޫޕަކަށް (މަގުއްދޫގައި އޮންނަ ގުރޫޕާއި މާދެލަ ސަރަހައްދުގައި އޮންނަ ގުރޫޕަށް) ނިސްބަތްވާ ބައެއްގެ މެދުގައި މި އަހަރުގެ ކުޑަ އީދު ދުވަހުން ފެށިގެން ސިލްސިލާ މަރާމާރީތަކެއް ހިންގުމަށް ފަހު އެވެ. ޒަޔާން އާއި އިތުރު މީހުންނަށް ތަކުރާރުކޮށް މަރުގެ އިންޒާރު ދިންކަން ރަށުން ވާހަކަ ދެއްކި މީހުންގެ ފަރާތުން 'ދައުރު'އަށް ވަނީ އެނގިފަ އެވެ. ބައެއް މީހުންނަށް އިންޒާރު އައީ ޓެކްސްޓް މެސެޖުތަކުންނެވެ. ޒަޔާންއަށް ވެސް އެކި ފަހަރުމަތިން އިންޒާރު ދީފައި އެބަ ހުއްޓެވެ. އައްޑޫގެ ފުލުހުންނަށް ވެސް މިކަން ރަނގަޅަށް އެނގެ އެވެ. މައްސަލަ އެތައް ފަހަރަކު ރިޕޯޓު ވެސް ކުރި ކަމަށްވެ އެވެ.

އިތުރަށް ކިޔާލަން -

ޒަޔާންއަށް އުނދަގޫ ކުރަން ފެށީ ކުޑަ އީދު ދުވަހުން ފެށިގެން ދެ ގުރޫޕުގެ ދެމެދުގައި ހިންގި ސިލްސިލާ މާރާމާރީތަކުގެ ތެރޭގަ އެވެ. އޭގެ ފަހުން ކޮންމެ ރެއަކު އޭނާ ދިރިއުޅޭ ގެ ކުރިމައްޗަށް ގޮސް ހަޑިހުތުރު ބަހުން އަޑުގަދަކޮށް ބަރުގޮނު އަޅާ ހަދާފައިވާ ކަމަށް، ބައެއް މީހުން ބުނެ އެވެ.

ޒަޔާންއާ އާއިލީ ގުޅުން އޮންނަ ނާހިދު (އަސްލު ނަމެއް ނޫން) 'ދައުރު'އަށް ކިޔައިދިން ގޮތުގައި ތަކުރާރުކޮށް ކޮންމެ ރެއަކުހެން އެގޮތަށް އުނދަގޫ ކުރާތީ އާއިލާއިން ފުލުހުންނަށް މައްސަލަ ރިޕޯޓު ކުރި އެވެ.

"ރިޕޯޓު ކުރީމަ އެބަ ބަލަމޭ، ވެހިކަލް ފޮނުވަމޭ ބުނީ. އެ މީހުން [މަގުއްދޫ ގުރޫޕު މީހުން] އެ ތަނުން ދާއިރު ވެސް ޕޮލިހުންނަށް އާދެވޭ ކަމަކަށް ނުވޭ،" އޭނާ ބުންޏެވެ.

ނާހިދު ބުނި ގޮތުގައި:

ނާހިދު ބުނި ގޮތުގައި ފުލުހުން އަލަށް ވެސް ޒަޔާންގެ ބައްޕަ ކައިރިއަށް ބަޔާން ނަގަން އައީ، ޒަޔާން މަރާލި ދުވަހު އެވެ.

އޭނާ ބުނީ އެ ދުވަހު ފުލުހުން އައުމުން މައްސަލަ ބަލާނީ ކޮން އައިއޯއެއްތޯ ޒަޔާންގެ ބައްޕަ ސުވާލުކުރި ކަމަށާއި އެއީ އިންޒާރު ދިން މައްސަލަތައް ބެލި އައިއޯއޭ ބުނުމުން ބަޔާން ދޭން ޒަޔާންގެ ބައްޕަ ދެކޮޅުހެދި ކަމަށެވެ.

"ތިއީ [އައިއޯ] އަކީ ވިކިފައި ހުރި މީހެކޭ، ތިއީ އެ މީހުން [ޒަޔާން މަރާލި މީހުން] ކާންދީ، ބޯންދީ، ބަލައި ބޮޑުކުރާ ކުއްޖެކޭ ވެސް ބުނި ކަމަށް ވަނީ،" ނާހިދު ބުންޏެވެ.

މި ޓައިމްލައިންގެ ތެރޭގައި ފޭދޫގެ އިތުރު މީހުންނަށް ވެސް މަގުއްދޫ ގުރޫޕުން މަރުގެ އިންޒާރު ދީފައިވެ އެވެ. އެ ތަނުން އެކަކު، ފުލުހުންނަށް މައްސަލަ ހުށަހެޅުމުން ކަންކުރި ގޮތް 'ދައުރު'އާ ހިއްސާކުރި އެވެ.

"މަރުގެ އިންޒާރު ދިނީމަ ގަން ޕޮލިސް ސްޓޭޝަނަށް ގޮސް ހަމަ އެ ދުވަހު މައްސަލަ ޖެއްސިން. ޖެއްސީމަ އެ ގަޑީގައި އައިއޯއެއް ނެތޭ ކިޔާފައި ފޮނުވާލީ،" އޭނާ ބުންޏެވެ.

"ޖެހިގެން އައި ދުވަހު ވެސް ބަޔާން ދޭން ވެގެން ގޮސް ގަޑިއެއްހާއިރު މަޑުކޮށްގެން ހުރެފައި ޑިއުޓީއަށް ދާން ގަޑިޖެހޭތީ ދިޔައީ. އަނެއް ދުވަހު [ބަޔާނެއް ވެސް ނުނަގައި] މެސެޖު ކޮށްފައި ބުނަނީ އެވިޑެންސް ނެތިގެން މައްސަލަ ކްލޯސް ކުރި ވާހަކަ."

އޭނާ ބުނި ގޮތުގައި ޒަޔާންއާ އެންމެ ފަހުން ބައްދަލުވި ދުވަހު (މެއި 18 ވަނަ ދުވަހު) އޭނާއާ މި ވާހަކަ ހިއްސާކުރި އެވެ.

"ބުނީމަ ޒަޔާން ބުނި ނުބަލާނޭ ތި މައްސަލަ. ތިމަންނަ ކޮއްކޮ ސްކޫލަށް ލާން ގޮސް ހުއްޓާ އެ ތަނުން ދެ މީހަކު އައިސް މަރުގެ އިންޒާރު ދިން މައްސަލަ ވެސް ނުބެލިޔޭ،" އޭނާ ބުންޏެވެ.

ޒަޔާންއަށް މަރުގެ އިންޒާރު އެންމެ ގިނައިން ދިން މީހުންނަކީ:

ފާހަގަކޮށްލެވޭ ކަމެއް - ޒަޔާންއަށް ހަމަލާ ދޭން އޭނާގެ ދިރިއުޅޭ ގެއަށް ވަދެފައިވަނީ އެ ހިސާބުގައި އޮންނަ ވާތެރެއިންނެވެ. ވަލަށް ވަދެވޭ މައިގަނޑު ދެ ރޫޓެއް އޮންނައިރު، އެ ތަނުން އެއް ރޫޓަކީ ސީދާ ޒަޔާން ދިރިއުޅޭ ސޮލިޑް ގޭގެ ފަހަތަށް ހުންނަ ގޭގެ ކައިރިން ވަދެވެން އޮންނަ ރޫޓެކެވެ. ސޮލިޑް ގޭގެ ފަހަތަށް ހުންނަ ގެއަކީ އައްޑޫ ޕޮލިސް ސްޓޭޝަނެއްގެ އިސް މީހެއް ދިރިއުޅޭ ގެކަން 'ދައުރު'އަށް ވަނީ އެނގިފަ އެވެ. މި ބުނާ ރޫޓަށް ވަދެވެން އޮންނަ ދިމާ ފެންނަ ގޮތަށް އެ ގޭގައި ކެމެރާއެއް ވެސް ހުރެ އެވެ. ނަމަވެސް އެއީ މަސައްކަތް ކުރާ ކެމެރާއެއް ކަމެއް ނުވަތަ ނޫން ކަމެއް ނޭނގެ އެވެ.

ޒަޔާން މަރާލި ކަމަށް ތުހުމަތުކުރެވޭ މީހުން ހޯދަން ފުލުހުން އެކި ރޭތަކުގެ މަތިން އައްޑޫގައި އޮޕަރޭޝަންތަކެއް ހިންގި އެވެ. މިގޮތަށް ހިންގި އޮޕަރޭޝަނެއްގައި މި މަހު 18 ވަނަ ދުވަހު މަގުއްދޫ ގުރޫޕް އޮޕަރޭޓު ކުރާ ސަރަހައްދުގައި ހުންނަ ކެފޭއަކުން މަގުއްދޫ ގުރޫޕުގެ ބަޔަކު ފުލުހުންގެ ބެލުމުގެ ދަށަށް ގެންދިޔަ އެވެ.

އެ ވަގުތު ކެފޭގައި ހުރި މީހަކު 'ދައުރު'އަށް ކިޔައިދިން ގޮތުގައި ފުލުހުން އެތަނަށް ވަންއިރު އެ މީހުން ތިބީ ބަނގުރާ ބޯށެވެ. އަދި ފުލުހުން ވަންކަން އެނގުމާ އެކު ޖެހިގެން ހުރި ގޭގެ ވަލު ތެރެއަށް ބަނގުރާ ފުޅިތަކާއި ބިޔަރު ދަޅުތައް އުކާލި އެވެ. އެތަނަށް ދިޔަ ފުލުހުންގެ ތެރޭގައި ގަން ޕޮލިސް ސްޓޭޝަންގެ ފުލުހުންނާއި އެސްއޯ ފުލުހުން ވެސް ހިމެނެ އެވެ.

އެ މީހުން ހައްޔަރުކޮށްގެން ފުލުހުން އެ ތަނުން ފޭބީ ދަންވަރު ބާރަ ޖެހި ފަހުންނެވެ. އަދި ވެހިކަލަށް އެރުވި ގަޑީގައި މަގުއްދޫ ގުރޫޕުގައި އިސްކޮށް އުޅޭ އަދި ޒަޔާން މަރާލި މީހުން ފިލަން ބޭނުންކުރި ކާރުގެ ވެރިފަރާތް ކަމަށް ބުނާ މީހާ ފުލުހުންނަށް އިންޒާރު ދިން އަޑު އިވުނު ކަމަށް 'ދައުރު'އާ ވާހަކަ ދެއްކި އެކަކު ކިޔައިދިނެވެ.

"ކަލޭ އަތުކުރީގައި ތި އޮތް ގަޑި، ކަލޭ ޖީބުގައި ތި އޮތް ފޯނު، ތީ އަހަރެމެން ގަނެދިފައި ހުރި އެއްޗެހި،" އެ ތަނަށް އައި ފުލުހުންގެ ތެރެއިން އިންވެސްޓިގޭޓިން އޮފިސަރަކާ ދިމާލަށް މަގުއްދޫ ގުރޫޕުގެ އިސް މީހަކު ބުނި އަޑު އޭނާއަށް އިވުނެވެ.

"ކަލޭމެންނަށް ހަރަދު ކުރަނީ އަހަރެމެން. އެހެންވީމަ ކަލޭމެން ޖެހޭނީ އަހަރެމެން ދޫކޮށްލަން. ކޯޓަށް ގޮސްފި ނަމަ ގާޒީއަށް ޕޭމަންޓް ސްލިޕްތައް ވެސް ދައްކާނަން."

އޭނާ އެހެން ގޮވަމުންދިޔަ އިރު، އެ އެންމެން ވެސް ތިބީ ފަހަތަށް ބިޑިއަޅުވައިފަ އެވެ. ކެފޭއިން އެރޭ އެ މީހުން ގެންދިޔައީ ގަން ޕޮލިސް ސްޓޭޝަނަށެވެ. މުއްދަތު ޖަހަން ކޯޓު ރޫމަށް ވެއްދުމާ ހަމައަށް ވެސް މަގުއްދޫ ގުރޫޕުން ދިޔައީ ފުލުހުންނަށް އިންޒާރު ދެމުންނެވެ. ހައްޔަރުކުރި ދުވަހުގެ ފަހު ދުވަހު އެ މީހުންގެ ގެތައް ބަލާ ފާސްކުރަން ގެންދިޔައިރު އެހެން ގޮވި އަޑު ވެސް ބައެއް މީހުންނަށް އިވުނެވެ. އަދި ކޯޓު ރޫމަށް ވެއްދުމުގެ ކުރިން ވެސް ހަމަ އެ ގޮވެލިފަތި އެ މީހުން ގޮވި އެވެ: ފުލުހުންނަށް ހަރަދުކުރި ކަމުގެ ހެކި އެބަހުރި ކަމަށާއި ކޯޓަށް ވައްދައިފި ނަމަ ރިޝްވަތު ހިފިކަން ގާޒީއަށް ކިޔައިދޭނެ ކަމުގެ އިންޒާރެވެ.

މަގުއްދޫ ގުރޫޕުން ރިޝްވަތު ދިން ކަމަށް ބުނާ ފުލުހުންނަކީ ސީދާ ކޮން ބައެއްކަމެއް ނޭނގެ އެވެ. އޭގެ ތެރޭގައި ޒަޔާން އާއި އޭނާގެ އާއިލާއަށް އަދި އެ ރަށުގެ ބައެއް އެހެން މީހުންނަށް މަރުގެ އިންޒާރު ދެމުންދިޔަ މައްސަލަ ބެލުމުގައި އިހުމާލުވި މީހުންނާއި އިންޓެލް ފުލުހުންގެ ތެރެއިން ދެ މީހަކު ހިމެނޭ ކަމަށް، ބައެއް މީހުން ބުނެ އެވެ.

ތަހުގީގުގައި އިހުމާލުވި މީހުންނަކީ އައްޑުއަށް ނިސްބަތްވާ ދެ މީހުންނެއް ނޫނެވެ. ނަމަވެސް އިންޓެލް ފުލުހުންނަކީ، ފޭދޫ މީހުން ބުނާ ގޮތުގައި، ސީދާ އެ ރަށަށް އުފަން އަދި މަގުއްދޫ ގުރޫޕަށް ވެސް ނިސްބަތްވާ ދެ މީހުންނެވެ. މަގުއްދޫ ގުރޫޕަށް ފަސޭހަކަމާ އެކު މަސްތުވާތަކެތި ވިއްކެނީ އެ ދެ މީހުން ވަރަށް ބޮޑު ދައުރެއް އޮވެގެން ކަމަށްވެ އެވެ.

"ސީދާ [ޕޮލިސް ސްޓޭޝަނުގެ] އިސް މީހުންގެ އިހުމާލު އެބަ އޮތް، އެމީހުންގެ ނުފޫޒު އޮވެގެން މިހާ އޯޕަންކޮށް މިކަން ކުރެވޭނީ. [ރަށު] އެންމެން ވެސް ކިޔާ އެއްޗެއް މިއީ،" އެ ރަށުން ވާހަކަ ދެއްކި މީހަކު ބުންޏެވެ.

"އޭނާ [ޕޮލިސް ސްޓޭޝަންގެ އިސް މީހެއް] އެ މީހުންގެ [މަގުއްދޫ ގުރޫޕުގެ] ބޮޑުންނާ ވާހަކަ ދައްކަނީ ސާ، ސާ ކިޔައިގެން."

މީގެ އަހަރުތަކެއް ކުރިން ޓްރެއިނިން ފުރިހަމަކުރަން އައްޑުއަށް ގޮސް އުޅުނު ފުލުހަކު ވެސް، ފޭދޫ ރައްޔިތުންގެ އެ ކަންބޮޑުވުން 'ދައުރު'އަށް ކަށަވަރުކޮށްދިނެވެ. ނަމަވެސް އޭނާ ބުނި ގޮތުގައި، އޭރުގެ ހާލަތު މިހާ ގޯހެއް ނޫނެވެ. ތަފްސީލަށް ނުދިޔަ ނަމަވެސް އޭނާ ބުނީ އޭރު ވެސް ފުލުހުންގެ ފަރާތުން ގަބޫލުކުރަން ދަތި އެތައް ކަމެއް ފެނުނު ކަމަށެވެ.

ޒަޔާންގެ މަރަށް ފަހު ފޭދޫ މަގުމަތިން މަގުއްދޫ ގުރޫޕުގެ އެއްވެސް ބަޔަކު ނުފެނެ އެވެ. މި މައްސަލައާ ގުޅިގެން މިހާތަނަށް ހައްޔަރުކޮށްފައިވާ މީހުން ފިޔަވައި އެ ގުރޫޕުގެ ގިނަ މީހުން މިހާރު އުޅެނީ ފިލައިގެންނެވެ. މިހާތަނަށް ހައްޔަރުކުރީ އަށް މީހެކެވެ. ފޭދޫގެ މަގުތަކަށް މި ވަގުތު އަމާންކަމެއް އަޔަސް، ނޭނގެނީ މި އަމާންކަން ދެމިއޮންނާނީ ކިހާ ދުވަހަކަށް ކަމެވެ. އެކަށީގެންވާ ފިޔަވަޅުތަކެއް ނާޅައިފި ނަމަ، ފުލުހުންގެ ބާރު މިހާރު އޮތް މިންވަރަށް ވެސް ފޭދޫގައި އޮވެދާނެ ކަމަކަށް، ރަށުގެ ބައެއް މީހުން ގަބޫލެއްނުކުރެ އެވެ.

އެނގުން މުހިންމު - މި ރިޕޯޓަށް ފުލުހުންގެ ބަހެއް ހޯދަން މަސައްކަތް ކުރި ނަމަވެސް، ޝާއިއުކުރުމާ ހަމައަށް ފުލުހުންގެ ރަސްމީ ބަހެއް ނުލިބުނެވެ.