އިކުއޭޓިކް ވައިބް: ޗަނާޗާގައި ބޭންޑްގެ އިތުރު ހިތްގައިމު މަސައްކަތްތައް ފެނިގެންދާނެ
އިކުއޭޓިކް ވައިބް: ކަމުދަނީ ހިތްގައިމުވީމަ
މުހިންމު ނުކުތާތައް
އިކުއޭޓިކް ވައިބްގެ ފަންނާނުން ހެނދުނު ހެނދުނާ މަސައްކަތް ފަށައިގަނޭ
އާއްމުންގެ ސަމާލުކަން އެންމެ ބޮޑަށް ލިބުނީ ޝައްމޫންގެ ހިތްގައިމު އަޑުން ކިޔާފައިވާ ލޯބީގެ ލަވަތަކަށް
އެހެނިހެން ރަހަތަކުގެ ރީތި ލަވަތަކެއް ވެސް ބޭންޑުން ވަނީ ގެނެސްދީފައި
ހެނދުނުގެ އައްޔާއި ކޮފީގެ ވަހާއި ލައިވް މިއުޒިކެވެ. ރަނގަޅު ކޮމްބިނޭޝަނެެކެވެ. ބައިސްކޯފުގެ ސްޓޫޑިއޯ ތެރެއިން އިވެމުން އަންނަނީ އިކުއޭޓިކް ވައިބްގެ ޝައްމޫން މުހައްމަދު އޭނާގެ ހިތްގައިމު އަޑުން ކިޔާލާ ރީތި ލަވަ އެކެވެ. ކަންފަތުގައި މިއުޒިކާ އެކު އެ އަޑު ޖެހުމުން މުޅި ދުވަހުގެ ބާކީ ރަނގަޅުވާނެކަމުގެ އިހްސާސެއް ކުރެވޭ ކަހަލަ އެވެ.
އާއްމުންގެ ބޮޑު ސަމާލުކަމެއް ހޯދާފައިވާ އިކުއޭޓިކް ވައިބްގެ ލީޑުގައި ތިބީ ދެބެއިންނެވެ. ލީޑް ވޯކަލިސްޓް އަދި ގިޓަރިސްޓް ޝައްމޫން އާއި އޭނާގެ ކޮއްކޮ، ބޭސިސްޓް އަހުމަދު އަމީން މުހައްމަދެވެ. ބޭންޑްގައި ދެން ތިބެނީ ޑްރަމަރު އާދަމް ޝިނާނާއި ލީޑް ގިޓަރިސްޓް އަހުމަދު ފައިރޫޒާއި މިފަހުން އަލަށް ގުޅުނު އެކަމަކު ސަޕްރައިޒެއްގެ ގޮތުގައި ބޭއްވުމަށް އަދި ނަން ހާމަ ނުކުރާ، ތަޖުރިބާ ހުރި މިއުޒީޝަނެކެވެ.
އިކުއޭޓިކް ވައިބްގެ ފުރަތަމަ އަލްބަމަކީ ހަތް ލަވައާ އެކު 2016 ވަނަ އަހަރު ނެރުނު 'ކުލަތައް' އެވެ. ދެވަނަ އަލްބަމް 'މަގޭ އީޕީ' ގައި އިނގިރޭސި ލަވައެއް ވެސް ހިމެނެ އެވެ.
ޗަނާޗާގައި ބައިވެރިވާ އެހެން ބޭންޑްތަކާ އިކުއޭޓިކް ވައިބް ތަފާތުކަން ފާހަގަވި އެއް ކަމަކީ، ބޭންޑް ޕްރެކްޓިސް ކުރާ ވަގުތެވެ. އެހެން ހުރިހާ ބޭންޑެއް ދުވަހުގެ ފަހު ބައިގައި ޕްރެކްޓިސް ކުރިޔަސް، އިކުއޭޓިކް ވައިބް އިން ވަނީ ހެނދުނުގެ ތާޒާކަންމަތީ، ދުވަހުގެ ވަރުބަލިކަން އިހްސާސްވުމުގެ ކުރިން، ޕްރެކްޓިސް ކުރަން އާދަކޮށްފަ އެވެ.
ބޭންޑްތަކުން ފެންނަ މޫނުތައް ބަދަލުވުމަކީ، ރާއްޖޭގެ އިތުރުން ބޭރުގެ ބޭންޑްތަކުގައި ވެސް ވާ ކަމެވެ. ޝައްމޫން ފާހަގަ ކުރީ މިހާރުގެ ލައިންއަޕް ހާއްސަ ކަމުގަ އެވެ.
"ވަރަށް ވޯކް ޑްރައިވް ރަނގަޅު ލައިންއަޕެއް މިހާރު މި އޮތީ. އަބަދުވެސް ތައްޔާރީތައް ވާއިރު އަދި އަލްބަމްގެ މަސައްކަތް ކުރަނީ ހެނދުނުގެ ވަގުތު. އެއީ މައިންޑް އެންމެ ފްރެޝް ވާނީ ހެނދުނު ގަޑީގައި ކަމުން،" ޝައްމޫން ބުންޏެވެ.
އިކުއޭޓިކް ވައިބްގެ ލަވަތަކަކީ ބޭންޑުގެ އެންމެންގެ ހިޔާލުތައް އެކުލެވިގެން ނެރޭ ކްރިއޭޓިވް މަސައްކަތްތަކެއް ކަމުގައި ވިޔަސް އެ ލަވަތަކުގެ ޅެން ހަދަނީ ޝައްމޫން އެވެ.
އުފެދުނީއްސުރެ ވެސް އަމިއްލަ ރާގަށް ފޯކަސް ކުރާ އިކުއޭޓިކް ވައިބުން ހަފްތާއަކު ތިން ރޭ ބޮލިފުށި ރިސޯޓުުގައި އަދި އެއް ރޭ ހާޑްރޮކް ހޮޓެލްގައި މިއުޒިކް ކުޅެ އެވެ. ކްރޮސްރޯޑްސްގައި ހުންނަ ހާޑްރޮކް ހޮޓެލްގައި ޝޯ ދޭތީ ދިވެހިންނަށް ވެސް އެ ބޭންޑުގެ ޕާފޯމެންސްތައް ބަލައިލަން ދާން ފަސޭހަ އެވެ.
ޖަރުމަނުގައި ބާއްވާ، ފަތުރުވެރިކަމާ ގުޅޭ ދުނިޔޭގެ އެންމެ ބޮޑު ފެއާ އައިޓީބީގައި ވެސް ދެ ފަހަރަކު އިކުއޭޓިކް ވައިބް އިން ޝޯ ދީފައިވެ އެވެ.
ބޭންްޑްގެ އެންމެ ބޮޑު ބާރެއްގެ ގޮތުގައި ޝައްމޫން ފާހަގަ ކުރީ އެކަކު އަނެކަކާ އޮންނަ ގުޅުމެވެ.
"ކަނެކްޝަން އޮވޭ. މަސައްކަތުގެ އިތުރުން އެއްކަހަލަ ޕެޝަނެއް އެންމެންގެ މި އޮންނަނީ،" އޭނާ ބުންޏެވެ.
ލޯބީގެ ރީތި ރާގުތަކެއް
ފޭނުންގެ ސަމާލުކަން ބޭންޑަށް ހޯދީ ޝައްމޫންގެ ސާދާ ޅެންވެރިކަން ހިމެނޭ އިޝްގީ ލަވަތަކުންނެވެ. 'ގެއްލިފާ' އަކީ އެފަދަ ރީތި އެއް ލަވަ އެވެ. ކޮންމެ މީހެއްގެ ހަޔާތުގައި ވެސް ލޯބި ބޮޑު ދައުރެއް އަދާ ކުރާ އިރު ގިނަ މީހުންނަށް ލޯބީގެ ލަވަތައް ގަޔާވެގެން އަޑުއަހާލެވެ އެވެ. އެކަމަކު އިކުއޭޓިކް ވައިބް އިން ހަދާފައިވަނީ ލޯބީގެ ލަވަތައް އެކަންޏެއް ނޫނެވެ. ރާއްޖޭގެ ރީތިކަން ކިޔައިދޭ 'މަގޭ ރާއްޖެ' އަކީ އޭގެ އެއް ހެއްކެވެ.
"އެންމެ ފުރަތަމަ ލަވަ ހަދަން ފެށި އިރު ލޯބީގެ ލަވަތަކެއް ހެދިން. އަލްބަމްތަކުގައި ވެސް ނުހުންނާނެ ހުސް ލޯބީގެ ލަވައެއް. ބަލަނީ މީހުންނަށް އަބަދުވެސް ތަފާތު އެއްޗެއް ގެނެސްދެވޭތޯ،" ޝައްމޫން ބުންޏެވެ.
ޗަނާޗާގައި އާ ލަވަތަކެއް
އިކުއޭޓިކް ވައިބް އެންމެ ފަހުން ބޮޑު ޝޯއެއް ދީފައިވަނީ އައްޑޫގަ އެވެ. ބޭންޑްގެ އޮތީ ވަފާތެރި ފޭން ބޭސްއެކެވެ. ޝައްމޫން ބުނި ގޮތުގައި ބައެއް ފޭނުން އިކުއޭޓިކް ވައިބް ކޮންމެ ތަނެއްގައި ކުޅުނަސް ބަލާލަން ދެ އެވެ.
"ޝޯތަކުގައި އެންމެ އުފާވަނީ އަހަރެމެންގެ އަމިއްލަ އޮރިޖިނަލް ލަވަތަކަށް ރިކުއެސްޓް އަންނާތީ،" ފަހުރުވެރިކަމާ އެކު އޭނާ ބުންޏެވެ.
ހުޅުމާލޭ ދަނޑުގައި އަންނަ ހޮނިހިރު ދުވަހު އޮންނަ ޗަނާޗާ މިއުޒިކް ފެސްޓިވަލްގައި އިކުއޭޓިކް ވައިބްގެ އާ ހަތަރު ލަވައެއް އަޑުއިވޭނެ އެވެ. އަދި ޝައްމޫން ބުނި ގޮތުގައި އެ ލަވަތަކުގެ އިތުރުން ވެސް އަމިއްލަ ލަވަތަކެއް އުފެއްދުމުގެ މަސައްކަތް ބޭންޑުން އަންނަނީ ކުރަމުންނެވެ.
'ގުޑް ވައިބްސް'
މިފަހުން އިކުއޭޓިކް ވައިބުން ތަފާތު ކަމެއް ކޮށްލި އެވެ. އިންސްޓަގްރާމުން އެމީހުންގެ ލޮލުގައި އަޅައިގަތީ ހަލާލުވެފައި އޮތް ގިޓައެއް ކުޅޭ ކުޑަކުއްޖެކެވެ. އެއާއެކު ބޭންޑްގެ ފަރާތުން އެކުއްޖާއަށް، ޝައްމޫންގެ އަތުގައި އޮތް އިތުރު ގިޓާއެއް ދިނީ އެވެ.
ޝައްމޫން ބުނިގޮތުގައި ކުޑަކުދިންނަށް އަދި މިއުޒިކަށް ޝައުުގުވެރިވާ މީހުންނަށް އެހީތެރިވާން ބޭންޑުން ބޭނުންވެ އެވެ.
"ވަރަށް އުފާވި. އެކުއްޖާ އަދި އެކުއްޖާގެ ބަައްޕަ ވެސް ހުރީ ޝޮކެއްގައި. އެމީހުން އެކްސްޕެކްޓެއް ނުކުރޭ އެކަހަލަ ކަމެއް ވެދާނެ ކަމަކަށް،" ޝައްމޫން ބުންޏެވެ.
މިއީ އެމީހުންގެ އިންސްޓަގްރާމްގައި އަމިއްލަ އަށް ބޭންޑް ސިފަކޮށްފައިވާ 'ގުޑް ވައިބްސް، ގުޑް ޓައިމްސް'ގެ ޝިއާރާ ވެސް ގުޅޭ ކަމެކެވެ. ހިތްގައިމެއް ނޫން ހެއްޔެވެ؟